كيكة النوتيلا... طبق اماراتي

صباح الخير حبيباتي…
اليوم بشاركم بوحده من حلوياتي المفضلة…طريقتها سهله وبسيطه..
والكل يحبها بالذات الصغار…

اولا الكيكه:
إما تستخدمين الكيك الجاهز اللي بس تخلطينه او تسوين الكيكه في البيت طبعا كيكه اسفنجية..
الكيك الجاهز انا استخدم Pillsbury بلسبيري بالكاكاو Cocoa
كرتونها ازرق وممكن اذا تحبين تختارين الخلطه العاديه من دون كاكاو..

واذا بتسوينها في البيت فهذي المقادير:
4 بيضات
4 فناجين شاي سكر
1 12 كاس دقيق
فنجان شاي حليب سائل
فانيليا
بيكينج بودر

الطريقه:
تخلطين البيض والفانيليا بخلاط الكيك لين ينتفخ البيض
بعدين تحطين له السكر وتخلطينهم…واول ما تشوفين ان الخليط صار متجانس
ابدي باضافة الدقيق والبيكينج بورد شوي شوي طبعا تخلين الخلاط على السرعه
البطيئه…
واخر شي تضيفين الحليب وتخلطينهم شوي …

الحين تشغلين الفرن شوي عشان يدفى على نار هاديه …
وتجيبين صينيه تقريبا 30 سم قطرها وتدهنينها بزبده وترشين عليها شوية دقيق وتصبين الخليط
طبعا لمن تدخلينها الفرن لاااااااااااااااااااااالا تفتحينه عليها ابدا الا لمن تتأكدين انها استوت
انا اخليها في الفرن ساعه الا ربع تقريبا لكن التوقيت ممكن يختلف من فرن لفرن وهذي راجع
لتقديرك…
لمن تستوي الكيكه راح تفك اطرافها من الصينيه وعشان تتأكدين اكثر ممكن تجيبين عود الشوي
الخشب وتدخلينه في النص اذا طلع مثل ما هو يعني الكيكه ممتازه ومستويه…

الحين بعد ما طلعنا الكيكه من الفرن نخليها تبرد شوي وبعدين نقلبها…
نقسمها اثنين ونبدا بالقسم اللي تحت …
نجيب شوي عصير اناناس وبالفرشه نشرب الكيكه بالعصير.. بعدين نغطيها بطبقه دريم ويب او
اي كريمه تحبينها…
نأخذ الطبقه الثانيه ونحطها فوق ونشربها بالعصير بنفس الطريقه…
اخر شي نجيب النوتيلا مو اي كاكاو ثاني وتأكدي انه سايح واذا كان الجو بارد حطيه في ماي حار..
الحين نأخذ كميه ونحطها فوق الكيكه ونبدأ نوزعها وحاولي انك اذا سويتي منطقه ما ترجعين لها
لان ممكن تخترب … ونكمل لين نغطي الكيكه كلها وندخلها الثلاجه تبرد … وبالعافيه