بنات انا بكتب هنا موضوع يديد عن يومياتي بمستشفى (توام للاخصاب )
انا اتعالج عند الدكتور وليد ما شاء الله عليه ممتاز بمعنى الكلمة (بصراحة بحياتي كلها ما جد جفت دكتور شراته (الله يحفظه يارب ) ).
بخبركم عن قصتي ..ز
انا سويت عمليتين عندهم الاولى عند ديفيد بس انتهت المحاولة بالفشل والثانية سويتها عند وليد والحمدلله حملت بفضل الله بس للاسف عقبها بفترة اجهضت بالاسبوع 7
والحين انا ببتدي من اول ويديد بالعملية ودعواتكن لي تنجح هالمرة والله يرزقني ويعوضني عن الحمل السابق ويرزقني بالتوم الي دوم احلم فيهم انا وريلي …
صدقوني يا بنات الخطوات هب سهلة على اي وحده …الحالة النفسية تلعب دور كبير في هالعمليات والوسواس والتوتر …وخاصة اذا افشلت العملية بس لازم نصبر ونحتسب الاجر
والله اذا ابتلانا هو يحبنا ويبي يطهرنا من الذنوب الي كنا فيها ويكفر عنا
انا اول مره اكتب موضوعي الشخصي ي المدونة …بس حبيت افضفض وابين لكم ان الصبر لازم يكون سلاحنا خاصة نحن المتاخرات بالحمل …ما تدرون اشقد انا عانيت من المستشفيات واركض من مستشفى لمستشفى ومن ابره الى عشرات الابر بس عسب احمل
تعبت نفسيتي دمااااااااااااااار صرت ما ارقد ما اكل الا وانا افكر بالحمل …ادري الكل بيقول حتى احنا بس سبحان الله من كل هالتجارب استمديت القوة تعلمت اني لازم اكون قوية وصابرة واعتمد على روحي واخبي الامي لنفسي حتى امايه هي الي اقرب لي ما احبه اصارحه باي شي يخصني ابي اشكو بثي وحزني الى الله مب للناس واتذلل له وحده سبحانه..
ادري ان الله بيعوضني جريب جريب بس في وقت هو يحدده ..بس لازم اصبر وما ادخل الياس بحياتي ابد واكون دوم متفائلة ..بنات تخيلون انا بالعمليات وبالبنج كله ابتسم واضحك حتى النيرسات الدكتور يقولي ماشاء الله عليج كله مبتسمة حتى بحزة العملية ؟؟
تخيلون يشيلون عني الكيس بالمبيض بدون بنج او تخدير (طبعا انا طالبه جي ) واكون بعد مبتسمه فويه الناس والنيرسات مع ان هذي اصعب لحظة على الوحده بس اقول لازم اتحمل واستحمل كل هالالم حتى اخذ الاجر والثواب
عندي قصص بحياتي كثيره حزينة ومريرة بس لازلت احتفظ فيها واخر قصة حصلت معايه يوم اول صباح العيد…
ام ريلي اول ما سلمت علي قالت لي( الناس تيب الحين توام وانتي للحين هب رايمه تيبين واحد)
قعدت اصيح واحتسب الاجر مع انها تدري اني حملت واجهضت بس دوووووووووووم تحب تذبحني بكلامها الي ما اظني يخلص الين ما انا امووووت
صدق اذا انتي رضيتي بقدرج لانج مؤمنة بالله الغير اعوذ بالله يعيشش بكوابيس والالم وبسخط وتذمر …
اللهم كل من اراد لي بكيد فرده في نحره
اخوااتي …عزيزااااتي …حبيباااتي …دعواتكن لي ولكل وحده مقبلة بالعمليات ان الله يعوضني وياجرنا في مصائبنا ويخلف لنا خيرا ويرزقنا بالذرية الصالحة عاجلا غير اجلا ..
دعواتكن لي تنجح عمليتي هالمرة احمل بالتوام الي خاطري فيهم
ارجو انكم تردون علي ولو بدعوة حلوة حتى بانفسكم بدون ما تكتبون ولا كلمة
احبكم في الله
اول يوم بعد ما اخذت الابرة التحضيرية يوم 21 من الدورة …جافوا عندي كيس بالمبيض وقال الدكتور لازم نشيله وقرر يكون يوم الاثنين الصباح الباكر موعد سحب الكيس
يوم الاثنين:
رحت لهم الساعة 9 صباحا ودخلوني قسم العمليات وطبعا طلبت يكون بدون بنج والحمدلله سحبوا الكيس عني وافتكيت منه..
عقبها الدكتور وليد عطاني البرنامج للابر التنشيطية وكانت ابر ( المينيغون ) 3 امبولات بالعضل لمدة 3 ايام عقبها 4 امبولات الين موعدي الثاني يوم الثلاثاء 14-10
الثلاثاء:
بديت استخدم الابر التنشيطية 3 امبولات مع ماء واحد ومعاه فوليك اسيد
احبكم في الله
باذن الله الساعة 10 بالليل ببتدي اضرب الابره
حبيت اخبركن اني انا روحي الي اضرب الابر الي بالعضل مع انه الدكتور منعني قال صعبه وااااااااااايد لا تخاطرين بحياتج بس الحمدلله تدربت اضربها روحي عسب ما احتاج لا نيرسااات ولا غيره واتحمل بنفسي ولا سيرات للعيادات وانتظار ….ادري انكم بتستغربوووون بس انا مثل ما قلت لكم واااااااااااايد تحملت الاشياء وقلت لازم اصبر واصبر حتى الصبر يمل مني وما احتاج لا ي احد حتى ريلي يستغرب ويقول حرااام عليج بتذبحين عمرج يوم تضربين الابر اقول ما يهمني انا وكلت امري للي خلقني وهو اعلم بحالي وارحم علي منك ومن اميه
امس لما ضربت الابره عورتني عسب عقب ما ظهرتها سحبت شوي دوم بس ان الله حافظني وبيكون معاااايه
اللهم امين اللهم امين اللهم امين