ولدتي بالسلامة بس حاسة ما فيج حليب ؟؟ تعالي اخبرج كيف تزيدينه

هلا خواتي.. اولا الحمدلله على سلامتكن و سلامة مولودكن و الف مبروك.. بتكلم اليوم عن خطوات بتساعدج في عملية الرضاعة الطبيعية و بتزيد عندج إدرار الحليب خلال 3 ايام بإذن الله لو اتبعتي الخطوات التالية ..

بنحتاج لجهاز شفط Medela Swing و الأعشاب التالية من صبدلية GNC :
Blessed Thesile
Alfalfa
Fenugreek

هي عبارة عن عشبة الشوكة المقدسة و البرسيم و الحلبة و يستخدونها في إدرار الحليب

اولا وضعية الرضاعة الصحيحة :
استخدمي مخدة الرضاعة عشان تساعدج في تصحيح الوضعية .. لان لو الطفل مش مرتاح ما بيرضع بطريقة صح… ارفعي الطفل في اتجاه الصدر بدل ما انتي تنحنين و تتقربين منه… اذا انحنيتي كتفج و ظهرج بيعورج من الجلسة الغلط .. ثانيا لازم الطفل يكون نايم على جنبه و بطنه لاصق في بطنج و الثم قريب من حلمة الصدر.. خلي حلمة الصدر تلامس ثم الطفل و انتظري لين ما الطفل يفتح ثمه على الاخر .. بسرعة دخلي الحلمة و جزء من الجلد اللي حولها في ثم الصدر.. شفايف الطفل لازم تكون على برا و لسانه حول الحلمة بالضبط… الحين راقبي و استمعي للطفل.. لازم تسمعين صوت بسيط وهو يشرب الحليب و يبلعه.. و تشوفين رقبته تتحرك لما يبلع.. ساعتها بتتاكدين انه يرضع بطريقة صح ..

ثاني نقطة هي توقيت الرضاعة .. لازم يرضع الطفل كل ساعتين او 3 ساعات في فترة النهار و كل 3 او 4 ساعات في فترة الليل.. و اهم رضعة هي اللي تكون تقريبا على وقت صلاة الفجر .. لما تنامين كم ساعة و تقومين في الليل عشان ترضعين ولدج و ترجعين تنامين .. لما ترضعين المخ يتلقى إشارة بزيادة هرمون الرضاعة .. و هالهرمون هو اللي يزيد الحليب.. لا تباعدين الفترة الزمنية بين كل رضعة و الثانية اكثر من 4 ساعات.. وجود حليب في الصدر فترة أطول من الأربع ساعات يعطي إشارة للمخ بتقليل الحليب..

لو فرضنا ان الطفل و لاسباب صحية ما يقدر ياخذ الصدر.. لازم نحفز
الحليب بالشفط كل ساعتين او 3 ساعات.. و نفس الشي نقوم الفجر نشفط
عشان الهرمون يرتفع في الجسم و الحليب يزيد.. لا تهملون هالنقطة … بالنسبة لمدة الشفط.. اقل شي 20 دقيقة للطرف الواحد .. بتلاحظون شي .. اول ما
تشغلون الجهاز على الدرجة الاولى بتكون حركته سريعة مثل حركة ثم الكفل الجائع .. خلوه على الدرجة الاولى لين ينزل الحليب .. اول ما ينزل حطوا الدرجة الثانية و اللي هي حركة شفط بطيئة.. بتلاحظون الحليب يبدأ لونه شفاف يميل للون الازرق و هو عبارة عن ماء يروي عطش الطفل .. بعده ينزل حليب كثيف حلو المذاق و دسم هذا اللي يسمن الولد و يعطيه قوة و مناعة.. بتلاحظون اثناء الشفط يخف الحليب.. لا توقفون .. ارجعوا على الدرجة الاولى السريعة في جهاز الشفط لين ما ينزل الحليب مرة ثانية.. لما ينزل الحليب حولوا الجهاز للدرجة الثانية و هكذا 3 او اربع
مرات.. لين تتاكدون ان الصدر خلص الحليب اللي فيه.. و بعد ساعتين سوو نفس الحركة لطرف الصدر الثاني لين يخلص الحليب اللي فيه.. و اعطوا الطفل الحليب باستخدام القطارة او الكوب او الحقنة البلاستيك و ما اشجع على استخدام المراضع قبل ما يكمل الطفل شهرين او 3 لين ما يتعود على الرضاعة الطبيعية و ينجح فيها ..
 

