على فكرة،،، الصور مجمعتنها من مواقع شخصية لنساء يعرضن اعمالهن اليدوية،،، والصراحة يوم شفت شغلهم وايد استانست،، لاني استفدت وايد،، خصوصا اني من النوع اللي يجمع فضلات الاشياء بشكل عام،، بالنسبة لي وايد صعب ارميها وكله اتخيل اني في يوم من الايام ممكن احتاجها،، مثال على ذلك: غلاف هدية جذاب، ممكن اخلي الغلاف عندي ومافره عجب ما افتح الهدية، ليس الهدية اللي ييي على شكل وردة، دانتيل او طربوش ستارة منقص، خرز الثياب الجديمة او خرز المسباح عجب ما ينقص او حتى خرز شعر بنتي اللي تنقص وما يعود لها فايدة، ملعقة حليانه او حتى مفتاح جديم شكله اقرب ما يكون للشكل العتيق، وانتو بكرامة قوطي نعال شكله حلو، حتى غرشة العطر يوم تخلص تغمضني افرها خصوصا إذا كان شكلها حلو، وخرابيط وايده ماتي على بالكم، وسبحان الله معظم ها الامور شفتها مستخدمة في البطايق وعاطنها شكل رائع، اتذكر بشكارتي يوم تقولي "ماما ليش كله يود يود، كله قديم لازم فري،، مخزن ما فيه مكان"، بس سبحان الله دايما احتاجه يوم واحد، حتى زوجي يوم يضطر للتصليح والصيانة المنزلية دايما يلجأ على قولته لمركز الإمدادات والمؤنة ويفتش في سدة الخرداوات اللي عندي ولازم يحصل اي شي ينفعه في حاجته وتكون ردة فعله حلوه واستانس عليها وعلى قولته يوم يقول "Yessss" يعني حصلتها، مع انه كان يستغرب اول بادي شو ها الخرابيط اللي تيودينها وعجبها الاخ ساير راد على المخزن،، عاد هييج الحزة ايلس اتخجج :"انته وين بتحصل حرمة شراتي، يعني اي شي تباه إمره موجود عندي، انته سمه بس وبتحصله"،، وصدق والله دايما يحصل الشي اللي يباه سبحان الله،،،على العموم، اخليكم مع الصور
بسم الله،،، اول شي بعرض الكتيبات الصغيرة وبعدين البطايق،،،
على العموم،،، بخليكم ويا ها الصور اول بادي،، عشان اشوف ردودكم قبل،، وان شاء الله اكمل وياكم باقي الصور باجر ان شاء الله،،
ما شالله روعه أختي عاد أنا نفسج أجمع بس عقب أفره ما عندي وقت أسوي فيهن أشياء .. بس أختي ما وضحتيلنا كيف تسوين هالكتيبات خبرينا … وننتظر باجي الصور …. وياليت كل الريايل نفس ريلج الله لا يحرمكم من بعض
خاطري اسويلي واحد
الحين كل اللي نسويه بالفوتوشوب .. بس دائما الحقيقي احلى
ياريت نشوف الخطوات اللي اتبعتيها فالتنفيذ
انا شاريه وايد ادوات حق ال Scrapbooking
بس بعدني ما بديت اسويهن لانه مشغوله بأنواع ثانيه من الاشغال اليدويه ^_^
واااااااااااااااااااااااايد حلو الموضوع