أنا من اللي دايما يتابعون مواضيع هالقسم و أقرى قصص البنات و تجاربهم لأني أمر ب مشكلة تأخر من 3 سنوات و هالمره حبيت أشارككم تجربتي
لاحظت أن مجتمعنا وايد كتوم فيما يخص هالمواضيع .. الايام اللي أراجع فيها عيادة الدكتور وليد يكون أجوف المواطنات بالعشرات لكن يوم أنيي للنقاشات و التجارب ما أحصصل شي فالمدونة .. هو فالاخير حرية شخصية .. لكن حلو لو نكون مجتمع متفهم و متفتح في هالموضوع اللي وايد كبر هالفتره الاخيرة و نتشارك تجارب و آراء ..
بكلمكم عن نفسي
أنا عمري 24 .. تزوجت يوم كان عمري 21 و تأخر الحمل عندي لكن مافكرت أراجع أول سنه .. بعد سنة و كم شهر رحت عند دكتورة نسائية ف مستشفى حكومي يعني مش دكتورة معروفه أو شي .. قلتلها إن حملي تأخر سنة و 3 شهور طلبت فحص لزوجي للحيوانات المنويه و فحص هرمونات لي و صورتني .. كل شي كان طبيعي .. نتايجي و نتايج زوجي و الحمدالله .. قالتلي بنجرب الكلوميد جربته شهرين و ماصار حمل و وقفت المراجعات معاها .. و مرت ثاني سنة من زواجي .. ماكنت مهتمة وايد لموضوع تأخر الحمل يمكن لاني كنت أحس إني صغيرة و كانت آخر سنة لي فالكليه و انشغلت ..
تخرجت و هالمره كنت مصممه إني التزم بالمراجعات و أعرف مشكلة تأخر الحمل .. نصحتني وحده من أهلي بالدكتوره عفاف و بديت أراجع عندها طلبت نفس الفحوصات لي و لزوجي و نفس النتيجه كل شي طبيعي جربت معاي الكلوميد شهرين و ماصار حمل .. بعدها نصحتني ب أشعة الصبغة لان إذا الهرمونات و المبايض و الرحم كل شي طبيعي في احتمال كبير خلل فالانابيب .. توكلت على الله و سويت اشعة الصبغة و كانت النتيجه أنسداد في الانبوبين (الحمدالله على كل حال ) .. بعدها شرحتلي إن في هالحاله جدامي خيار واحد بس اللي هو أطفال الانابيب و حولتني على الدكتور وليد
صح فالبداية هالموضوع يصدم خصوصا اذا كنتي حاطة ف بالج إنج صغيره و إن موضوع الحمل مش مشكله بالنسبة لج .. بس الحمدالله إذا كان هذا نصيبي و مكتوب لي ف هو خيره و الحمدالله إن عندي نعمة العلاج و الحمدالله في كل حال و كل حين
في أول موعد لي مع الدكتور وليد حسيت بالراحة .. كلمني و شرحلي كل شي و عطاني وقته .. و قررت أبدا معاه أطفال الانابيب نفس الشهر .. أول تجربة لي فشلت و لله الحمد .. باختصار من بين 15 بويضه تلقحو 4 بس و جودتهم ماكانت زينة .. و الحين صار لي 5 شهور من آخر عملية و الحين أنا مقبلة على التجربة الثانية اللي حابة إني اشارككم تفاصيلها خطوة ب خطوة
هالمره الدكتور قال لي بغير لج عدة أشياء
رحت له ثاني يوم دورة وصفلي حبوب بريمولت لمدة 21 يوم
و قالي هالمره بنمشي عالبروتوكول الطويل مع إبرة تحضيرية ( ف تجربتي الاولى ماخذت الابرة التحضيرية على طول بديت تنشيط)
غير جيه قال بغيرلج الابر ( ف تجربتي الأولى استخدمت قونال إف )
الحين أنا خذت الابرة التحضيرية و بانتظار موعد الدورة اللي هو المفروض 25 او 26 من هالشهر
بكون معاكم خطوة ب خطوة و بخبركم بالتطورات و اللي حابة تسأل او عندها استفسار و انا اقدر أساعدها بكون حاضرة
موعدي الياي بيكون يوم الثلاثا تاريخ 26 .. اذا نززلت الدورة ف وقتها ببدا تنشيط ف هاليوم إن شاءالله
اسمحولي إذا طولت عليكم .. حاولت أختصر التفاصيل قد ما أقدر ..
ويرزقني ويرزقج وجميع اخواتي بالذريه الصالحه
يا رب ،، متابعين معاج وان شاء الله تبشرينا عن قريب
متابعه لتجربتج الناجحة باذن الله تعالى
الله يرزقنا جميعا نحن المتاخرات
ويرزقج الذرية الصالحة ويرزق كل محرومة