سبحانك اللهم وبحمدك , أشهد أن لا إله إلا أنت , أستغفرك وأتوب إليك

اخر نقطة هي الأعشاب و الأكلات اللي تدر الحليب.. ذكرت لكم ثلاث انواع من الأعشاب.. لازم تاخذون من كل نوع حبتين .. 3 مرات في اليوم.. يعني بيكون المجموع 6 حبات في كل وجبة لين يزيد الحليب و تتضاعف كميته .. الكويكر او الشوفان او كابتن .. يزيد الحليب لو تشربونه كل يوم و يعطي طاقة للحريم اللي يرضعن و يعتبر وجبة صحية .. بخبركم طريقتي في تحضير الكويكراو الشوفان : 1 ليتر حليب – 3/4 كوب كويكر – 4 ملاعق طعام سكر – نص ملعقة من الهيل و الزعفران .. نسخن الحليب و نرش عليه الكويكر .. ما نحطه دفعة وحدة عشان ما يلزق في بعضه … نرش الكويكر اثناء التحريك لين نخلص المقدار.. نضيف باقي المقادير و نخليها على نار هادية لمدة 5 دقايق لين يغلض قوام المشروب مع التقليب بين فترة
و فترة .. و نصبه في دلة و نشرب منه 3 اكواب يوميا.. هذا المشروب
وايد مغذي حتى لكبار السن و الاطفال فديتهم.. جربوه و ادعوا لي ..
 

الله يجزيك كل خير اختي

جزاك الله خير .. والله يبارك في موالديكم

اخر نقطة بتكلم عنها هي كيفية التعامل مع الحليب المشفوط.. طبعا الشفاطة يكون معاها زجاجات بلاستيك.. تقدرين تشترين منهم زيادة من محلات بيبي شوب لو احتجتي .. الحليب يكون صالح للشرب لمدة ٣ ساعات برا الثلاجة.. و لمدة ٧ ايام داخل الثلاجة .. و اذا حطيناه في الفريزر يقعد ٣ شهور ما يخترب .. بتلاحظون ان الحليب لما يقعد فترة ينفصل الى ماء و حليب .. يعني شفاف من فوق و مركز في الطبقة اللي تحت.. لا تخافون الحليب ما اخترب.. و عشان يرجع الحليب الشفاف يختلط مع القشطة او الحليب المركز اللي تحته لازم نراعي نقطة مهمة.. نخلط الحليب بتحريك الزجاجة بحركة دائرية لين يختلط.. لازم ما نرجه مثل ما نرج الحليب الصناعي.. اكرر ما نرج زجاجة الحليب.. بس نحركها بشكل دائري لين يختلط الماء بالقشطة.. و نسخن الحليب في جهاز التسخين او في نغمر الزجاجة في كاس فيه ماي حار.. ما نسخن الحليب في القدر او الإبريق نهائيا .. لانه ما يتحمل الحرارة الدايركت..

قبل لا تبدون عملية الشفط و عشان ما يعوركم الشفط.. انصح باستخدام نقاط من زيت الزيتون داخل بوق ( مخروط) الشفط و غلى الحلمة قبل عملية تشغيل الجهاز.. هذا يعالج اي جروح في الصدر و في نفس الوقت يخلي عملية الشفط سهلة و مريحة و بدون الم.. لا تخافون من نزول الزيت في الحليب لان زيت الزيتون ما فيه اي مواد تضر الطفل..

يجب مراعاة غسل كل قطع جهاز الشفط و تعقيمها و غسل اليدين و تعقيمهن قبل البدء بعملية الشفط للحفاظ على نظافة الحليب المشفوط و سلامة الطفل ..

اتمنى أنكم تستفيدون من هالمعلومات .. و بالعافية على قلوب كتاكيتنا الحلوين