شحالكن خواتي؟؟عساكن بخير..
اسمحولي افضفض واطلع اللي فخاطري مالي حد اشكيله غيركن..لان محد يفهمني ومحد حاس فاللي انا فيه..احس بضيجه لدرجة اني احس بدمر بيتي والسبه اسلووبي وضيجتي الزايده..
ادري شو فخاطر اللي حواليني وشو يفكروون..لاني ماحب البنات اللي طبعهن نكديات ويحنن وكله متضايجات..بس صرت منهن للاسف..
اليوم هو اليوم اللي كنت بفرح فيه وبستانس وبتريا اجمل عطيه من رب العالمين ((بناتي التوأم))..
آآآآه يالدنيا ضاجت فيني..مليت من كثر ما اسمع نصايح اهلي واللي حواليني..مليييييت لدرجة اني كرهت ازور حد من اهلي او اطلع مكان او حتى اندمج مع اهل ريلي..مع انهم يحبوني ويعدووني وحده من بناتهن واكثر..عمتي وعمي واايد يحبوني وخوات ريلي نفس الشي..بس صرت اتحسس من اتفه الاشياء واتخيل اشياء هم مايقصدوونها..ومن داخلي احبهم بس لساني يقولي هم يقصدون يضايجوني!!!
ماعرف اذا وحده منكم اتحس جي..لكن انا جي افكر..
واروح بيت اهلي يفتحون معاي سالفة اليهال وسالفة اني وايد ضعيفه اكيد مب مرتاحه ويا ريلي ولا اهله..وقلبي يتقطع ويحترق..محد يحس فيني..خلااص لاتفتحون معاي الموضوع لاتناقشوني..
احاول امسك دمووعي جدامهم بس ماا اقدر قلبي مافضى من القهر والحرقه اللي فيني..
وريلي من يدخل البيت يقولي ليش عابسه بويهج..عنبو انتي مب حرمتي اللي اعرفها..انتي اذا تميتي جي مابتييبين عياال..
انا بداية ماحملت وانا تعبانه فوحام وغيره لين ربيت..وربيت قبل موعدي فالشهر السادس وبطني اللي يشوفه فالشهر التاسع..آآآآه بتسئلوني شو استوالج هذا اللي صار فيني بالاختصار المفيد:
بسبة ان الدكتوره الغبيه فتحتلي ماي الجنين وسببتلي ولاده مبكره وطبيعي اليهال اذا كانو صغار مابيعيشون..
لكني اتوقعت اطلع من غرفة الولاده وفايدي بنت وحده ولا اني اخسر الثنتين..ومريت فحالة نفاس اي حرمه توها مربيه..لكن الفرق اللي بيني وبينها اني انا بدون يهال..
قلبي محترق على موتتهم مع انهم ماعاشو وياي ولعبو وياي..لكن فنفس اليوم اللي كنت سايره فيه المستشفى كانت تتحرك فبطني واحس بحركتها ونفس اليوم اتراويني الدكتوره الغبيه حركة الياهله وانها نشيطه ونبضها زين بس الثانيه مب طبيعيه واحتمال ماتعيش..بس البنت الثانيه ماكنت احس فيها من بداية ماحملت لانها تعبانه وكانت فاي لحظه بتموت..
وكل يوم اسمع تعليق يديد كل يووم وكل يوم لازم ينذكروون فيه اليهال على لساني واشوف صورهم اللي فالبوم كامل من بداية حملي لين ربيت وسبب وفاتهم الكاذب حسبي الله ونعم الوكيل فيهم وشهادات وفاتهم وحتى تسجيل دقات القلب..وتحليل البول الله يكرمكن..ماغابو عن بالي ولادقيقه..لاتقولون لي انسي لان والله ماقدر انسى ماقدر..
امسات كنت سايره عرس ولد خالتي واشوف البنات الحوامل من اهلي كل وحده بكرشتها جان انا الحينه فالشهر التاسع وبربي فهاليووم آآآآآآآآآآآآآآه آآآآآآآآه..انا ما احسدهن والله بس متضايجه على اني ماعندي عيال وعيالي اللي تعبت فيهم طول هالفتره ماتو..الله يسهل عليهن ويفرحهن فعيالهن انا ما احسدهن لكن احس فعيونهم انهم حاطين فبالهم اني حاسدتهن..انا والله ما اتمنى لوحده ابغضها هالموقف اللي صارلي كيف برضاها على اهلي؟؟!!!
