فرط الحركة وتشتت الانتباه..

السلام عليكم عزيزاتي،،
هذا الموضوع بخصوص الامهات اللي عندهم طفل أو طفله مصاب بفرط الحركة وتشتت الانتباه، حابين نستفيد من خبراتكم اذا تعرفون عياده او مستشفى معين فيه دكتور متخصص في علاج مثل هالحالات. بس مب اي طفل حركي شوي تقولون عنه مصاب بفرط الحركه، لا، لان هالاطفال تكون عندهم صفات معينه مثل:

• يمل بسرعه
• متسرع
• مخرب
• فوضوي
•عنيد
• صعوبة اتباع الأوامر
• مقاطعة الآخرين
• صعوبة البقاء جالس

انا عندي ولد عمره ست سنوات ويعاني من فرط الحركة وتشتت الانتباه وديته عياده فالشارجه وعطوه أدويه مافيها مواد كيماويه وما لها آثار جانبيه، صارله ست شهور ياخذها ولاحظت تحسن بسيط وبعده مستمر فالدواء وان شاء الله يستفيد وأبشركم يارب، وكذلك أوديه مركز لعلاج النطق لان النطق عنده مب واضح.

شاركونا حبيباتي وخلونا نستفيد من بعض، وربي ان شاء الله يشافي ويعافي كل مريض ويهدي عيالنا ويصلحهم يارب.

في انتظار مشاركاتكن ..

انا ولدى حركى واايد وذكى وكثر حركته

في الصف مخربه عليه كل المعلمات

يشتكون بس ما عرضته على دكتور مختص

الله يحفظهم ويهديهم

آمين اختي.. بالضبط نفس ولدي دوم يشتكون المعلمات من حركته..

انا ولدي عندة فرط حركة وتشتت في الانتباه عمرة 5سنوات يأخذ جلسات في مركز النطق بس ماعرف أدوية تهديه شوية قبل سنه عطيتة مهدي كنت استخدمة في الليل قبل النوم عشان يساعدة على النوم لانه كان مايرقد يسهر لساعات متأخرة يمكن ساعتين ينام ويقوم والحمد استخدمة الدواء ورقد بس مازال يعاني من فرط الحركة
جزاك الله خير طارحة الموضوع وياريت نستفيد من الامهات

جميعا ان شاء الله عزيزتي..

نحن سآعات فالمدارس نواجه حالات من فرط الحركة صعب انه نتحكم فيهآ
مرات نستخدم طرق للتقليل من الحركة أو استغلال حركتهم في شي مفيد

نسوي أنشطة تناسب احتياجات هالطفل
لكن فعلا في أطفال صعب جدا انه يتقبلون وفي منهم تمشي معاهم

اللي جد متعبنا الأهالي لأنه مايعترفون بمشكلة ولدهم ويوم نطرحها عليهم يقولون تمرضون ولدنا غصب
لكن انا مستانسه يوم أشوف انه حد يطرح مشكلة طفله و مؤمن بأن في حالة اسمها فرط الحركة ADHD

أتمنى انه كل الأهالي يكونون مثلكم

تسلمين اختيه.. وهالحاله موجوده فالطب ومثل ماقلتي اسمها ADHD وهالشي من الله ولازم الواحد يرضى بقضاء الله وقدره ويصبر على تربيتهم ولازم الأهالي يتقبلون ويشرحون حالة الطفل للمدرسه عشان يعرفون يتعاملون وياه بالطريقه المناسبه.. بالعكس انا يوم سجلت ولدي فالروضه اول شي خبرتهم عنه ان هو فيه فرط حركه .. ودخلوه حصه كل يوم عند مدرسة التربيه الخاصه فالروضه..