قصــــــــــــة اخوي (وخوفي عليه من العذاب) لتربية طفلك

شحالكن بنات وحريم ويامرحبا فيكن انا اول مره انزل موضوع فالمدونة :
ابغي اخبركم قصة اخوي اللي اكبر مني ب سنتين : باخصتار

انا اخوي من يوم جان صغير ما يصلي وكل مره امي تنصحه وتخوفه من العقاب وغيره

وتم فتره يصلي وعقب انقطع المهم مرت الشهور والسنين واخوي لا يصلي ولا يصوم

تخيلوا يابنات يمر رمضان نحن كلنا صيام وهو يدش المطبخ ياكل كنت وايد حزينه عليه واخاف انه يموت وهو ما يصلي و لا يصوم ..

مع انه جان في قمة الطيبه الكل يحبه ومحترم بس عيبه انه ما يصلي وهذا اللي خلني حزينه افكر فيه دوووووم
مرت الايام انا وعرست وظهرت من بيت اهلي
ولما اسير بيت اهلي اسال عنه وين فلان والله فلان راقد ولا ظاهر ويا ربعه تميت فخاطري ادعيله

اقول يارب احفظه واهديه يارب ..

من كثر حبي له وخوفي عليه تميت كل صلاه اصليها ادعيله بالهدايه وانا اصيح ادعيله من خاطري مااتخيل اخوي بيموت وهو ما يصلي كيف بيكون مصيره..

الموت ما يبا لا صغير ولا كبير لما الواحد ايه اجله ..

تميت كل مره اسير يافلان الله يهديك ليش ماتسير تصلي المسيد تحت البيت والله يابنات المسيد جدام البيت قال انا يوم ابا اسير اصلي الشباب يقولولي احين بيطيح المسيد يتمصخرون عليه لانه جان ما يصلي..

قلتله يافلان انت ماعليك من رمستهم سير صلي وبيتعودون على وجودك انت مب ساير عشان ترضيهم انت ساير عشان ترضي ربك وجم من الاجر بتحصله وانت ساير بريولك تصلي المسيد جماعه اجر عظيم..

المهم سكت عني.. وجان يوم العيد كلنا متيمعين بيت اهلي خواتي وريايلهن وعيالهن وقاعدين ويسولفون عن الصلاه وتم ريل اختي ينصح اخوي اللي ما يصلي قلتله صراحه انا حزينه انه اخوي ما يصلي اخاف في اي لحظه ايه اجله وهو ما يصلي ..

حسيت فاخوي يطالعني بنظرات غريبه وفيها حزن قسم بالله لدرجه انه خنقتني العبره وانا يالسه اتكلم
عمري ما نسيته من الدعاء كنت ادعيله من خاطري الله يهديه..

واخر مره سرت بيت اهلي شفتهم كلهم بس هو ماشفته سالت عنه وين فلان مااشوفه قالوا نبشرج فلان فالمسيد وما يودر ولا فرض كل صلاه يصليها فالمسيد قسم بالله يابنات انه الدنيا كلها ما شلتني من الفرحه ان اخوي فالمسيد واقف بين يدين ربه يصلي ويعبده ويدعيه والله من فرحتي قلت يارب لك الحمد والشكر يارب ثبته على صلاته واغفرله وارحمه يارحمن يارحيم .. فرحتي كبيره ما تنوصف ان الله تقبل دعائي واخوي صار شخص ثاني ماشاءالله

وخبرتني امي عنه مره قالها ماادري سبحان الله فجاءه حسيت اني ابا اروح اصلي المسيد ابغي اتقرب من ربي ابغي احس ان ربي راضي علي يقول قمت احب اقعد فالمسيد اكثر من قعدتي فالبيت وعند الربع احس براحه يقول احين ما ايني رقاد الا ااذا شغلت قران واذا يا موعد الصلاه جنه حد يقومني عسب انا انش للصلاه يقول اذا سمعت الاذان واتاخرت شوي احس جنه حد يخنقني واتخيل عمري بموت على طول انش اصلي ..

وقبل لا اعرف انه بداء يصلي وما يفوت فرض
(وحلمته مره يالس يعلمني كيف اقراء سورة الاخلاص ويرددها علي ثلاث مرات)

الله اتمناه من كل وحده فيكن تدعي لاخوي ان الله يثبت على صلاته يارررررررررب ويهديه ويغفرله ذنوبه .. ويحسن خاتمته ..
يارب ياكريم يارحمن يارحيم اهدي شباب وبنات المسلمين يارب

يارب ثبت اخوي وارحمه برحمتك واغفرله يا ارحم الراحمين)