شفت وحده كاتبه كمن سؤال عن الليزر فقلت راح افيدكم ان شاءالله بالي اعرفه عن هالموضوع للي تفكر او تبا تسوي ليزر او اشعه ضوئية
نسبة الاستفاده تعتمد على نوع الاشعة الضوئية هل هي ليزر او اشعه ضوئية Intensive pulse light اختصاره IPL
طبعا جميع انواع الاشعه الي تشيل الشعر نتايجها احسن على البشرة البيضا والفاتحه وكل ما كانت الدرجه فاتحه كانت النتياج احسن ليش؟؟ لانه الاشعه تمتصها صبغه الميلانين الموجوده في الشعره طبعا هالصبغه تكون موجوده في جسم الانسان بالجلد كل ما زاد تركيز الصبغه غمج لون البشرة وبالتالي هذا السبب الي يمنع منعا باتا على اصحاب البشره الغامجه والسمرا يستخدمون الليزر لانه نسبة الاصابة بالحروق اكثر لانه الجلد بيمتص الاشعه ويدمر لج نسيج الجلد وبالتالي يصير حرق لا سمح الله
زين شو الفرق بين الليزر والاشعه الضوئية IPLيعني اي واحد يناسبني اكثر وشو الفرق بينهم واي واحد فعال اكثر
الليزر: ممتاز وفعال على بويصلات الشعر الدااااكنه والقوية مثل شعر العانه والابط او لو كنتي من النوع المشعرن وشعرج ثجيل الليزر وايد اوك كل ما كانت الشعره قوية اكثر كل ما تاثرت اسرع بجلسات الليزر لو من جلسة وحده ولالالالازم تكون بشرتج فاااتحه عشان يرومون يستخدومنه بفعاليه وباقل ضرر ممكن على الجلد لانه الليزر قوي وايد على الجلد ويتمتص بسرعه وبقوة من خلال الصبغه الموجوده بالجسم
** انزين بالنسبه للشعر الخفيف وهذا اكبر غلط البنات يسونه الشعر الخفيف او الزغب مثل شعر البطن والظهر ما يتاثر بسهولة وسرعه بالليزر لانه هالشعر يكون اشقر او بني وخفيف يعني ما فيه صبغه وايد وبالتالي ما راح يتاثر بالليزر لو كملتي 12 جلسه والمشكلة الاكبر انه الليزر ممكن يسوي عملية تحفيز لبويصلة الشعر الخفيفة وبالتالي بدل ما يخف شعرج يتحول من شعر خفيف الى شعر ثجيل وقوي مثل شعر الباط او العانه او الحواجب وهالشي وايد من البنات ما يعرفونه وياما سمعنا ناس سسووا ليزر بالذات في الويهه والوييه متروس من شعر الزغب الخفيف وشو النتيجه يقولون اماكن خف الشعر والاماكان الي ما كان فيني شعر زاد لي وهالمشكلة سمعتها من كذا وحده من ربيعاتي واهلي فلما تبين تسوين اي نوع ازاله شعر بالاشعه لازم تسالين شو نوع الاشعه ووين وعلى اي شعر بتستخدمينها
بالنسبة للالم الليزر يعور تحسين بوغز داخل الجلد لانه يحرق جذرة الشعره المنغمسة داخل جلدج ومرات لو الشعره قوية بيصير مثل الحبة حول الشعره واحمرار يتم يوم او يومين مع او بدون حكه وكلها اعراض تدل انه الليزر يشتغل على الشعر وتخوز من غير اثر ومالها داعي للخوف
لكن 5% من الناس يصير لهم تصبغات من الليزر شو يعني يعني تصير لهم حروق ويتم اثرها على شكل بقعه بنية او سوده اغمج عن لوم الجلد مثل يوم تحترقين يتم بقعه مكانه طبعا ليش تصير في مكان عن مكام على حسب البشره ودرجه تحسسها وتصبغها لانه بشرتنا ما تكون موحده اللون يعني في اماكن تكون فيها تركيز الصبغه اكثر يعني لونها اغمج مثل الابط او البكيني او بين الافخاذ او مرات حول الحلج يعتمد على جسم كل وحده هالمناطق تعتبر مناطق اكثر عرضة للحروق والتصبغات بالليزر عشان زياده الصبغه الموجوده فيها طبعا البطن والويهه والاماكن الي فيها جلد حساس هم بعد عرضة للتصبغات انا ما اقول كل الي بيسووا بيتصبغ لا انا اتكلم عن نسبه بسيطه وهي نسبه 5 % فقط
الاشعه الضوئية IPL: وهذي المفضلة لي وعن تجربة
هاي الاشعه فعاليتها مثل فعالية الليزر واضرارها مثل اضرار الليزر لكن شو الفرق وشو الي يخليها احسن عن الليزر
انها فعاله على جميع انواع الشعر يعني فعال على الشعر الثجيل والمتين وفعال اكثر على الشعر الخفيف الزغب 100% من غير ما يكبره ولا يطوله ولا يحفز البويصلات وبالتالي فان الاي بي ال هو الاختيار رقم واحد لشعر الويهه (ماعدا الحواجب طبعا ) شعر البطن والظهر واعلى الذراع والافخاذ لانه هالمناطق شعر خفييييييييييف ومن جلسه وحده يخوزه لج عكس الليزر بالضبط …الليزر قلنا انه اقوى على الشعره الثجيلة من اول جلسه يطيحها الاي بي ال من اول جلسه يطيح الشعر الخفيف ما يطلع مرة ثانية لكن ياخذ وقت اطول على الشعر الثجيل يعني جلستين او ثلاث تلاحظي انه 50-70 % من الشعر الثجيل اختفى ((النتاسج يا بنات تختلف من وحده لوحده على حسب لون البشره والشعره مثل ما قلت ))