موقف على موقف على موقف احترق واحترق اكثر..
ييت بسلم على وحده من اهلي كانت حامل وياي فنفس الشهر سلمت على الكل وهي واقفه ويوم شافتني يلست وتقولي اسمحيلي ماروم اوقف وايد..بالذمه هي مب متعمده؟؟!!!
ووحده يالسه عدالي اتقولي شكلج تعبانه ليكوون حامل..تبغي تجيس النبض ماتعرف كيف..
جان اقول لها وانا ابتسم واضحك لا مافيني شي فديتج بس الدوره ملعوزتني هذا اول يوم لها من جي بطني يعورني شوي..وهي اترد عليه هييييييييييييه افااا..اووه احسن لج شو تبغين فالعيال والوحام والتعب..علما بان هي حامل وهذا بجرها وفعمرها ماعرفت الوحام من بداية ماعرفت انها حامل..الله يخليه لها اللي فبطنها ويحفظه بس ليش جي اتقوولي؟؟!!!
واسلم على اهلي ولا وحده كلفت عمرها واتحمدتلي ع السلامه مع اني كنت بين الحياه والموت والكل يدري..
هم يكرهووني ولا انا اتوهم؟؟!!
نفسيتي تعبانه والله تعبانه وريلي كل مايشوفني يقولي صايره نكديه..انا ادري اني فعلا نكديه صايره بس والله ماقدر اتصنع البسمه وانا فيني ضييجه احاول اضحك واسولف ومع ذلك الناس مايعيبها ضحكي ويقولون بالغصب اتطلعينها..يعني اذا ضحكنا ماعيبهم واذا ماضحكت بعد مايعيبهم انا مادري شو اللي يرضيهم..
اسمحوولي خوااتي بس احااول اطلع شوي شوي شوي من اللي فخاطري..على امل اني ارتاح..
والله ان شالله بيرزقج ……..كثري من الدعااء
افاا والله افا يا اختي
انتي شكلج وحدة عااقلة و فااهمة الدنيا ما شاااء الله عليييج
حاولي تغيرين من نفسج و طباااعج عشاان ما تخسرين حد من حبايبج ,,,
افااا عليج ياختي
انت مؤمنة بالله .. و تعرفين القضاء و القدر
الي صار لج ياالغالية ممكن يصيير لأي وحدة ,, اصبري و احتسبي الاجر
مب زين الي تسوينه ,, من وساوس ,, هذا كله ترااه من الشيطاان ,,,
بنااتج الحين يا حلوة في الجنة
انتي ضامنة هالشي
شو تبغين اكثر
و بناتج بيشفعون لج و لريلج بعد يوم الحساااب
يعني انتي الي ربحاانة
و الله بيعوضج ان شااء الله خير عن هالبنات
بس الي تسوينه ياختي مب زين والله .. جنج معترضة عالقضاااء
احمدي ربج على كل حاال ,, و احتسبي الاجر
و الله مثل ما عطاج هالتوم ,, بيعطيج ان شاااء الله اكثر و اكثر
انتي بس اصبري و احتسبي الاجر
و ان حسيت بضيج او اي شي
علطووول منتدى سيدات الامارات يستقبلج بصدر رحب
فضفضي و طلعي كل الي بخاطرج
الحين الي اباااااه منج
تصلي ركعتين تهدين شوي
تروحين تسولفين مع ريلج و تتبسمين ,, حاولي و لا تقولين ما اقدر
اطلعي غيري جو ,, رمسي ربيعاتج ,, اشغلي عمرج
و ان شااااء الله في القريب العاجل تبشرينا بحملج يااااااااااااااااااااااااااااااااااااااااااااااااا اارب
طمنينا عنج ,, اوووكي
خلي شعارج دااايما
و انا ان بغيتيني في شي .. تطلعين الي بخاطرج .. او تفضفضيين عالخاااص افا عليج
مايردج الا كيبوردج
وسلامة راسج
واللي فيج ردت فعل طبيعيه بسبب اللي صار لعيالج
حبوبه اللي تفقد بيبي واحد يحز بخاطرها وتزعل كيف انتي اثنين
وخاصه ان الحامل وخاصه فالبجر تفكر وايد وتتخيل اشيا اكثيره راح تسويها لبيبي
يعني اللي فيج اظن من الحزن على اللي فقدتيه الله يصبر .. حبوبه نصيحه اهتمي
فنفسج وفزوجج فالمرتبه الاولى واللي حواليج عسب ما تزييد مشاكلج لا سمح الله
المواقف اللي صارت لج انا متأكده مب عن تعمــــد .. ومحد قصده يسيئ لج .. يعني معقولهــ حامل بتتعمد تسوويلج هالحركهــ .. فدييتج بتخاااف على عمرها يستوويلها شي ..
