خواتي بدخل في الموضوع على طول .. انا عروس يدبده متزوجة من شهرين و لين الحين ريلي ما دخل عليه لاني اخاف من الجماع !
تعبانه نفسيا والله شاله هم ما يعلم فيه غير الله والناس يشوفونا يقولون مستانسين وماشي احلى عنهم و انا احترق من داخلي كل يوم صياح واكتآب وحالتي النفسية زفتة مع اني احب ريلي ويحبني وعلاقتنا حلوة ومب مقصر ويايه ويحاول ما يحسسني انه متضايج لكن هالشي من حقه و لين متى بيصبر 
المشكلة تستوي لا اراديا غصبا عني مع اني اكون مستانسه ومرتاحه وياه ومب كارهه الجنس لكن اول ما يقرب من الايلاج (اسفة على الكلمة عشان تفهموني) خلاص ينجلب حالي و اخاف و اتوتر و تكون اعصابي مشدوده و اقوله لا لا خلاص مابا بموت ماقدر ويوم يحاول بالقو اتم اصارخ وينكسر خاطره ويهدني وخلاص يفقد الرغبة لان المنطقة تتشنج عندي وتنقفل ويكون الجماع مستحيل !
بعد ما سويت سيرج في النت عرفت ان وايد بنات شرات حالتي و هالمشكلة اسمها الطبي (التشنج المهبلي اللا ارادي) و اسبابها تكون نفسية يعني الخوف يسبب تشنج عضلات المهبل لا اراديا ويسوي مثل الحاجز و حصلت دكتورة متخصصه في علاج هالحالة في السعودية تسوي كورسات علاج بالموسعات وحبوب مهدئة وعلاج نفسي لكن ما عرفت حد عندنا في الامارات
بنات انا طبيعية و احب ريلي و الناس يحسدونا يوم يشوفونا احلى اثنين وعندي الرغبة يعني مب كارهة العلاقة لكن الخوف من هالشي ذبحني وبيدمر حياتي ومب قادره اسيطر عليه ولا اقدر اخبر حد بمشكلتي حتى امي استحي منها و اضحك واسولف جدام اهلي وانا متقطعه
خاطري اتعالج واستوي حرمه خاطري افرح ريلي ويكون عندنا بيبي والله تعبت من نظرة الحزن والانكسار في عيونه تذبحني ويقولي انا وياج وما بتخلى عنج وبنتغلب على هالشي بس انا يأست وبديت افكر بالطلاق عشان ما اظلم ريلي واحيانا اقول يارب اموت و ارتاح من الهم
دخيلكم اللي تعرف دكتورة تعالج هالحالات تخبرني او اللي مرت بنفس تجربتي تشجعني عشان ما ادمر حياتي واذا تعرفون حد عنده نفس المشكلة خبروني كيف اتغلبوا عليها آآه والله تعبت كله دموع وتفكير
نسيت اقولكم اني رحت حق اشطر دكتورة نساء في امارتنا وللاسف ما عندها خبرة ولا خلفية عن هالمشكلة وقالتلي هذا دلع و خوف في راسج تتوهمين و انتي بتدمرين حياتج وحطمتني قالتلي كان عندي مريضتين شراتج وحده تمت سنتين والثانية 6 شهور و اطلقوا ومن هالكلام ! .. مع العلم اني مب ياهل وجامعية وفاهمة و متثقفه ومحد خوفني ولا عقدني قبل الزواج وكنت انصح صديقاتي ان هالشي بسيط ما يعور لكن ما اتوقعت يستوي فيني جيه
والله ايسر لج امووورج حبيبتي
السموحة منج
يعني انتي العيب فيج
انتي اللي خايفه
حطي في بالج شي
لو كان الشي مزعج او مخيف
جان الناس ماتزوجو ونحن مايينا فالدنيا
ترا الم بس ف ساعتها عقب عادي كنه مصار شي
مسكين الريال معرس يبا ستر
عقب اذا تميتي جيه بيمل
بالتوفيق