السلام عليكم ورحمة الله وبركاته ..
ربما موضوعي طويل وقد يغضب الكثيرات .. ولكن كل كلمه قلتها فيه كلمة حق وأنا محاسبة أمام الله
على كل حرف ورد فيه … فعذرا على الإطالة .. وأطلب منكن التريث وقراءته للأخير…
معلمتي الفاضلة …..
كم أحن إلى صوتك الحاني وكلماتك الطيبة الني تركت آثارا أطيب في قلبي وشخصيتي
وكم يصعب علي نسيانها ….
لم تكوني في يوم من الايام مجرد مدرسة تلقي بما في جعبتها من حروف وكلمات مترجمة إلى مناهج
محشوة بكل أنواع المعلومات المفيده والغير مفيدة في عقولنا …
لا بل أنت معلمة أعطيتنا من قلبك ومن روحك …
معلمتي كل ماأملك في يومي هذا هو دعاء يومي مني إليك بأن يجزيك المولى خيرا ويثيبك خير الثواب عن
ماقدمتي لي ولزميلاتي ولكل من تركت فيه أثرا ..
وتحية موصولة لمدرسات أبناءنا وبناتنا الفاضلات الخيرات … والمحبات للخير كحبهن لأنفسهن ..
وكلمة شكرا تعجز عن ايفاءهن حقوقهن …ولكن شكرا وشكرا …
هذه مقدمة أحببت أن أبدأ بها موضوعي …
مالذي تغير في زمن درسنا فيه نحن إلى زمن يدرس فيه أبناءنا الآن ؟؟؟
ماذا أصاب المعلمات في هذه الأيام ..؟؟ طبعا موضوعي لا يشمل كل معلمة فاضلة مازالت روحها
الخيَرة تعطي وتعطي .. بكل حب وود … ولا يشمل كل معلمة … وضعت الرحمن نصب عينها …
وهي على يقين أن كل تصرف وكل كلمة تبدر منها تمر على رب العالمين قبل أن تصل إلى مسامع أو مرأى من أبناءنا أي طلابها …
أكتب موضوعي وأنا متألمة لما أرى من تصرفات غير سوية من بعض المعلمات والله أني أرأف لحال
ابني وأقول في نفسي كيف يتحمل ابني هذه الساعات السبع تقريبا التي يقضيها في المدرسة مع وجود
معلمات من تلك النوعية ؟؟
والله أني أقوم بتوصيل ابني للمدرسة صباحا وانتظر نهاية الدوام بفارغ الصبر لأرجعه البيت …
نحول ع العامية … وعذرا مني على الجمل التالية …
انتو أغبى صف في المدرسة …
انتو ماتفهمون شي …
انتو أسوأ صف بين كل الصفوف ماشفت صف شراتكم …
مدرسة تفر ولد بالمقلمة واخرى ترفس درج الولد وتخلي عيالنا من الروع مايرومون يتحركون ..
مدرسة تربية إسلامية تفرالكتاب في ويه الطالب ؟؟؟
تخيلن ولدي يقولي اميه هذه كيف معلمة تربية إسلامية ؟؟
اميه انتي دوم تقولين لاتفر الكتاب هذا فيه اسم الله وكذا وهذه تفر كتاب التربية الاسلاميه وفيه قران ؟؟
مدرسة يوم يقولون لها اليهال او الطلاب مافهمنا عيدي الدرس تاكل اليهال ؟؟ وانت ليش مافهمت اكيد مب مركز
مدرسة غير البغيم ماعندها .. حتى اني قلت لولدي اميه اذا ردت تباغم حط ايديك على اذنيك واسكت ..
و مواقف غريبه وعجيبة للأسف …طبعا هذه أمور استوت من اول السنة هذه …الين اليوم
إذا قلت مدرسة اوثنتين بقول شي طبيعي هاالتصرفات من بعض المعلمات لان هذه الطبيعة البشرية
فيها الصالح والطالح أما يوم العدد يتعدا الاربع والخمس ولا اكثر في المدارس الثانيه ..مالهن بارظ
يدرسن ليش يدرسن ؟؟ ولا السالفة سالفة راتب وبس ؟؟
يامدرسات الولد هذا اللي تدرسنه لو ماتوجهين او العقاب او الرمسه له ولا تقصدينه بالرمسه
يتأثر …
عيالنا من شوي كرهوا المدارس ؟؟؟ ولدي يقولي اميه المدرسه الفلانية قلبها أسود وأم ربيعة تقول ان ولدها
ياها يقول ان المعلمه الفلانية نفسها ماترحم …
كيف ترضى معلمة على نفسها ان اليهال يرمسون عنها بهاالطريقة ؟؟؟ ياترى شو اللي انتي توصلينه
لهم ؟؟ وشو اللي يحس به تجاه معلمة المفروض الولد يحبها ؟؟؟
وحده من المدرسات في مدرسة ثانيه تباغم على وحده من الامهات خوديلي حقي من بنتك خديلي حقي
منها ؟؟؟ عنبو شو الجريمة اللي مستونها هاالياهل ؟؟
منهج يعله ماوصل نفاد ينفده لكن وين الرحمة وين أخلاق دينا وبيئتنا اللي تربينا عليها ؟؟
خواتي اتقين الله في انفسكم وفي عيالكم … لنا لو ماهتم بولدي وبناء شخصيته ونوعية العلم اللي يتلقاه
جان ماهتميت المهم يدرس وخلاص بس لا ياخوات الاخلاق اهم من اي شي …
يوم طالب يبدر منه تصرف ما ينفضح في الاداره ويتعاقب والخ شو عن المعلمات …؟؟؟…
أنا نفسية ولدي تعبت من السوالف اللي يشوفها .. للأسف تي الوحده منا وتربي وتزرع في ولدها أسس وقيم
وينصدم بأمور غريبه للأسف بقول امر طبيعي لو ظهرت من الاولاد لانهم يهال ويتعلمون من الكبار ..
