كييييييييف هانت عليه العشرة وطلق المومة و الطفل

السلام عليكم
خواتي الغاليات عندي ربيعة غاليه عليه وايد قصتها أثرت فيه و حبيت الكل يعرفها
ربيعتي معرسه من ست سنين من واحد كان يحبها حب ماينوصف سوا المستحيل عشان يتزوجها لو أقول شو كان يسوي عشانها محد بيصدق المهم سكنها عند أهله ماتتوقعون صدمتها عيشتهم غيييير إختلاط و الكل ماخذ راحته تبين تعيشين وياهم ويحبونج نافقي و جاملي وإنسي شي إسمه عيب و حرام المسكينة ماعرفت شوتسوي غير إنها اتسواللي تشوفه صح و حلال مثال كل يوم الصبح لازم تسلم على خوانه الشباب ( تخاشمهم ) مب بس خوانه حتى عمومته وخواله شورايكم؟
شو تتوقعون رد زوجها يوم إحتجت على إسلوبهم و إنه حرام إذاتحبيني و تبينا نستمر لازم تتأقلمين و ترضين سمعت كلامه ووافقت تعرفت أول أيام الزواج تستوي خلافات بسيطة لأنهم ممب في بيت رواحهم ياما صارتلها مشاكل بسبب أهله أمه ماكانت راضيه كانت تباله وحده من أهله و شكلها ماخذه عهد على نفسها إنها ماتخليها تعيش بسلام أناقريبه وااايد منها والله اللي ياها منهم محد يصدقه شافو ولدهم يموت فيها إتهموها إنها ساحرتنه سارو واتأكدو و هي تعرف صابره إخته شافتها لابسه موديل حلو قالتلها عطيني لبسج بسوي مثله تخيلو شلت اللبس وحطته في غرفة أخوها تعرفون عشان يشك في حرمته وماخفي كان أعظم المهم صبرت على هالمصايب و الشاكل لأن اللي مصبرنها حبه لها صدق كان فيه عيوب يعني يجذب عصبي متسرع يمل بسرعه تخيلو مايوديها السوق إلا في السنه حسنه دوم يطرش أبوه و إلا إخوانه وحتى المستشفى خمس سنين عاشت وياه محبوسه في البيت لا رحلات و لا طلعات أهله دوم يسافرون وهي عمرهم ماشلوها ولا هو بعد شلها ماتتخيلون مقصر في حقها واايد لبسها عادي وأغراضها عاديه بس صبرت لانه يحبها والاهم الله رزقها في هالخمس سنين طفلين ياما واجهتهم صعوبات و مشاكل لو يبل طاح بس تحملو و عمرهم ماطرو الطلاق لين السنه السادسة فجأه طلعت في حياتهم وحده من أهل أمه ومن دخلت حياتهم من سنة وربيعتي عاشت في جحيم تغير ريلها 180 درجه بما أن هذي الحرمه تقرب لأمهم و هي أرمله و واااصلة و معروووفه تعلق فيها الريال نسى الحب الزوجه لعيال همه الوحيد يغري اللي أونها خالته سوا المستحيل عشان يثبتلها حبه أقصد حب فلوسها و واسطتها و معارفها الله يرحم ريلها كان ريلها شيبه و ماخذ قبلها حريم و عندها منه عيال والاخت تبا شباب يعوضها بس للاسف على حساب هدم أسره و تشتت أطفال و المشكله هي عاشرت حرمته المسكينه و ماكله و ياها على قولتهم عيش و ملح هذي يزا لحسان حرمته صغيره و متعلمه و حلوه و يلستها ماتنمل واللي يشوفها يحب ييلس و ياها و الكل ينجذب لها و الثانيه في لربعين و أرمله و عندها عيال ومافيها زود يمكن لسانها اللي يتفدا كل من هب ودب وكل شي فري عايشه حياتها بالعرض و الطول المهم بسبتها طلق حرمته المره الاوله بدون سبب و يمكن بعده لها مكان في قلبه ردها حياتهم كلها مشاكل بسبت هذي الدخيله دومه عندها في بيتها دوم يكلمها في التليفون يوم تضيق حرمته يقولها خالتي بس هي في الأساس مب خالته المهم طلع كلام وايد عنه و عنها وبما أنها أرملة واحد واصل و معروف يعني وارثه عطته و صرفت عليه وسوت المستحيل عشان يكون لها ماستحت صارت علج في حلوج الناس هي وياه تخيلو ياخذها لين عزبته و تبات وياه مرات بوجود إخوانه و مرات رواحهم وخبرهم في كل مكان حتى دريولها و خداماتها يرمسون عنها المهم يوم عرفت حرمته تخبلت كل يوم تتشاد وياه عشانها كل شي واضح بس هو ينكر المهم حرمته حددته توصل الخبر حق أهل ريلها المرحوم وأكيد وصلها التهديد تعرفون شو سوا عشان يرضيها طلقها للمره الثانيه شرشح أم عياله اللي بالحلال عشان خاطر وحده راضيه إنها تعيش وياه بالحرام أو بسر بس عشان ماتخسر عيالها وورثهم بس للاسف مخدوعه تحسب الناس يحبونها ماتعرف إنهم يستغلونها
طلق حرمته للمره الثانيه وهي حامل في الثالث و خذ عيالها عنها بس بعد 15 ردها و ليته ماردها تخيلو عاشت ه 15 صياح وحزن و سهر ونزيف ثلاث مرات وصلت المستشفىالمهم ردها تخيلوعشان تردين لعيالج لازم توقعين على شروط و تعرفون قلب الام تعرفون 15 شرط ماتزور أهلها مايصرف عليها ماتملك هاتف مالها خص فيه وشروط غيرها تصدقون القضاه استغربو في انسان فيه ذرة خوف من ربه يحرم بنت من والديها و من عزتها و كرامتها المهم وقعت وإذا خالفت الشروط بيطلقها وبياخذ عيالها و مالها حقوق وافقت قالت بصبر يمكن يتغير فكرت إذا تطلقت منو بيربي عيالها وياها العيال مسؤوليه والأبو وجود مهم ويمكن يحن قلبه بعد ماتربي ويغير معاماته والله يهديه بس للاسف أول ماطلعها من المحكمه كان طول الدرب يكلم