الاشعه هاي المها على شكل حرق او حرارة على سطح الجلد ما تحسين بها تتخلخل وتوغيزات لداخل الجلد مثل الليزر وعاده الجهاز مساحه الجهاز الي يضرب الليت على الجلد اكبر عن الليزر ((يعتمد على حسب الجهاز والشركة المصنعه)) والبتالي فالوقت الي بتاخذينه على الجلسه باستخدام هالجهاز يكون اقل بوايد عن الليزر لانه راس الليزر دايم يكون صغير فاتمين شقد وقت على ما تخلصين جسمج كامل وطبعا لو تسوين بمكان برا بيسوون لج مال اي كلام اماكن بيضربون عليها واماكن طاف فبتشوفين انه الشعر يطلع على شكل قروبات اذا شفتي جيه على طول هزاي الي تسوي لج وخليها تصرب لج على كل مكان وتاخذ وقتها وياج انتي دافعه دم قلبج مب شوي الجلسات سواء ليزر او اي بي ال
بالنسبة للاسعار: على حسب الجهاز والمكان ما اقدر اقول الليزر اغلى او الاي بي ال
اول كان الليزر وايد اغلى عن الاشعة الضوئية لكن مع الايام وصار الي بي ال يتفوق على الليزر بالنتايج كثرت اجهزة الاي بي ال المتطورة وصارت بعد اغلى عن الليزر او المراكز يغلونها لانه معظم الناس قاموا يتجهون له
انزين شو المشكلة في الاي بي ال المشكله انه ما يصير تسوين اوفر لاب overlap شو يعني يعني ما يصير تضربين على المكان الواحد اكثر عن مرة لانه لو ضربتي اكثر عن مرة نسبه الحروق والتصبغات تزيد بعكس الليزر الي المفروض ولازم تعيدين على المكان اكثر عن مرة عشان تزيدين نسبة الاشعه على جذره الشعره لكن طبعا المراكز يحطون لج فلبيبنية ولا تعرف شي تعيد لج على المكان اكثر عن مرة فتصير الحروق والتصبغات انا عن نفسي صراحه اول 3 جلسات مع الاي بي ال ما عدت على المكان لكن من تعود جلدي وحسيت الحمد لله ما صار تحسس او حروق بديت اعيد عالمكان مرتين او ثلاث بعد ما اخلي الجلد يبرد
بالنسبه للاضرار مثل ما قلت حروق وتصبغات بنسبه 5 % للاثنين وما ينفع للبشره السمرا الغامجه
فيه اجهزة وايد اتيج الحين مع مبرد او جل يكون ثلج عشان يخفف الحروق والالم وهالشي وايد زين بعد اسئلي عنه بالعياده الي بتروحينها
طبعا ابدا ما انصح تسوينه بالصالونات احسن عيادات جلديه عشان الدكتورة تعيان على جلدج وتقول لو ينفع تسوين او لا
شي ثاني بالاضرار العين تحتوي على خلايا صبغية وهاي الخلايا الموجوده في الشبكيه هي المسؤولة عن الابصار لو ما استخدمتي النظارة الي تحمي العين الاشعه بتتجاوز القرنية يعني العين وبتدخل للشبكية وبتدمر خلايا الصبغية بالعين انتبهوا لا يقصون عليكم يعطوكم نظارات شمسية اما نضارة معتمومة تسكر العين كاااامل مثل البلاستيكه تصكها من كل الاتجاهات او نظاره خاااصة اتي مع الجهاز تمنع الموجات ذات الطول المحدد مال الليزر انها تخترق الزجاج مال النظاره وتدخل العين ((انا اذكر في مركز العايلة كان زحمه كنت انا واختي سايرات اضطرت انها اتدخلنا وماشي غير نظارتين عطتني نظارتها الشمسية اونها لبسيها عشان ما يدش لج الليزر ..طبعا تهزات هالهندية هاك اليوم عبالها ما نفتهم شو )) وبالتالي ولهسبب الليزر او الاي بي ال ما يتخدم على شعر الحواجب لانه قريب من العين الا في العيادات المتخصصه وعلى مسؤوليتهم بعض اجهزة الليزر والاي بي ال الي تستخدم بالبيت ما تحتاج لانه تركيز الاشعه خفيف وما تضر العين
طبعا اثر الليزر اقوى على العين من الاي بي ال لانه الاي بي ال تركيز الليت فيه اقل عن الليزر يعني تحسين به مثل فلاش الكاميرا لكن الليزر الليت ماله احمر وما اييج على شكل فلاش مثل الاي بي ال ((سبحان الله صدق يوم قالوا الساكت لاكت انتي يوم تشوفين وتسمعين صوت جهاز الاي بي ال تحسين من قوة الفلاش تخافين تصدين بيوههج وتصكيم عينج على طول عنه لكن الليزر لا صوت بس صوت الجهاز توت توت ولا برقة فلاش فعادي اتمين مبطله عينج وعالاخر بعد )) انتبهوا من هالنقطه يا بنات
تقريبا هذا الي عندي وهاي اكثر النقاط الي تحتاجون تعرفونها ومعظم الناس ما يدرون بها
كل المعلومات عن تجربة شخصية وخبرة ودراسه (تراني دارسة جلديه )) ^_^
الي جربت وعندها ملاحظة او شي تشاركنا به تحطه نفيد ونستفيد من بعض
موفقين
بس انا جربت الليزر وخاز اغلب الشعر الغليظ وكملت تقريبا 6 شهور
بس الحين رجع الشعر يطلع عندي خفيف بس كثيف
تنصحيني اجرب النوع الثاني ؟
يستاهل التثبيت أسبوع حسب قوانين المنتدى