لكن من معلماته ؟؟؟ اللي المفروض يكونن قدوة …
ماحد يقول ضغوط والخ ماحد خالي من الضغوط … بس الكبير الفاهم العاقل غير عن اليهال
اليهال اللي يتلقون من المعلمات ومب العكس ..
ياأمهات لعيالكم حقوق لاتهملونها وعليهم حقوق بعد لاتهملونها وفهموهم اللي لهم واللي عليهم ..
رسالة إلى كل معلمة فاضلة …حبي اليهال اللي تدرسينهم وعطيهم من الخاطر بتشوفين المقابل كله حب
وحب للعطاء والمنافسه الطيبة …
أنا كولية أمر شو ابا من المعلمة غير انها مثل ما انا اعلم ولدي بشكل يومي ان يحترمها ان تحترمه ..
ويذاكر مادتها ويهتم بحصتها … ابغي مقابل وهو المعاملة الطيبة وتحبيبه في المادة ..
وين البيئة الجاذبة اللي ترمس عنها وزارة التربية والخ ؟؟ أتمنى من الوزارة ومجالس التعليم ان
تعطي المعلمات دورات في فن التعامل مع اليهال … قبل ماتعطيهن الرخصه للتدريس ..
وهذه رسالة أقدمها للأمهات …
حرام والله هااليهال محتايين توجيه بشكل يومي مب الوحده تطرش الولد المدرسة وتصادفه امور وتصرفات
من ربعه ومعلماته يتلقى كلمات غريبه عليه وعلى البيئة اللي تربى فيها وجهوا عيالكم بشكل يومي لأنهم أمانة
والله بيحاسبنا عليها …
حرام وربي انا اموت قهر يوم اعرف ان معلمه ضربت ولد او غلطت عليه اقول لولدي انا ماروم
ارمس ماروم اسوي شي هله لازم يتكلمون بس اكون متقطعه على هاالياهل …
ياأمهات بسكن رقاد .. سولفن ويا عيالكن عن المدرسه عن مدرساته …لازم يكون بينكم حوار .. وتعليمه
الصح من الخطأ ..
والتوجيه ثم التوجيه ثم التوجيه …
كلمة أخير لكل معلمه … كلنا بنوقف بين ايدين رب العالمين وكلنا بنتحاسب
على كل كلمة وتصرف يظهر منا …
سواءا مني انا كأم امام عيالي او انتي يامدرسه معلمة الأجيال أمام عيالنا …
فلنتقي الله جميعا فيهم …
وكلمة أخيرة … انتي تقولين الكلمه ووتنسينها لكن رب العالمين ماينسى …
وارحموا من في الارض يرحمكم من في السماء …
قلت البعض في اول الموضوع … وقلت ان الطبيعة البشرية فيها الطالح والصالح يعني لو الكل بعد مثل هاالنوعية
جان محد تعلم وشكرت في المدرسات الفاضلات اللي ماحد ينسى افضالهن الين يوم الدين …
وفعلا التواصل مع ادارات المدارس هو الشي الوحيد اللي نروم نسويه لكن قلت بكتب الموضوع من باب فذكر ..
سبحان الله عدد ماخلق في الأرض
سبحان الله عدد مابين ذلك سبحان الله عدد ماهو خالق والله أكبرمثل ذلك‘والحمدلله مثل ذلك
ولااله الاالله مثل ذلك ولاحول ولاقوة الابالله العلي العظيم مثل ذلك
والله يسامحنا اذا غلطنا على اولادكم
يليت تسمعون المعلمة مثل ماتسمعون لليهال
والراتب اللي تقولين عنه ؟؟؟؟؟؟؟؟؟
ما يسوى التعب اللي نتعبه ……..شوفي رواتب المؤسسات الاخرى وبعدين احكمي ؟؟؟
الله يحفظ طالبتي ويوفقهم في اختباراتهم ويجعلهم ذخرا لوالديهم ولوطنهم ان شاء الله
وليس ذخرا لمعلماتهم
سبحان الله عدد ماخلق في السماء
سبحان الله عدد ماخلق في الأرض
سبحان الله عدد مابين ذلك سبحان الله عدد ماهو خالق والله أكبرمثل ذلك‘والحمدلله مثل ذلك
ولااله الاالله مثل ذلك ولاحول ولاقوة الابالله العلي العظيم مثل ذلك