الدخيله اللي هدفها تيميع الشباب حولها وتخيلو 6شهور من ردها يبات في غرفه ثانيه مايكلمها إلا إذا يبا شي ماعندها تليفون ولا حتى في البيت سكنها في بيت خدامه لإخوانه العذابية ومن ردها ماكد ركبت وياه السياره إذاطاع تطلع السوق والا المستشفى ويا حد من الشباب من أهله حتى يوم ياها نزيف طرشها ويا اخوه مرت الايام لامصروف ولاطلعه من البيت لولا احترام لامن صغير و لا من كبير لأنه قالهم رديتها مربيه لعيالي بس في ه6 شهور كان إييها بسر إذايبا يعاشرها شوفو لين وصلت فيه النذاله يعاملها مثل بنات الشوارع بسر مايبا حد يعرف ويوصل الخبر عند حبيبة القلب صبرت وعاشت في هم وقهر والله العظيم ماكان لها احترام تصدقون إذاتبا اغراض من الدكان تطلع تتصل من بيت حد من اهله حتى من الخدامات تسلفت يوم احتاجت حتى اهله ماساعدوها ولا نصحو ولدهم مااعرف كيف تحملت هذا الذل و هو يعرف ان نقطة ضعفها عيالها المهم دخلت شهرها التاسع وهو لاحياة لمن تنادي رقادفي بيت هاييج اكل شرب يطلعها هي و عيالها ولا يعرف شي عن عياله وحرمته شوبيدها دومها مهمومه حزينه لااكل و لا رقاد نفس الناس و شغل وكراف كانت المسكينه مقهوره لو متزوج مب مشكله يعدل بس هي مب عارفه شو سالفتهم حب زواج بسر كل شي يدل إنه شي كبير قبل ولادتها بيوم ياها وطلع لها شروط يديده ويلس ينازعها و يصارخ عليها بدون سبب حرام رقدت وهي صايحه و منهاره والله قبي يتقطع عليها اليوم الثاني هي في المستشفى يتصلوبه تعال شل حرمتك يقول في الدوام و هو مطيح ويا العيوز تخيلو وين الريله يخلي واحد من اهله شاب يشلها لو ربت في السياره مافكر في هذا الشي بس اللي يبيع الحلال بالحرام شو تتريون منه وصلت المستشفى و تعرفون منو كان يترياها اللي مهدمه بيتها و ماخذه ريلها انصدمت شو تتحداها يايه لين المستشفى انقهرت حرااااام صرخت تحس إن الجنين مايتحرك معنه فيها ألم ولاده تيمعن الدكتورات سوولها صوره للاسف الجنين ماااااات صرخت صاااااحت بقلب محروق النور اللي تترياه ينور حياتها إنطفا ضاعت سعادتها اللي كانت بتنسيها كل الحزن و الهم ربت بنيه ماشفتها بس كانت جميييييله سبحان الله يوم شافتها نشفن دموعها وربي صبرها الحمد الله تتوقعون إن ريلها يوم قالوله الجنين ميت ماتاثر شي عادي حتى اللي كانو في المستشفى قالو بنته ميته وهو يالس يسولف ويسوي حركات للي مافقلبها رحمه ولا خوف من الله والدليل يوم طلبو يغسلون الطفله تكون وحده مسلمه وطاهر تبا الكل يمدحها تبرعت مع إنها ماكانت طاهره فيها ( الدوره) وطول المده اللي يلستها في المستشفى كانت طول الوقت هي وياه أمه يالسين رباعه ضحك وسوالف وأكل و المسكينه مالها حشمه ولاحسو بحزنها يتبادلون النظرات جدامها وهو طايح فيها مح ياويلهم من ربهم حسبي الله عليهم وامه عايبنها مب بنت خالتها وهي مب راضية ولدها ياخذ هالمسكينهمن البدايه المهم في اليوم الثاني ين الإستشاريات يعزنها وقالها الواضح إنج في فترة الحمل كنتي تعانين من ضغوط نفسية و حالة عصبية أثرت بشكل واضح على الجنين تضيق ريلها وسووله محاضره طويله عريضه بس اللي مايخاف من ربه مايخاف من الناس
طلعت الحرمه من المستشفى وكملت شهر و هو نفس ماهو لافقدان بنته أثر فيه ولا حرمته المجرحه اللي فاقده ضناها أثرفيه بعدشهر ياها وطلب منها يعاشرها رفضت لانها في النفاس اصر و تاكد إنها طاهره وعاشرها وقت الإنزال وقف قالتله عادي أنا ابا أحمل بسرعه عشان أنسا اللي صار و الدكتوره نصحتني أعجل في الحمل تخيلو القنبله اللي فجرها بكل نزاااله فلانه انتي يالسه عندي بالحرام أنا كيف ليش شو السالفه فهمني كل اللي سويته ماتذكرت و لا تكلمت هذا اللي ذكرك بالحرام فلانه أنا يوم وقعتج على الشروط حلفت في نفسي في خاطري إنج تحرمين عليه إذاخالفت شرط إنت من خمس شهور رمستي أمج في التلفون بس إنت ماشرطت ماأكلمها ما اسير عندهم شوفي البنت ماتت وانا سألت المفتي من شهر والحين تذكرت المفتي حرمج عليه إنت شوقلتله بالضبط يتهرب من الاجابه طرشلها حرمه من أهله تقولها ان فلان يقولج المفتي حرمج عليه و هو يباج بس طاح طلاقج سارت بيت أهلها ويا عيالها وهو سافر لاعد عليها الطلاق ولا طلبها في المحكمه ولا تعرف مطلقه والا أناربيعتها الروح بالروح إتصلت بمفتي وخبرته القصه من الالف لين الياء قال الطلاق مب طايح والافضل يشل الحرمه ويسيرون عند المختصين وبيلقولهم مخرج إنشاء الله
شورايكم بالقصه والله العظيم صادقه في كل كلمة أرجوكم ساعدوني أو انصحوني كيف اساعدها هي محتاجه حد يساعدها و ينصحها و خاصه إنها موقعه ورقه المحامي يقول مب معترف فيها بس اللي خربت حياتهم عندها معارف اللي ماتخاف الله ردو عليه وانشروها

