القوم (وإنتوا إفهموها) وقرت البزنس كارد وجلبتها وطالعته بنظرة إحتقار ونشت من مكانها ويابتلي البزنس كارد قلتلها لو وحده غيرج كانت بتيلس تقبل وتطلب منه هدايا وتستغله قالت أعرف بس مايهمني..وهي وياي تدرس مسائي فالجامعه لاحظت من فتره إنها متغيره ودوم سرحانه قلتلها شو فيج كأن شي مستوي وماتبين ترمسين قالت صح إنتي تعرفين من قبل إني لايعه جبدي من هالرياييل ماظن إني أقدر أتحمل ثقالة دمهم في كل مكان في الدوام ولا في الجامعه وماظن إني حتى بتحمل حتى ريلي ما بيناسبني غير المعرس..قلتلها شو قصدج..جان تقوللي أنا تقدملي واحد معرس يستوي من أهل وحده وياي فالدوام وشافها وأقتنع فيها وأنا أبا ريال أحس به صدق مسؤول هذيله مب مالين عيني و أنا أبا أعرس وأييب عيال لكن شكلي بكون زوجه ثانيه..قلتلها كيف يعني. قبلتي فيه خلاص شفتيه ويلستي وياه.؟ تقول اخوانها سألو عنه وطلع محترم وريال وتقول كلمته وشفته شخصية وكبير وفاهم هو عمره سنه39 مب من هالاشكال اللي أشوفهم و أنا بقبل فيه لأني مابا أتحمل مسؤوليته 24 ساعه أولا وثانيا لاني أعرف نفسي لو يلست وياه 24 ساعه بمل وبتبتدي المشاكل عشان جيه أنا فكرت أن ما بيناسبني أكون زوجه أولى وكل الشغل والهم والمسؤوليه ع راسي أنا لاني وايد أحب أشتغل ووظيفتي أهم عن ريلي الريل بيروح وبيه يوم بيمل وبتستوي الحياه ممله ورتيبه وايد وأنا وحده وماعرف بس أيلس فالبيت عشان أييب عيال واكون ربة بيت ها مموول مب ستايلي ودام حصلت واحد زين وبيتقبل هالشروط بقبل فيه…ما عيبني كلامها بس مب عارفه أرد عليها أل فهمته إنها تفضل الريال المتزوج لاانه عنده مسؤوليه أكثر وبعدين ما بيتم وياها دوم وهي بيتم عندها وقت حق أشياءها الثانيه سواء دوامها أو دراستها أو يلستها في بيت اهلها لانها ما تعرف ولا تقدر تتفرغ حق شغل البيت وأهلها بيساعدونها…قلتلها بس هاه باب مشاكل ويمكن تبهدلين الزوجة الأولى..قالت أنا مابهدم بيت حد ولو تباني أرمسها واقولها هالكلام بنفسي ماعندي مانع وأنا ماسرتله وقتله فكر فالزواج..الريال روحه من نفسه يبا يعرس..وقلتلها إسألي شو سبب زواجه ليش يبا يعرس..تقول سألوه وقال مافي سبب معين هو يبا حرمته وبيتم وياها لاان ماخذنها من أيام كان عمره 20 وهي نفس عمره و بس حاب إنه يعرس ويشوف نفسه قادر..قلتلها إستخيري أكثر وهي بعدها تستخير بس ماعرف أنا مابا أقولها لا لانه معرس وبعدين تفوتها الفرصة ولا أبا أخرب عليها وتقول إنتي تغارين لانج ماعرستي وتتمنين..محتاره أبارك لها ولا أحاول أقنعها بأن الفكره غلط..عطوني آرائكم
بس دام انه وحده عمرها 30 يعني صعب بالعمر تحصل نصيبها واذا هو ريال اوك ما يعيبه شي وبعدين اذا ما خذها هي بياخذ غيرها
شوفيها لو كانت زوجه ثانيه
يمكن اولى قصرته بشي
او يريد يتزوج بعد ثااانيه
اشوف موضوع عادي بصراحه
واهم شي تستخير ربها
ويمكن نصيبها هذه ربيعتج في الدنيا تاخذ واحد معرس
وبعدين مب هي الي ياابته اهو الي ياااا
امم بصراحه ألحينه هي اتقول جي .. بس باجر بتغير كلامها يوم بتحبه و بتحس بالغيره .. وبعدين خلها اتفكر في زوجته ..
والله يكتب اللي فيه الخير ..
..
^
فعلا انا حاسة بعد انها باجر بتغير كلامها
لما تصير زوجته و تحس بالغيرة و غيره من مشاعر
ولما يصير عندها بيبي وتبدا تخاف عليه وعلى مستقبله و حياته
بيصير في شي أهم من شغلها و وظيفتها هاك الوقت
لكن في كل الاحوال، خليها تصلي استخارة
مبونه التعدد مب حرام ، واذا هذا نصيبها محد يقدر يمنعه
لكن انصحيها بالاستخارة وشوفوا شو يصير
موفقة