يا شمعة البيت ……….. تعالي شوي

السلام عليكم

خواتي ليش شغلكم الشاغل ازواجكم
كل همكم ولا فرحتكم ولا سعادتكم و قلوبكم متعلقة فيهم
و تفتشون و تلحقونهم و كل شي تسوون لهم
وين سار ليش طلع
ليش دوم يوصل اهله و انا لا
ليش ليش ليش يحب يطلع مع ربعه

منو ما يحب يطلعه مع ربعه والله يوم اطلع مع ربيعاتي وايد استانس عادي يعني
خلوا قلوبكم متعلقة برب العالمين
كأن زوجج هو اللي بيدخلج الجنة و النار >>>لا حبيبتي
تسوين اللي عليج و الباجي ع رب العالمين
انتي الخسارة تفكرين و تصيحين و صحتج تتأثر و التجاعيد تطلع ف ويهج و تكونين عيوز مكسرة
و لا اللي تكود درزنين يهال ورى بعض و كرشتها يدامها و صغيرة ف العمر >> عمرهم العيال ما يربطون الريال ابد

انا كنت شراتكم
يوم يكون معاي ما اقصر كامله و الكمال لله
و يوم ما يكون موجود استانس و اشوف حياتي و مرتاحة
و عندي ربيعات و كل شي و عندي استقلاليتي

اكتشفت مصيبة ما ابغي ادخل ف تفاصيلها غيرت لي حياتي 360 درجه
من ناحية التقصير فهو مب مقصر سواء ماديا ولا غيره
كانت يدتي تقول لي "فضي جيب الريال عسب ما اييب لج حرمه تقصد حبيبة او زوجه ثانية "

وانا الحمد الله و الشكر كلما ابغي اشتري شي وياه اقول حرام حليله ما عنده
يبني بيت حليله يسفرنا يودينا ……. الخ
و غلطتي كانت الثقة و اني ما افتش وراه ع اساس " الثقة متبادلة " و لازم الوحدة ما تنبش ورى ريلها
ف البداية طبعا تصيحين و تنقهرين و تموتين حزن و الم
كنت انش الفير و اصيح
المهم الحين عادي

بس سبحان الله بنات
رب العالمين عطانا نعمة النسيان
و الحمد الله اهم شي ان رب العالمين عطانا العمر و الصحة
في ناس مففتقدييين نعمة الصحه و الله يرحم بحالهم و يشفيهم
ع الاقل مصيبتي اهون من مصيبة غيري
عندنا
الام و الاب و العيال و الزوج و الشغل و الدراسة و سواقة السيارة و الربيعات كل شي
كل شي عندنا نعمة
خير يا طير ريلج خانج يعني انتي اول وحدة
الحين الاميره ديانا خانها تشارلز مع اللي ما تتسمى و هي جمال و مال و نسب و ذوق
وين نحن بعد خخخخخخخخخخخخخخ

الحين الدور عليج تمسكين بيتج و انتي حرة تبغينه او ما تبغينه شي راجع لج
تبغين تهددينه تبغين تزعلين براحتج هاي اشياء خاصة ما بدخل فيها ابدا
تبغين تغيرين نفسج حق نفسج مب حقه عسب تنسين و ترتاحين و تستانسين

النعم موجودة
لا تجحدون فيها عسب انسان
قلوبكم تكون متعلقة برب العباه مب بالعبد نفسه

ع فكرة انا وايد اهتم و اكشخ
بس مرات مرات ايود عمري عن الصرف
و لكن

تدرون يوم صارت السالفة شو سويت
شخطت ع بطاقة البنك و شريت اللي ف خاطري
في ناس يرتاحون بالشوبينق وانا منهم

و غيرت بعض الاشياء في حياتي
الحين كلما اطلع وياه –> ادخل و اتشرى ع راحتي مب شرات قبل اقول حرام ما عنده
وانا اشتغل و بشتري لي

