ما أقدر اكون جارية عندهم ،، بطلب الطلاق المومة و الطفل

انا تقريبا كانت عندي مشاكل كبيرة
كنت اسكت واييييييييييييييد بس طفح الكيل
اكبر غلطة سويتها اني رضيت اسكن معاهم

صارت معاي مشكلة كبيرة ما توقعتها
في بداية حياتي الزوجية شرطت بيت بروحي

بس عقب جفت ريلي ما عنده و قردني و قلت يالله ما يهون علي
بسكن في بيت اهل زوجي في غرفة و حمام في الممر
هذا الممر كل حد يمشي فيه و ينسمع حسنا
صوتنا ضحكاتنا ضرابتنا ،،

المهم خواتي
كنت اشتغل و ادرس
الصبح دوام و العصر دراسة
حنة ام الريل ما تخلص يوميا تحن و تزن علي
و ابو ريلي من صوب ثاني
واييييييييييييييييييد يتحكم في طلعاتي و دخلاتي

مرة سواها و وقف يدامي قال لي ايلسي ف البيت اليوم لان عمتج طالعه و الخدامة بروحها
انا بروح الجامعة عمي ما اقدر و انت موجود ف البيت
و وقف يدام الباب مب رايمة اطلع
مب مشكلة ابو ريلي اقردنه بالكلام الطيب الحلو و يكون معاي غالبا لو انه يتحكم

طبعا غير ام ريلي و حنتها اليومية

زوجتك تطلع ما تستأذن ؟
زوجتك كله تروح بيت امها ؟
زوجتك ما تطبخ و تمش ايدها ف الطوفة ؟
زوجتك تمر وما تعبرني ؟

والله كله جذب و تلفيق

والله اني من افضى ع طول ف المطبخ لو ما اطبخ احط السفررة
لو ما اطبخ بشتري لهم احلى و اغلى عشاء
الهدايا والله خاتم ذهب و مخاوير و عطور كل فترة
ما قدرت عليها
تفداهم الفلوس مو مشكلة

بناتهم يلسون و يمشون ايدهم ف الطوفة

جفتوا عروس وما عندها وقت ل ريلها
هاي انا
ما كملت اسبوعين ف بيتهم و يوميا ع ها الحال
بدل الخدامة عندهم 2

سافرت شهر العسل كل يوم تتصل ف ريلي
والله عسل ع قلبي مو مشكلة
بس تسـأل ردوا بسرعه ليش تخسر و ليش حاجز

بناتها بيسافرون عادي
بناتها بيسكون في بيت بروحهم من حقهم
هي كل 4 شهور تزهب شنطتها و تسافر ومن فلوس ريلي مو مشكلة تفداها الفلوس
بس انا و مرت حمي نفس البشاكير
والله حتى البشكارة ما تعاملينها بها الطريقة كأنها جارية

و الريل سمنديقة ولد امه
و ايى عندي بعصبية

والله اني كل يوم اندم اني تزوجت ليتني ما تزوجت ليتني ما حملت
ليتني اجلت الحمل
شو ذنب اللي ف بطني انفصل

قلت سبحان الله يمكن ها الطفل يغيره

لدرجة اني من ارد من الدوام ما احصل اكل
مع اني ادفع للخدامة من تحت ل تحت عسب تساعدني

خلاص من ارد من دوامي اطلب لي اكل و اكل بروحي ف الحجرة

طبعا ما خلتني في حالتي

لين ما صار اليوم اللي ما توقعته كنت حامل في الشهر الثالث
يى عندي بعصبية و صار صراخ و ضرابة
كنت ف الحمام ارجع
لاني ما احب العيش و هم يغصبوني اكل عيش ؟؟؟
و بالعكس ايلس ع السفرة معاهم من باب المجاملة و اكثر من اكل السلطة و شوية دياي خالي و عقب انجبرت اكل شوية عيش و اقوم
صوتنا واصل واصل لين الصالة

قلت له حدك حدك كله ولا كرامتي … بأكل اللي ابغيه
و انا مب خدامة اطبخ لكم كل يوم
بدل ما تقول امي الغالية الحرمة مسكينة تعبانة و حامل خفي عليها و تتوحم
غصب اكل
بدل الخدامة خدامتين و الخوات يمشون ايدهم ف الطوفة و انت تدفع لهم مب قاعدين ببلاش
و يوم اطبخ تروح تطبخ اكلة ثانية !!! شو تغار

يعني لا تخليني اطبخ ولا تخليني ما اطبخ شو تبغي اذبح عمري
وانا عندي ولي امر مب ملزومة استأذن من عمتي و عمي كل يوم
انا حرمة عندي شغلي و دراستي و مب فاضية لها الحركات
و امي ازورها مرة في الاسبوع فقط