حياتي اللي مريييتي فيييه شي واااايد متعب وصعب ..
الله يرحم بناااتج
ويرزقج بالذريه الصالحهــ
حياتي وين إيمانا بالله .. فديييتج صدقيني صح الموضوووع وااااااااااايد قاااسي والله انا حاسه فييج .. بس على المدى البعييد بتعرفين الموضوووع فيييه خييييييييره .. والله خييره ..
بس نحن مافينا ابد صبر ..
اول شي :انتي عرفتي انه كان في اهمال من الدكتوره .. ابتعدي عنها واألي عن دكتوره اوكي
علشان يوم يصير لج حمل تكونين مطمنه من ناحية الرعايهــ الصحيهــ
اختي الحمدلله انتي قادره تحمليين والله اييسر اموورج من كم يوووم اقرا مووضوع عن وحده متحطمه نفسيا لأنها ما تقدر تحمل .. يعني هاي شو بتقولين لها كيف تعزيينها ؟؟
يا اختي انتي اهم شي في هالفتره تغيرييين جووووو
انا عن نفسي يووووم اتظيييج اقص شعري واغير اللوك مالي .. اكوون معصبه . اسير االصالون اقوولها هذا شعري سوووي اللي تبينه " شعري كان طوووييل .. وشعري اهم شي عندي " .. بس اكوون خلاص متظيجه وبعد القص مع انها تقص وااايد الا اني احس براحهــ !!
وحده من ربيعاتي بتسير تشتري من دامااااس كل ما تكون زعلانهــ
اختي المعرسهـــ من تتظيج من ريلها اتمـــ سهرانه في الميلس ما ترقد وتعصب وآخرتها تفوول في ويه ريلها وهذا غلط ..
حياتي ريلج ما يخصهــ
كل ما سارعتي في تقبل الموضوع والثقه بربج كل ما كان افضل لنفسيتج ولريلج وللي حواليج اللي يجرحهمــ شووفتج وانتي زعلاااانه!! اللي مفتقديين طبيعتج …
حياتي اذا انا زعلت عليج فكيف اللي حواليج ..
حطي في بالج المحن اللي تصير لج مب تزعلج انتي بس لا .. تأثر في المحيط اللي حواليج ..
شوفي كيف تقدرين تغيرين نفسيتج حتى لو تتركين سيرة الاعراس لفتره والجمعات العائليه وترجعين لهم انسانه يديده ومتفاااائله مب مشكله خذي وقتج ..
ابتعدي عن الاماكن اللي توترج ..
وبالتوووفيق غناااتي
دعواااتي لج
حاولي تغيرين جوا شوي يعني مثلا تطلعين انتي وريلج بروحكم و تباتون برع البيت كم يوم..و هذا كله خليه ورى ظهرج..حطي في بالج ريلج و بس ..اذا انتي مضايقه من اللي حواليج..لا تنكدين و تعبسين بنفسج ..خلي الحياه حلوة عندج ..ما عليج من حد..عيشي مرتااااحه و اطلعي من الاجواء اللي انتي فيها و ربج بيرزقج ان شاء الله ..و ان شاء الله نسمع الاخبار الطيبه منج.
انتي لا تفقدين الامل وحاولي انج تغيرين جو او حتى تسافرين لأن النفسية تلعب دور .. وان شا الله بتحملين جريب وربي بيعوضج عن اللي خسرتيه