عافان الله
الله يبعدنا ويحفظنا
والله اصدقج واصدق القصص الاخس عن جي بعد
كل جايز هالايام واللي مايخاف ربه مايخاف من حد
بس اسمحيلي اقولج ربيعتج الغلطانه وهي السبب في تمادي ريلها
شو فايدة الريل اذا مايخاف ربه ومايتحمل مسؤولية حرمته وعياله
وشوهالبيئة اللي عايشين فيها يخاشمون اخوان الريل
صراحه عجب وقولي لربيتعج تتخذ قرار يحافظ على نفسها وعيالها من البيئه ال ….

والله يهون عليها ويفرج مصيبتها

انا اقول لو طاح الطلاق ابركها من ساعه وتحمد ربها

يعني على شو عايشه عنده على شو ليش هي مب انسانه لها كرامه ليش ترضى بالذل قلنا الانسان يصبر بس يصبر على شي معقول مايصبر على مذله وإهانه ليش ماعندها اهل ماعندنا ناس وين اهلها ليش هي جي سلبيه ؟؟

خل تربي عيالها وتبعد عنه هالخاين واصلا مايروم ياخد العيال عنها قانونيا

الله يفرج عنها يارب بس انقهرت عليها وايد الله يعوضها يارب بالي احسن عنه وتعيش حياة حلوه من حقها هالشي من حقها تشوف حياتها وتستانس كلميها ولا هي تبغي تعيش طول عمرها عبده ؟؟

كلامي جاسي شوي بس عشان تنتبه لنفسها وهالريال مامنه رجا خليه بعد مايشبع من الحراتم والفلوس بيحس وبيندم بس عاد مابيفيده ندمه

الله يعينها و يصبرها..و الله يهدي الجميع انشالله….

أستغفر الله

اهى غلطانه من الاول كان لازم تحط حد حق تصرفاته وتحافظ على كرامتها وخصوصا اهى عايشه عند اهلها بس الحين ما كو فايده احسن لها تحافظ على اللى باقى من كرامتها وتعقد عن اهلها ولا تسال عنه ولو تقدر تمسحه من حياتها احسن .0 الله يصبرها انشالله بتنسى والايام كفيله فى هذاالشى

الله المستعان هذا مب ريال اصلا ولا تتحسف عليه بس يمكن هالعيوز مسويه له شي