مقادير عيش الزركش- حشوة اللحم -بالصور طبق اماراتي

.. السلام عليكم ورحمة الله وبركاته ..

.. خواتي سامحوني لاني اتاخرت عليكم بالطريقة ..
.. هذا الرابط القبلاني ..
https://forum.uaewomen.net/showthread.php?t=580904

.. عيش الزركش ..

.. المقادير ..
.. عيش على حسب المقدار اللي تستخدمونة في البيت ..
.. 2 حبة مسمار + 2 حبة هيل + عود قرفة + 2 باكيت صغير زبدة المراعي + ملح ..
.. كوب ونص زركش .. ( غسليه وودنيه في الماي نص ساعة وعقب نشفيه عن الماي )
وقبل ما تحطينه على العيش حطي شوي زبد في التاوة وخلطيه دقيقة في الزبدة ( هاي الطريقة الايرانية الصحيحة )
.. كوب ماي ورد وملعقة صغيرة زعفران ..

.. الطريقة ..

.. طبعا لازم تغسلين العيش عدل ، وعقب حطي الماي وحطي فيه كل المقادير ما عدا العيش لين ما يفور الماي وعقب حطي العيش ،
يباله تقريبا من عشر دقايق لين ربع ساعة بس ..

وعقب اشخليه واهنيه حطي عليه الزركش
وخلطيه بالملعقة الخشبية ام ثلاث صبوع عسب حبة العيش ما تتكسر وشوي شوي
( هب الضرابة خخخخخ )

ويوم بتشوفين الماي نشف منه عدل رديه في الجدر عسب يتسكر ..

وقبل ما تغطين الجدر صبي عليه كوب ماي الورد المنقع فيه ماي الزعفران ..
………………………..

.. لحم الحشوة ..

.. المقادير ..
..لحم مفور بالماي ولازم تحطيله نكهات ( 2 حبة مسمار + 2 حبة هيل + 1 عود قرفة + ملح + 2 حبة فلفل اسود )
دال مغسول ومفور في الماي ومشخول ( شرات اللي في الصورة )
بصلتين + 2 صلصة + 2 طماطم + حزمة كزبرة + حزمة يليلان + 2 ملعقة صغيرة بهارات عربية
+ ملح + 2 لومي يابس + 2 فص ثوم مهروس + ملعقة صغيرة زنجبيل مهروس )
( مقدار فنجان او كوب ماء حسب الرغبة )

.. الطريقة ..

.. نقلي البصل لين ما يميل لونه للبني ثم نضيف الثوم والزنجبيل + الصلصة + ونحمسهم لمدة 3 دقايق
نضيف البهارات والملح ونخلطهم
ثم الطماطم المقطعة وحزمة الكزبرة واليللان واللومي اليابس وخليهم شوي على النار لين ما يختلطون عدل ويتجانسون
وعقب نضيف الدال ونخلطه بالملعقة الخشبية عسب ما يتكسر
ثم اللحم ونخلطة بعد
ان كنتي حابة يكون شرات اللي انا مسوته ضيفي فنجان الماي ، ان بغيتيه ناشف شرات حشوة الاعراس لا تضيفين اي سائل بالمره
وسكري على الجدر ( خليه خمس دقايق على نار خفيفة )
وعقب ابتدي الغراااااف ^___^

.. هني وعافيـــة على الجميـــع ..

………………….
تبون بعد طريقة الدال الهندي ؟!؟!؟!