مجبوس دياي ولا ألذ جربيه وادعيلي (وصفة سهلة) بالصور من مطبخي

طبعا كالعاده سرقت عن الوالده الله يحفظها وصفة مجبوس الدياي …
لانه مافي حد ذاق مجبوس الوالده الا وضرب بالخمس

صدقوني رغم انها وصفة سهله الا انه طعمها غني ….

نبدا بالمقادير وطبعا دعوة حلوة منكم للوالده بعد
– بصلتين صغار
– 4حبات هيل – 1 عود قرفه
– فصين ثوم
– حبة طماطم كبيره
– 1فلفل اخضر بارد
– قرن فلفل اخضر حار منزوع الراس
– 5عيدان كزبره
– دجاجه مبهره بفلفل احمر وكركم وبهارات (مقليه)

البهارات:
– ملعقة صغيره بهارات مشكله (انا استخدم بهارات ام عبدالله)
– نص ملعقة صغيره كركم
– مكعب ونص ماجي (ممكن اكثر حسب الرغبه)
– 3 حبات فلفل اسود – 3 حبات مسمار(قرنفل)

الطريقة :

نقلي الدجاج من الجهتين لغاية ماتكتسب اللون الصفر (اذا كنتي مستعجله ممكن تقلينها اكثر)

ناخذ ملعقة كبيره من الزيت اللي قلينا فيه الدجاج ونحطه مع البصل والثوم والهيل والقرفه في القدر ونقلب لغاية مايصفر البصل

نضيف باقي المقادير رقم (4-5-6-7) ونخلط عدل

نضيف البهارات والكركم وحبوب الفلفل الاسود والمسمار ومكعب الماجي ونقلبهم

وبعدين نضيف الدجاج نحركم مع بعض عشان يتغطون بالنكهة ونغطي عليهم ونخليهم ع نار هاديه لمدة 3 دقايق تقريبا

نضيف كميه من الماي تغطي الدجاج فقط ولا تزيدين اكثر (اذا كنتي مستعيله يفضل ماي مغلي)
نخلي الماي يفور على نار عاليه وبعدين نغطي عليه ونخليه ع نار هاديه وبعد 5 دقايق نذوق طعم المرق اذا يحتاي نزيد مكعب ماجي ثاني ولا لأ… ونخليه لمده 30 دقيقه بس

بعد ماتمر ال30 دقيقه نضيف العيش عليه واذا احتاج ماي زياده نحط بعد..

انا وضحت في هاي الصوره كم لازم تكون كميه الماي بالنسبه للملعقة الصغير

نغطيه بالقصدير ونخليه لمدة 20 دقيقه ع نار هاديه وبعدها نشيك عليه اذا خلص ولا لا؟

واخييييييييييييرا خلصنا ولله الحمد بس للاسف نسيت اصور الطبق الرئيسي …لان الربع اللي هم اخواني وريلي كانوا يواعه وحشروني …

صورت صحن اليهال بس بدون الدياي للاسف

والسموحه منكم …وبالعافيه عليكم واول وحده لها هالصحن والدياي عالحساب