متى السن المناسب لتعليم الطفل الحمام في الامارات

السلام عليكم
متى السن المناسب حتى يدخل الطفل الحمام وينظف من البامبرزانا عندي بنتي ماشاء الله عمرها سنتين وبعدها على بامبرز فشو نصايحكم ؟
وبعد ماتحب تاكل حتى لو اغصبها ترفض وعطتها فيتامينات وفاتح شهي وبعد ماشي فايدة فشو الحل وجزاكم الله خير

أحس هالفتره مناسبه لانا في الصيف انا شريت لولدي الحمام عشان يتعود عليه بس المشكله عقب ما يخلص يقول لي ماما كاكا هههههه ما شي فايدة

وعن الاكل الغاليه اكيد بنتج تحب وجبات معينه مثلا ولدي يحب المعكرونه اكثر شي سوي لها اللي تحبه شي بعد نقت مال الاطفال حلو وحتى البطاطس اليهال يحبونها بس لاتجبرينها على الاكل لانها اكيد تسنن والياهل في هالفتره ما ياكل
وشي في الصيدليه فيتاميات على شكل حلاوه مخصصينها للاطفال…

جزاج الله خير وما قصرتي ويجعلهم ذرية صالحة يا رب

احسن سن لترك الحفاضات قبل السنتين وتدريبها علي الحمام في هالفتره ومن يكمل السنتين ونص يكون تعودت وبترتاااح غثة اللبامبرز واللتهاباته والحين حرارة الجو…. هو اشوي معاناه لكن هي بترتاح وانتي بتحسين براااحه شعور مجرب والله

انا ولدي علمته بسن سنتين و8شهور والحمدلله ماتعبني لانه كاان فااهم

وعن الاكل شرات حالة ولدي ماياكل بس يبا حليب

جزاج الله خير وا ن شاء الله بدا ادربها ومشكورة

عزيزتي على حسب الطفل
بالنسبه لبنتي سألت الدكتور وقالي تبتدين معاها من سن السنه .
السبب لان بنتي بدت تخطي في سن السبع شهور ومشت عدل وعمرها 8 شهور ..فابتديت معاها من عمر السنه بالتدريج ولين كملت السنه والأربع شهور تقبلت الأمر تحت رقابتي مثلاً
يوم تقوم الصبح أعق عنها البامبرز وأغسلها وألبسها الأندر وير وبعد ما أريقها على طول أوديها الحمام ولو تأخرت دقيقه الأخت تروح غرفة ألعابها تسويها في ثيابها وراء الباب .
((طبعاً كانت بنتي في سن صغيره فاا الدكتور سمحلي بأني ألبسها بامبرز يوم بترقد بس طول اليوم بدونه)) .
سألت الدكتور ليش تسويها في ثيابها .. قالي بالنسبه للطفل وفي سن بنتي أمان له في شي لابسه مش في (مكان مفتوح مثل الحمام عزكم الله ).. فاا قالي أنتي يوم بتخلص ريوقها على طول وديها ووغسليها وحطيها على الحمام لاتتأخرين دقيقه ..وكنت أغسلها بعد الريوق وأقص عليها قصه أشتت أنتباها وأحطها على الحمام وأقولها خلصي يله علشان أكملج القصه وفديتها تخلص وأصفقلها وأقولها أنها شاطره وأروح اتصل حق أبوها وأقوله أن شيخه خلصت من الحمام ويتكلم أبوها ويقولها علشان أنتي شاطره بيبلج يوم برجع هديه طبعاً الهدايا التشجيعيه كانت عندي في البيت جاهزه أشياء بسيطه مثل عصير أو جبس أو مصاصه أشياء بسيطه بس تكون بالنسبه للطفل كبيره وتعنيله الكثير .

وبالنسبه لبنوتج شوفي الطرق إلي تحببها في الحمام والتشجيع مهم بأنها كبرت .. والأهم أنج تمتلكين الصبر .. الصبر .. الصبر وعدم الصراخ عليها علشان ما تاخذ موقف من الحمام .
هاذي تجربتي البسيطه أن شاء الله أكون أفدتج .
وتمنياتي لج بالتوفيق عزيزتي مع بنوتج .