كنت اتريا مولوده لكن حكمت الله والحمدلله دموعي مافارقني لصحتك

عقب نشيت الساعه 3 الفجر بس مابطلت عيوني ، سمعت امايه تصلي وتدعي وتصيح ، وتقول يارب

توهم صغار ع هالظروف ،ويارب عطهم غيرها وعوضهم ، وتميت اسمع دعواتهم ، واقول في خاطريه امين يارب

طبعا انا وريلي مب صغار عمرنا 30 بس تعرفون قلب الام كيف وعقب خلصت ومسحت ع راسي واظن نامت

ورقدت انا ونشيت الساعه 6ص ع النيرس تبطل الباب جان تقيس لي الحراره و تاخذلي الضغط لانه الضغط كان

وايد عالي ،

وهم يجيكون ع الضغط ، بين فتره وفتره ، وخلص المغذي وركبت لي غيره ،وتمت تقولي لاتزعلين و الله

بيعوضج واي شي تبين ازقرينا ، قلتلها : ماتقصرين

سبحان الله كل الفريق الطبي اللي كان مناوبين صراحه ، زينين ، سبحان الله الله يعطي الانسان شي وياخذ

منه شي ، يعني صحيح انه بنتي توفت بس يوم اشوف اقلوب الكل وياي احس اني بخير .

ونشت امايه ع صوت الممرضه ومن ساعتها مارقدنا ، صلت عقب تمت تقرا عليه

ومن الصبح وصل ريلي يايب وياه اريوق ، عشان يتريق وياي ، وبالغصب كليت وياه ، حتى ريوقهم قبل ما

يوصل ريلي يايبينه ورديته عليهم منوه له نفس ياكل؟ بس الحمدلله ، وامايه ما ارتاحت الا يوم إتريقنا انا وريلي

وفهالوقت يت الدكتوره تمت تشرح لي شوه اللي استوى عنديه قالت انتي صار عندج انفصال المشيمه وعادة مايعيش

الجنين فهالحاله وصار نزيف داخل الرحم ، والبيبي كانت فوضع صعب وماتتنفس ف توقفت نبضات قلبها

وسألتني اذا كنت اجهضت قبل قلتلها لا

قالت وطبعآ ماسويتي عمليات قلتلها ماسويت وقالت لي : عموما هالحاله حتى بدون اسباب احيانا من الله تحصل

قالت طحتي لا سمح الله او سويتي مجهود قلتلها لا قالت نفسيتج كيف كانت قلتلها انه كان عندنا عزا

ونفسيتي بالمره ماكانت اوكي قالت وكنتي تاكلين قلتلها صراحه فهالايام اللي فيهن العزا اخترب نظام اكلي

ف قالت انه الحاله النفسيه من اسباب انفصال المشيمه ، والتعب بعد له دور ، وقالت انه الدرب كل يوم يعتبر مجهود

وقالت : لازم انتابع حالتج اول بأول وسأل ريلي عن الحمل قالت هذا مايمنع الحمل مره ثانيه بالعكس بس لازم تمر

فتره كافيه بين الحمل هذا و الحمل الياي

لانه بعد الولادات اللي ورا بعض ممكن اتسبب هالحاله . وقالت اذا حملتي تابعي ويانا اول بأول بس انصحج اصبري

فتره وكنا انا وريلي مب فاهمين شي وكل اللي بغينا نفهمه فهمتنا اياه الدكتوره

(لوليانو شرحت لج اسباب حالتيه حبيبتي)

المهم ، عقب سار ريلي يكمل الاجراءات طلع شهادة الميلاد ، وطلع شهادة الوفاه ، وفعلا سجلها فالاوراق ( ايمان )

وياني مره ثانيه واتصل في اخوانه ع اساس يوصلون عسب يسيرون يدفنون البنت ، صحت يوم سمعته يرمسهم ع

الدفن ، قالي :

(قولي الحمدلله ،اتوفت ولا انه تتعذب بالاجهزه وين اخيرلج تشوفينها ع طبيعتها ولا مركبيلها الف واير )

وتم يهديني ، ووصل اخوي وحرمته ، عقب وصلوا اهل ريلي وامه وخواتي وخواته ، وقلت حق ريلي بشوفها

قالي ومتردد : (مايستوي مابيطيعون) واعرف انه يستوي بس هو خايف المهم تموا وياي خواتي وخوات ريلي

وامايه وامه والرياييل ساروا طبعا ريلي بيده دفنها ، ماطاع حد غيره يحطها في القبر

، ودفنوها ، طبعآ مفروض اتم فالمستشفى ع الاقل اسبوع او اكثر بس انا رفضت وتاريخ 16-10-2009

قلتلهم ابا اسير بيتي ، طبعآ ماخلوني ، قلت له سير كلمهم عقب سار لهم ريلي وقالهم تطلع يعني تطلع هي ماتبا تيلس

هنيه ف قالوا توقعون ع طلعتها ووقعنا ع مسؤوليتنا

كنت مسوتلها توزيعات واتصل ريلي بالمحل قال له خلاص كنسل الشغل وعادي تقدر تتصرف فاللي سويته لنا وتبيعه وقاله الريال خلاص تعال استلم نص المبلغ

ريلي قاله والله ماخذ منك شي انت خذ المبلغ اللي دفعناه كامل من صوبك

وثياب ايمان وكل الاغراض اللي خذناهن لها عطيناهن ولد عم ريلي لانه يايتنه بنت ، قبل يومين ،

والحين بتابع مواعيدي اول بأول والحمدلله رب العالمين ع كل شي ،وادعولنا