حرمته عليه عيشته خله يدفع ليش قلبج يعورج عليه
سواء كان زين ولا مب زين
اشتري و استانسي و تدلعي و تدللي
الفلوس تروح لج مب لحد غريب
اليوم يدفع لج احسن مما يدفع لغيرج او لربعه او لوناسته
عندج مواعيد خليه يوصلج
الجمعية الاغراض كل شي
مع ان من يومي اسوي جي بس زدت العيار حبتين

في حريم بيقولون نحن نساعد رياييلنا
هذا شي وايد خاص و يختلف من بيت ل بيت
ما اقدر ادخل فيه براحتكم بكيفكم

الثقة مطلوبة بس مب العمياااااااااااااااء مغمضه عينج عنه و عن حقوقج الاساسية

قبل يوم يكون موجود عندي اقعد معاه دوم و اسوي القهوة و الجاي و السويت
بس الحين اقول له " سكيوز مي عندي جم جوف اليهال و دير بالك عليهم مع السلامة"
طبعا مب دوم بس في بعض الاحيان

عندي عرس ف السلع ف الفجيرة ف اي مكان
ان شاء الله في دولة ثانية
بكلام حلو و اخليه يوصلني
ليش احكر عمري ف البيت عسب اليهال و عسب ريل؟؟
اليهال تقدرين تودينهم اي مكان عند ريلج اهلج اهل ريلج ربيعاتج حضانه او معاج

و عمره الحمل و كثرة اليهال ما تربط الريال
اللي مب زين لو اتيين له درزن ما بيربطه بيشرد اكثر
و ترى ع فكرة كل الرياييل يحنون ع حريمهم احملي و احملي و ابغي نونو
ف بليز اللي عيونها تتلألىء بعد ما ريلها يقولها ابغي ياهل منج و تستانس
ترى عادي هاي طبيعة الكل
ليش هو يطلع الياهل من بطنه ولا كرشته اللي تترهل هههههههههههههههه
اهتمي بعمرج و بجسمج و برشاقتج و براحتج
رتبي حملي بصورة منظمة عسب تربين عيالج عدل و بعده العمر يدامج لو انتي صغيرة

العلاقات الاجتماعية وايد مهمة في حياة الحرمة
الاستقلالية مهمة بعد مب شرط الوحدة تشتغل يعني مستقله لا
حتى اللي ما تشتغل تشغل نفسها بشي مفيد و تسوي لها مشروع حلو و خفيف ع القلب

عيشي حياتج و استانسي
لان الريال يحب الحرمة اللي جي
يركض وراها يربع وراها
و يغار عليها اكثر

اهتمي ف نفسج و ف جمالج و البسي و ترصصي
و ارقصي ع الوحدة و نص
و روحي الجم و النوادي و بتلقين سوالف حلوة يوغا و رقص و زومبا و كارتيه لو تبغين تضربينه ههههههههه
و اهتمي بعلاقاتج مع كل حد خليها حلوة و جميله و جاملي الناس
حذاااري اطلعين فيج عيب يدامه حذاري تفتحين عينه ع شي فيج مب حلو
انتي حلوة و كل شي فيج حلو

انا صراحة وايد تغيرت بصورة واضحة
مسويه لي جدول مرتب

مقسمة وقتي للجم + وقت للطلعه مع عيالي خاص فيني و فيهم فقط + وقت الدوام
+ يوم محدد للصالون و للسبا + يوم محدد لزيارة الاهل و صلة الرحم + يوم محدد للطلعه مع ربيعاتي
+ يوم محدد للطلعه معاه + يوم معين لترتيب البيت

بحاول انزل لكم جداولي بالتفصيل عسب تستفيدون

نصيحة لكم
انتي رقم 1
و انتي نور البيت و شمعته

و هو رقم 2
و هو عمود البيت و هو الريال يصرف و يسوي

اسأل مجرب ولا تسأل طبيب
الله يخليكم لا تغلطون لا تغلطون لا تغلطون