يوميات الام العاملة وشو يستوي في بيتها … سياحة الامارات

العمل ربما يكون مهم ضروري بنسبة 50% للامهات ولكن بنفس النسبة هو ضياع للوقت ولشراء الكماليات

جدول الام العاملة :

تنش تتريق وتسير الدوام ومنو يقوم عيالج منو يريقهم منو يريق ريلج <<<الشغالة

سالتي عمرج كيف تنشش عيالي تعصب عليهم ولا لاء يتريقون ولا لاء يعني وايد يهمها الشغالة ريوق عيالج

والبنت الصغيرة والطفل الرضيع اللي في البيت تاكلهم تجابلهم كيف تتعامل معاهم اذا صاحوا اذا طاحوا!!!

سبحان الله الام تطفر من عيالها وتعصب وتضربهم ساعات وين الخدامة شو تتوقعون منها !!!

وبعدين ترد البيت وهي تعبانة بتتغدا على السريع عسب ترقد لان العصرمواعدة ربيعاتها مال الدوام بتظهر بتسير تفصل عبي حق الدوام وبترد الساعة 8 عيالها رقود عندهم مدارس وهي طبعا تعبانة من الحواطة والدوام مب متفيجة تتعدل وتتريا الريل

سبحان الله كم ساعة هي برع البيت وكم ساعة جابلت عيالها ويلست معاهم

والزوج المسكين الطيب زيادة عن اللزوم اذا ما لاقى راحة وحب واهتمام الشارع متروس بنات ما بيي يترجاج عسب تعطينه حب وحنان

انتي قلبج بيتقطع اذا استوا شيء بعيالج
( ابوظبي)ما سمعتي عن الولد اللي يته حمى وارتفعت حرارة وااايد وهو طبعا عند الشغالة والحين من سنين يتعالج بالمانيا ماحصلوا له علاج لان اعصابة تلفت وما عنده كنترول على شيء اعضاءة تتحرك لا اراديا

صاحت وندمت وبعدين شو استفادت مع انها مدرسة يعني مربية اجيال ما قدرت تربي ولدها الى ان ضاع عنها
(دبي_ندالحمر)ما سمعتي عن الولد اللي كل ما طلب شيء من الشغالة حطت له سمسومة في اذنة زين ما فقد سمعة

والفيديوا اللي راووه في التلفزيون اللي يقطع القلب الولد يبغي عصير تضربة ضرب عسب ما يخرب عليهم الفلم

وغير وغير وغير قصص تقطع القلب

اختي الغالية لا تتشكين وتقولين ريلي خاين لانة ما لقى الحب والحنان والاهتمام منج

راجعي نفسك الغالية وحطي النقاط على الحروف

اللهم احفظ لي زوجي وابناءي ولا تحرمني منهم يارب وقدرني على تربيتهم تربية صالحة وزوج راضي عني ان شاء الله