شحالكم شخباركم !!
عساكم بخير وسهالة
أأأخ والله يعين اللي بيربن الحين والله يسهل عليكم يارب
صارت عندي فوبياء من الحامل كل ما اشوف حامل احس اني بعدني ماربيت >>> حالة نفسية مابعد الولادة خخخخخخخ
المهم انا يوم الخميس كان عندي موعد طلق صناعي !
وسبحان الله في هذاك اليوم كل حد يتصلبي هااا ماربيتي امس حلمتج !!!
احساسهم صادق خخخخخ ونا النذلة اقول لهم وييييييييييييييييييين اربي انا في الدوام واستغفر الله انا كنت فالمستشفى اتريا الطلق الصناعي يعطونني اياه !
>>> خذت ذنوب وااايد هذاك اليوم من كثر الجذب
المهم
دخلت الساعه 2 الظهر و وقعت كل شي ويلست فالغرفة
لووول وماخبرت حد لا ريلي ولا امي
وتميت اقرأ سورة البقره وسورية مريم والسور الباقية القصيره
وكان يقطعني التلفون كل خمس دقايق حد يتصل يقول حلمتج انج ربيتي
والساعه 5 العصر يتني الدكتورة ورمستني وخبرتني بكل شي
وكشفت علي قبل ماتحط التحميلة وقالت فاتحة 1 سانتي
وحطتلي نص تحميلة بما اني بكر وأول مره اربي
وقالتلي لو تبين أبرة ظهر طلبيها من حقج لانج بكر
المهم
مر الوقت ونا احس بطلق خفيف ونا اقرا سورة الزلزلة
ويت الساعه 8 ماتحملت
الويع مسك في ظهري
وسرت امشي في الممر
والنيرس خطفت عدالي اقوللها يمكن فاااتح واايد
قالت :- ( لا ماما هذا طلق صناعي هذا مافي طلق لازم يصبر شوي )
اففففففففففففف كأبتني كل هذا الويع واحس اني بموووت بس طلق صناعي !
وكانت وياي وحده هندية بنفس الغرفه وحطولها تحميلة في نفس الوقت اللي حطولي اياه بس ما اشوفها تتويع ولا شي
قلت في خاطري لاااا اكيد انا فاتحه اكثر عن واحد سانتي
لان اللي عدالي بعد فاتحة 1 سانتي >>> خخخخ كنت اتسمعهم لووول
المهم دقيت على ماما ويتني تطييير
يوم وصلت صارت دموعي تطيييح ونا ساكته
دخلت وهي تواجع وحالتها حاله وتقول انتي ماتخبرين حد ومادري شو
وشكلها في خاطرها كلام وايد بس من شافت دموعي سكتت
وطلعتني وتمينا نمشي ونمشي
اخر شي ماتحملت
ماما نادت النيرس
وقالتلها كشفي عليها شوفيها كم فاتحة لانها بتموت من الويع
قالت ( لا ماما هذا وجع مال طلق صناعي مافي مال ولادة انا بيعطي حبوب مشان يرتاح ومافي وجع ونوووم) >>>> منو سألج الحين !! وماشالله عليها ذكية انا ابا اربي واخلص وهي تبا تبرد الطلق علي!
ونا عندي فوبياء من الكشف
وقلت حق ماما خليها برايها لين الحين اتحمل الويع
المهم امي مارضت واصرت انها تكشف علي
وكشفت وحصلته 5 سانتي و ودوني الولادة على طوووول
ونا استانست ان مابقى الا 5
بس اخس شي ال 5 الباقيه
المهم يوم دخلت الولادة يت بنت خالتي وخالتي لان سبحان الله امي ماتتحمل مع انها ماشالله عليها تسير مع كل حد الولادة بس ما اتحملت تشوفني بهالوضع لاني بنتها طبعا !!
