حبيت افتح موضوع مادري لو موجود من قبل بس هو
شو سبب طلاقج ؟؟
كم قعدتي معاه ؟؟
وهل اطلقتي بسهولة ؟؟
عندج منه عيال؟؟
و اي شيء تبون اتضيفونه و اطلعونه من خاطركم فضفو هني مثل ما انا بسوي الحين
ما ادري لو بتذكروني ولا لا بس انا اتزوجت شهر 9 اللي طاف و كنت وايد فرحان وياكم في المدونة و بالذات قسم تجهيز العروس 
المهم و قبل عرسي بفترة قطعت غن المدونة و انشغلت بتجهيزات العرس المهم … عرست في احلى فندق و لبست احلى فستان و احلى مكياج … موضوعنا مب في يوم العرس اللي صار بعد العرس اول شيء ما سفرني شهر عسل و هاذا وانا غبت عن الجامعه اول اسبوعين عشانه … كان يقول يخاف لو سافرنا يصير شيء "بسم الله" موب صاحي هالانسان انا طوفت و قلت مب مشكله بنتمشى في البلاد المهم ما كملنا 5 ايام يا يرد البيت انا كنت عروس و مستحيه منه ما كنت اسولف وايد وياه … المهم رداني بيت اهله و كملت وياه شهر و شوي هو كل يوم يرد من الدوام و يخليني بروحي وما اشوفه الا حزه الرقاد ياخذ اللي يباه و يرقد …. بعدين تاخرت علي الدورة و هو خاف اني اكون حامل قالي انه هو موب مستعد لا نفسيا ولا ماديا ولا معنويا انه يكون ابو…. يابلي التحليل و خلاني بروحي احلل و الحمدالله اني ما طلعت حامل و قالي سيري بيت اهلج انتي تعبانه نفسيا … @_@ انا جيه شوه منو قالك انا مافيني شيء المهم ثاني يوم بعد قال نفس الكلام و خلاني اروح بيت اهلي انا جذبت عليهم و قلت لهم عنده شغل في دبي وببات عندكم …. و كان يوم خميس ولا سال عني ولا شيء و يوم الجمعه قليل متصلبي و يقولي يا فلانه انا مب مرتاح وياج وهاي مب عيشه و انا مستحيل ارجعلج وخلاص ما اباج ولو رجعونا لبعض ما بعاملج كزوج بتكونين مثل اختي ومابا اجوف رقمج ولا اتكلمني ولا اطرشيلي مسجات انا اتريا ابوي و بنهي كل شيء … انا هني انهرت و تميت اصيح ورحت عند امي اصيح والله وكيلكم اسبوع كامل ما اتحرك من مكان بس اصيح ولا اكل ولا شرب ولا رحت الجامغع و صحتي ادهورت بشكل مو طبيعي …. طبعا بعد اسبوع صار كلام الريايل ولاكن للاسف ابوي انحرج وقالي انه ما سار يتكلم مع ريال وابوه يقول حق ابوي انه بنت ما تحب ولدي ولا تكشخ له ولا جدامنا تمسك ايديه ولا شسء @_@ نعم الحبيب وين تبا ابوي ما قصر فيهم وعطاه من الكلام الزين بس استحي اقولكم هني و عقب اونه شو خلهم ياخذون بريك من بعض ويردون يتعرفون على بعض من اول ويديد…. شو رايكم بناات بهالكم !!!!
المهم بعد اسبوعين من محاولاتي في المسجات و الكلام اللي اول مرة يطلع مني انا روحي انصدمت شكلي صدق كنت احبه يطرشلي مسج و يقول يا فلانه كلامج ها كله ما ياثر ولا يهز شعره من جسمي و اللي بينا انتهى اصلا ما كان في شيء من بينا عشان ينتهي …. نفسيتي صارت زفت و ابوي وصل حده وابمي تنرفزت منهم لانه لا امه ولا ابوه يعرفون يادبون ولدهم كل ما امي تتصل بالام اتقول والله انا ماعرف ولدي بلاه … المهم تميت بيت اهلي و عيدت عيد الاضحى عندهم بس قبلها اخر شهر11 متصل على ابوي يبا يكلمني انا قلت يمكن الله هداه و كنت مستانسه لاكن للاسف كان متصل يستهزاء و اخر كلامه قال يا فلانه انتي طالق !!! 
حسبي الله ونعم الوكيل وتميت جي لا محكمه ولا شيء و عقب ابوي سار للتوجيه الاسري كذا مرة وكانو يتصلون في كل الارقام اللي عطيتهم اياها بس ما كان يرد و لا اللي ضحكني اكثر انه هو كان فاتح ملف انه يبا يطلقتي لاكن القاضي ما وافق له عشان جي ما كان يرد عليهم و تمينا جي لين شهر 2 و عقب تحولت القضية لين المحكمه و عاد هناكي سالفه ثانيه و طوييييييييييل عقب لو لقيت تجاوب بخبركم اياها !!! المهم اخر شيء بعد بلبله 7 شهور في المحاكم الحمدالله اطلقت و مرتاحه الحين بيت ابوي معززه ومكرمه و مب مقصرين فيني اهلي …. واكثر شيء احمد الله واشكرة اني ما حملت منه ولا جان الحين صدق متبهذله
ليش زيجات هاليومين تنتهي نهاية غير سعيدة ؟
شي يحزن !!!!!!
الله يعوض صبرج خير وتحصلين أحسن عنه …ريال بمعنى الكلمة يعرف قيمتج
أهم شي الحين تركزين على دراستج …شهادة البنت في ايدها سلاح في هالزمن
ياما مطلقات خذن معاريس احسن عن رياييلهم بالف مره
ما يخصه بالجمال ولا بالجسم .. الاخلاق وقربج من ربج ..
ويمكن هذا كان اختبار من رب العالمين .. وربج بيجازيج ع صبرج .. ما تعرفين حكمة ربج
كل واحد في هالدنيا يدورله ع الاجر .. واللي صارلج ان شاء الله الله يكتبلج فيه الاجر
وان الله مع الصابرين
تقبلي مروري
الله يكون في عونج
والحمدلله انج افتكيتي منه هذا شكله مب صاحي
والله يرزقج بالأفضل منه اللي يقدرج ويعوضج خير ان شاالله
ربي يعوض عليج بأحس ريال في هالدنيا وينسيج هل الايام الي مرت عليج , وربي يهدي شبابنا وشباب والمسلمين,أما عن نفسي فما عندي تجارب لاني مب معرسة فربي يرزقني ويرزقج بزوج صالح
.