ولدي والسيريلاك في الامارات

السلام عليكم حبيباتي

ولدي بيكمل الحين سنه ونص هل السيريلاك ضروري لانه يحتوي على فيتامينات/لان ام زوجي زعلانه ومكلمه ريلي زوجتك ليش ما تعطي الولد سيريلاك في الرضاعه وليش ما تييبوله بسكويت

والريال معصب طيب والخضره والعيش والفواكه هاي شو ما منها فايده

بنات ياريت توضحون الصوره

وهل لان ام زوجي كبيره يعني كل شي صح تسويه مع العلم كنت اشوفها توكل ولدي برجر يوم كان صغير(6 شهور) ووقف الاكل في بلعومه ورجع وقلبي وقف بس ما قدرت اقولها شي وعصبت على ريلي

وشكرا

السيريلاك منتوج صناعي تجاري بالدرجة الأولى

الأفضل إعطاء الطفل مايحتاج من الحبوب و القمح و غيرها بشكل طبيعي مثلا ( الشوفان ) يطبخ ويطحن يخلط مع حليب أفضل بكثير من السيريلاك .

لكن من الناحية العائلية و جبر الخواطر استخدميه أحيانا إرضاء لأم زوجك و جدة ابنك واحتسبي الأجر الأمر بسيط إن شاء الله .

ربي يسعدكم .

رررررررررفع

انا كنت اعطي بنتي سريلانك في المرضعه يوم كانت ضعيفونه و توه يطلع اسنانها كانت ما تاكل .. و الحليب ما يشبع وكانت تضعف فكنت احط سيريلانك خاشوقه في المرضعه و اتم اذوبها و اعطيها من عمرها 4 لين ما كملت سنه و 5 شهور والحينا خلاص ما اعطيها اياه .. لان تاكل اكل و السيريلانك كبرت عليه ..
و بابا نفس عمتج دوم يقول عطوها سيريلانك تدرين ليش لان منتج قديم و هم تعودوا عليه و بعد اليهال الي ياكلون سيريلانك عده مرات في اليوم يصيرون دغدوغين و احجامهم اكبر لان حبوب مدعم بالفتيمينات .. عادي هم يعتبرونه احسن شي حق البيبي ..
عن خاطرها عطيه كم خاشوقه جدامها .. مسكينا تبا دغدغ ولدج ههههه

شكرا حبيباتي ما قصرتن هذا اللي كنت ابي اوصله لان سالفتي وصلت لاتهامي بالاهمال لاحول ولا قوة الا بالله

بعطيه عن خاطرها الله يطول في عمرها

حبيبتي لا تنسين هذا ولدك و ربيه مثل ما انتي تبين, لا تسمعين كلام حد, صحيح اهلنا ربونا لكن مب كل شي صح.. ولدك خلاص كبير و ما يحتاج سيريلاك, اكليه وجباتكم العادية للفطور والغدا و العشا, بس لو لحوم اهرسيها شوي عشان لا يغص.. الطفل من عمر السنة ياكل اكل البيت و الحليب شربيه الحليب العادي يلي متعود عليه و انشاءالله ما عليه الا العافية و اشتري له فيتامين من الصيدلية مناسب لعمره… ما انصحك بسيريلاك في المرضعة, ترى يمتن عالفاضي ولا يفيد بأي شي.. لو هو يحبه عطيه للفطور عادي بالصحن وخلاص بس مب في المرضعة.. انا بنتي في نفس عمري ولدك وبقولك شو اوكلها عشان تستفيدين
الفطور: اي شي متوفر في البيت (بيض, خبز بجبن او مربى اغمسلها كل لقمة في حليب, بانكيك طري, كورن فلكس احطه بحليب دافي من وقت عشان يطرئ, قطع فواكه طرية مثل المانجو و الموز والبطيخ و الاناناس, كيك سادة اغمسه لها في حليب)
الغدا: من اكل البيت مثلا اطلع لها شوي من الصالونة قبل ما اضيف له الملح والبهارات و اخلطه مع شوي بطاط مهروس او رز او معكرونة مطبوخة زين او كسكس.. حليب في المرضعة قبل القيلولة
العصرية: روب بالفراولة, قطعة كيك صغيرة, كاسترد, جيلي, قطع فواكه
العشاء: اي بواقي من الغدا او نفس الفطور اهم شي دافي للمعدة عشان ينام مرتاح… و يشرب حليب في المرضعة قبل النوم بنص ساعة

عادي اكليه سريلاك بس لا تعتمدين عليه
خليه ياكل معاكم من أكلكم ما شاء الله ولدج كبر وصار ريال