لو سمحت ناوي تكسرني و تنزل قدري عند اهلك ما بتم دقيقة
وانا ما بتم وياك و الولد انا بربيه ما بخليك تشوفه ولا تسمع حسه

تصدقون استانست ع الكلام اللي طلعته ارتحت نفسيا
ريلي مصدوم اول مرة اهدد و ارد دومي الحمل الوديع
زهبت اغراضي
و عمتي حاطة اذنها ع الباب كل العادة

فتحت الباب بقوة و قلت ها جفت عرفت ليش كل سوالفنا عندها و عقب اتي عندي و تقول لي انتي تنشرين اسراري !!!
المصيبة تروح عنده و تقول له ام ميره خبرتني
الله وكبر امي حرمة عوده و هي اصلا ما تتواصل معاج ليش الجذب

قلت له جوفوا
عاملتوني معاملة الجاهلية
انا بنتكم مب عدوتكم ليش ها الظلم
الصبح دوام و العصر دراسة ما ارد الا الساعه 9 المساء
حامل و كل يوم ارجع و متوحمة و حالتي حالة يدام الموظفين و الموظفات و الطلاب
اجازتي جمعة و سبت حاسديني ع ها الاجازة اللي ارتاح فيها
و الجمعة ادق علي الباب الصبح شو تبغي فيني حتى رقاد ما ارقد
تراي بساعدها ف المطبخ مب من الساعه 8 الصبح

متى اذاكر تراني اذاكر ف ها اليومين
متى بزور اهلي الا هو مرة وحدة ف الاسبوع و مرات ما اروح
متى ايلس وياك و اطلع و استانس

تبغيني بيت بروحي
ما تبغي تأجر لي شقة
ورقة طلاقي توصلني مع النفقة

شليت الشنطة و رحت بيت اهلي
طبعا لو عمة ثانية بتراضي مرت ولدها بس هاي لا والله تبغي الفكة
و تبغي ولدها ف جيبها و تبغي فلوسه بس

طرشت له مسج
قلت له من باب ما اطيح من عين اهلي خبرتهم ان عندكم دورة جمن يوم
تبغيني ارتاح ابغي شقة بروحي
وما عندي اي كلام ثاني

و انتهى الموضوع عند ها الحد
طبعا سوالي طاف
مب لانه مقهور مني

لانه امه تقول له لازم هي ترجع البيت
و ما يبغي يكسر كلمتها ابدا

قررت انفصل

استغفر الله لو يبغي يشتر لي هدية انا متوقعة بيقول لها
ع سفرة ع حجز فندق ع اي شي
يوم يحجز فندق يروح يخبرهم قبله باسبوع ليش انزين تخليها تعصب و تعور قلبها
خبرها ف نفس اليوم عسب لو عصبت يوم واحد بس

مب اسبوع كامل تدعي علي

و لين الحين لا سأل ولا شي
انا قررت اطلب الطلاق خلاص عفته لوع جبدي
انا ريلي ما يقصر علي حتى وانا اشتغل يعطيني مصروف
و يطلعني و يوديني
بس كلما انطلع ويا بعض من الحجرة تتحرطم و تدعي و حالتها حالة
لو بنسافر نفس الشي
بناتها دوم يسافرون

بس تعبت
ولد امه بالقووو كل شي ياخذ رايها ف اشياء تخصني
دخلت اخوي ف الموضوع بس خبرته ما يخبر لا ابوي ولا امي
و قال له هي طلعت من البيت و هي ترجع
و امي كبيرة ف السن عسب جي ما خبرتها اخاف اتييها جلطة

طرشت له مسج قلت شو صار بموضوعي
لو ما عندك ماديا رقبتي سدادة انا بدفع انت مب مقصر وياي ف شي
و اخوي عرض عليه يأجر لنا ع حسابه سنة هدية ما رضى

السالفة سالفة عناد و يبغي يمشي شور امه ع حسابي

قررت اروح يوم الاحد و ما ابغي صلح خلاص
قلت بعطي نفسي فرصه ثانية لين يوم الاحد عل و عسى يفكر يسأل

انا غلطانة اني طلعت
بس تعبت من المعاملة القاسية
تخيلوا ترمس ف التلفون و تقول ل ربيعتها انا بناتي يلسون ف بيت بروحهم
وانا يالسة عندها

لو غيرة و كلام بستحمل عادي حرمة كبيرة
بس توصل انها تجذب !!!!
يعني كلامها و افعالها و تحرطيمها زيادة عن اللزوم
ليش تخربين بيتي
ليش زوجتي ولدج يوم انج تبغينه حقج بس

حسبي الله و نعم الوكيل