السلام عليكم ورحمه الله وبركاته
انا حبيت احط تجربتي مع الكراتين بعد ما شفت الاخوات اللي حطن تجاربهم بعد
كانت الحرمه اللي تسوي الكراتين مصريه وطبعا اول ما دخلت تقولون يايه اخطب من عندهم الترحيب والكلام اللي يخلي الواحد يطير بالسماء سالتها عن الكراتين وقالت لي ان هي عندها شهاده بهذا المجال ويلست تمدح لي بشغلها وان مافي احد يسويه شراتها اتكلت على الله وقلت لها شوفي شغلج ( انا طبيعة شعري جاف ويتساقط واكيد متقصف) المهم بعد ما شافت شعري قالت لي بسويلج بـ1000 قلت لها ليش قالت لان شعرج يباله علاج ومادري شو ومن هذا الكلام اللي ماخوذ خيره
المهم انا كنت رايحه لها تقريبا على الساعه 1 الظهر طلعت من عندها تقريبا 6 المغرب بس الشعر كان سايح وشكله وايد حلو وانا طايره من الفرحه طبعا وصتني اني ما اقرب من الماي ولا اربطه لمدة ثلاث ايام.
لما رجعت البيت اختي تخبلت على شعري قالت لي لازم باجر توديني وراحت ونفس النتيجه كانت لاختي ( طبيعة شعرها دهني ومتقصف)
استمرينا على هذا الحال مدة سنه كل 6 شهور نروح نسوي ( طبعا كنا نعتني بشعورنا لما نرجع البيت حمامات زيت ومادري شو )
بس المأساه صارت قبل عيد الاضحى 2024 بيوم رحنا لها والله يا بنات ان شعورنا كانت ولا اروع مغسوله ونظيفه مثل ما هي تطلب (ان نغسل الشعر وبعد ثلاث ايام نسوي الكراتين )
كان الصالون عندها وايد زحمه قلنا لها خلاص بنرجع لج بعد العيد بس اصرت ألا نقعد المهم سوت لنا بس اول ما حطت الكريم بالشعر قلت لها ان ريحته مب مثل قبل وبعدين يحرق قالت لا نفس الشي انتي بتعلميني شغلي وانا من سنه اسويلكم
بس ليتني وقفتها تعرفوا لما راحت تغسل لنا شعرنا والله خصل تطيح مع كل قطرت ماي قرعتنا بس انا شعري طاح من النص اختي شعرها طاح من الجدام لنص الراس يعني قرعه قرعه قعدت تقول لنا اكيد انتوا كنتوا حاطين شي بشعركم علشان كذيه طاح قلت لها نحن مب حاطين شي وغير هذا مب انتي الخبيره كان لازم تعرفين اذا نحن حاطين شي ولا لأ
ظهرنا من عندها ركضه على المستشفى لان اختي انهارت كانت ماسكه شعرها بأيدها وتصارخ بعد الفحوصات قالوا ان فروة راسها احترقت لانها الكريم كانت مدة صلاحيته منتهيه + انها خلته مدة طويله بالشعر- وترقدت أختي بالمستشفى مدة اسبوعين.
وهذي مأساتي انا وأختي مع الكراتين
بس الحمدلله مع العلاج طلع لأختي شعر جديد قوي والحينه واصل لحد كتفها بس رفعت شعار (لا للكراتين بعد اليوم)
والسموحه على الاطاله
الحمدلله على سلامتكم 
والله من فترة مترددة ابا اسويه وبنفس الوقت ما ابا مادري ليش !!
خلاص شكلي بهون الزم ماعلي شعري راس مالي ><
خطاكم السو حبيبتي
خلوا الكيراتين يولي اهم شي صحتكم..
و الحمدلله على سلامتكم
المشاركة الأصلية كتبت بواسطة ورد معطر 
الحمدلله على سلامتكم
والله من فترة مترددة ابا اسويه وبنفس الوقت ما ابا مادري ليش !!
خلاص شكلي بهون الزم ماعلي شعري راس مالي ><
خطاكم السو حبيبتي
مب شرط الغاليه يصير لج مثل ما صار لنا ( الله لا قال)
يعني نحن استمرينا معها سنه كامله مافي أحسن عنها
يبس كل شي قسمه ونصيب الغاليه
وتسلمين على الرد
المشاركة الأصلية كتبت بواسطة مشغوله خلوا الكيراتين يولي اهم شي صحتكم..
و الحمدلله على سلامتكم
الله يسلمج يالغاليه