ويووووم يت بنت خالتي بدأ الفلم وياها
امايه وبنت خالتي يالسين يتطنزووون على خالتي لان خالتي كانت يوعانه وفيها رقاااد
ونا فيني طلق بس نفس الوقت حمدلله كنت اتحمله وكنت ميته من ضحك على خالتي يحليلها
وكنت منسدحه عالشبرية
وكنت احس اني اكره الشبرية لاني احس كل ما انسدح عليها الطلق يزيد علي
وكنت انزل فجأه وخالتي قاعده على كرسي عدالي
ويوم تشوفني انزل فجأة تقفز من الرقاااد وتفصخ نعالها
عاااااااااد انا اهنيييييي امووووووووووووووووت من ضحك ويزيد علي الطلق من الضحك
عاد ينزلن دموعي من الويع واضحك من الموقف
وتخيلوا كل مره انزل من الشبرية فجأة تسوي الحركه نفسها
وكلنا نضحك بس انا بزيادة
والحمدلله الضحك فتح النفس عندي >>> ادري غريبة لووول ضحكوا نصيحة من عندي بيزيد الطلق وبتربون وتفتكووون
المهم وعقب ماقدرت اتحرك لان الطلق مسك عندي
وصااارخت على بنت خالتي بصوت عالي كل قسم الولادة سمعوني كنت اقول ( انقلعي ياحمارة من الغرفة)
يحليلها طلعت ولا شفت رقعة ويهها
هههههه شريرة
ويت الساعه 1 فليل ونا خلاااااااااااااااااااص احس اني بموووت
قلت حق النيرس خلاص تعالي اكشفي علي احس اني بموووت
كشفت علي وحصلته فاتح 9 سانتي
استااااانست قلت واخيرا الحين بشوف ولي العهد
والحين يا وقت الجد
اهني يا وقت الخوف عندي
ضربني خوف في قلبي ما اعرف من شو
والخوف هذا اثر على البيبي وتم ينزل دقات قلبه
النيرس خافت عالبيبي
ودخلتلي مثل الواير من تحت عشان تتاكد من دقات قلبه
ويوم خبرتني زااااد خوووفي عالبيبي
صار عندي خوفين
1- خوف ولادة
2- خوف على البيبي من نزول دقات قلبه
وتم يوصل دقات قلبه 100
وتمت تهديني النيرس وتقول لي خلاص اتحكمي في نفسج
وكان يوم اييني الطلق ينزل زياده لين 95
وكانت ترمسني وتقول خلاااص تبين تشوفين البيبي مالج ولا لاء
يمكن حاولت فيني نص ساعه وماشي فايده
قالت خلااااص عملية اهني انا كنت بمووت من خوووف
ودخلت الدكتورة فجاه علينا
وخبرتها ومادري شو
وطلبتلي الابره اللي يعطونها في الفخذ
وعطوني اياها وارتحت وكل شي رد طبيعي
وبرد عندي الطلق لين الساعه 4 ونص
هييج الساعه مسك الطلق عندي ورا بعض
والطلق ماكان يهمني لان البيبي مسك في ظهري وريلي وكنت احس ان ظهري بينكسر وريلي تعورني بمووت منهم
هههههههههههههههههههههههههههههه تخيلوا الدكتورة تقول لي يلا ياحبوبة الحين وقت الشد ضبطي نفسج
ويالسه تسوولف وتمزح ونا مب في وقتها يالسه امط شعري واصارخ لاني وصلت حدي
من الصبح ساكته
وهي بعدها تسولف وبالها طويييييييييييييييييييييييل ونا بموووت من قهر من اسلوبها ابا اذبحها
قالتلي يلا حبيبتي ادعيلي
قلت الله لا يوفقج يارب
سكتي احسن لج
انصدمت دكتورة وسكتت >>> حليلها الحرمه كانت متفائلة خير فيني
ههههههههههههههههههههههههههههههه
الحين دور بنت خالتي
طلت من على الباب
وتخيلوا الحين الدكتورة يالسه مجابلتني عسب وقت الشد ومهيئين الغرفه اني بربي ومولعين ليت شبرية البيبي عشان يحطونه فيها
تخيلوا يوم طلت من الباب نزلت فجأة من على الشبرية
قالتلي الدكتورة وين رايحة البيبي بيطلع
قلت خليني اذبحها وبرجع
بنت خالتي نقعت من الضحك وشردت
والدكتورة والنيرس وامي ماسكيني عن لا أشرد
ههههههههههههههههههههههههههههههههههههههههههه
يوم رديت على الشبرية شفتهم محتشرين وحطوا ستاره بيني وبين شبرية البيبي عسب يوم يطلع البيبي
ظربني خوووف ان ولدي فيه شي
ونزلت دقات قلبي وقلبه
والنيرس احتشرت علي تقووول لاتخافين خلاااص الحين بيطلع ولدج وبتشوفينه
ويالسين يحفزوووني امي وخالتي والدكتورة والنيرس
وماكنت عارفة شو اسوي وبروحي انا محتشرة لان الطلق كان قوي ولا يحتمل !!
مع ان مافيني اي مرض بس سبحان الله
يوم اييني الطلق كنت اقووول وين الاكسجين وكنت اصااارخ
وكانت خالتي تشل الاكسجين وتصكه على خشمي وما اقدر اتنفس وهالشي خلا الراس يطلع بدون لا اتعصر ولا شي
اونه الدكتورة تقول لي خلاص وقفي من الشد >>> تبا تشوف اذا الحبل السري ملتف على رقبته او لاء
وطلع الحمدلله بالسلامه وكنت اصييييييييييييييييييييييييييح وحطوا ولدي دقيقه على بطني وشلوه عني عند دكتوور الاطفال
اهنيي زادت دقات قلبي واصييح ومنهااااره
اقول لهم ولدي شووو فيه
اصارخ على امي شوووفي ولدي شو بيسوون فيه
ويبون ينقلوني غرفة العمليات عشان يسوون لي خياطة مارضيت كنت بنزل من الشبرية اشل ولدي مسكوني النيرسات عن لا انزل ويضربني نزيف وتمت الدكتورة تضحك علي
صارخت عليها
ويبون يطلعوني من الغرفة بالشبرية تمسكت في الباب اقول ( اباااااا ولدي ماريد اطلع)
ويابولي اياه اشوفه وبسته على راسه وتطمنت انه بخييير وعقب خليتهم يودووني العمليااات
عقب اكتشفت ان امي سايره وياااي
قلتلها وييييييييييييييييييين سايره عن ولدي سيريله شوفيهم لا يسووون له شي
ولا تخلينهم يعطونه ابره ولا تخلينهم يسووون له شي تراني برفع عليهم قضية >>>> حلفي انتي بس جنه محد ياب عيال الا انتي
خخخخخخخخخخخخخخخخخ
و ودوووني غرفة العمليات وعطوني ابرة الظهر عشان يسووون لي خياطه داخلية وخارجيه ونا كنت واااايد مطرورة و سووولي 28 غرزه 
مأساة والله العظيم
وخلصت كل شي الساعه 9 الصبح ودوني الغرفة حصلت ماما راقده ومجابلة ولدي
قلت حق النيرس هاتيه عندي يعني تيييب البيبي عداااالي اشوووفه
بنااات سبحان الله كان فيني رقاد وميته من تعب
بس والله من يوم شفته ماياني رقااااد ابداااا
مب مصدقه اني ربيت
بس لاتخاااافووون من الربا ترا ربي يمسحج من كل شي وتنسين كل شي ولا كأنج ربيتي
واسمحولي بنات طولت عليكم واللي في خاطره سؤال ولا اي شي يقول
حموودي يالس يصيح برايكم بسير اشوفه
ويتربى في عزكم ان شاء الله
عالعموم الحمد لله على السلاااااااااااااااامه حبوووووووووووبه وتشووفينه معرس ان شاء الله
ويتربى بعزكم ان شاء الله
تعب وراح عننا
شو سميتي البيبي … بشرينا؟
الله يحفظ لج ولدج والحمدلله ع سلامتج