طالبتكم الدعاء له الله يخليكم … لتربية الطفل

أنا عضوه جديمه عندكم بس دخلت بنك نيم يديد لآني حابه افض فض وما أبي حد يعرف شخصي بحكم الكلام اللي بقوله ومحتاجه منكم الدعاء لي ولزوجي حبيبي
بنات أنا متزوجه من 12 سنة تقريبا ريلي خذينه عن اقتناع وكنت أحبه تزوجت وعمري 15 سنة وهو خطبني قبلها ب 3 سنوات يعني كان عمري 12 سنة وطبعا هو اختارني وهو طلب من هله أنه يخطبني وهو ما شاء الله عليه أوسم شاب عندنا في العايله و أغلب بنات العايله كانو حاطين اعيونهم عليه الا أنا لاني كنت اصغيره ومب في بالي هالاشياء حتى يوم ياه يخطبني أنا على بالي أنه ياي يخطب أختي خخخخخخخ وأنا صرت من نصيبه هههههه. يعني أول ما فتحت عيني لقيته جدامي وشفت فيه الحب والحنان والعطف .. هو يوم خطبني كان الوالد الله يرحمه عايش وعطاه كلمه بس يترياني لين اخلص الثانويه وقال ماعليه بصبر لو 10 سنوات كان يحبني وايد .. وعقبها بسنتين توفى الوالد الله يرحمه و صارت أمي الوصيه علينا وعقبها بست شهور تقريبا اتصل على أمي يتخبر عن الموضوع ولو أنه في مجال أنه يتم الزواج قبل ما اخلص الثانويه وكنت أنا في بداية الصف الاول الثانوي وأمي واقفت وتم العرس في الاجازه الصيفيه من سنه 1999 .
حبيباتي أنا يوم تزوجته ما فكرت فوضعه المادي ولا فكرت في جنسيته ( هو مب مواطن وأنا مواطنه) ولا شي بس كنت افكر اني ابي اعيش وياه واكون قريبه منه واحبه ويحبني .. وعلى فكره في نفس الوقت اللي هو كان خاطبني يعني عقب ما توفى الوالد ياو اثنين من هلي يخطبوني وهم ما يدرون عن خطبتي لانها تمت بيننا وكانو هالاثنين كل واحد يقول الزود عندي من جواز و ومستواهم التعليمي والمادي وكنت بعيش قريب هلي وغيره فهالشي اللي خلى ريلي يستعيل على موضوع الزواج خايف لا أطير عليه هههههه ويغيرون هلي رايهم .. بس أنا اخترته هو لاني حبيته وحبيت قلبه.. تم الزواج الحمد الله ويلست اسبوع فالبلاد وعقبها سافرت وياه لبلاده ( أقصد في بلاده مب البلد اللي ماخذ جنسيتها لا البلاد اللي ولد فيها وتربى وعاش وهله كلهم مستقرين هناك ولله الحمد وهي دوله خليجيه قريبه منا ) وسافرت أمي وياي وتمت يومين وسافرت تخيلو من كثر ما احبه واغليه وهو اغناني عن الدنيا وما فيها ولا دمعه انزلت من عيني يوم سافرت امي وحسيت بطمأنينه وراحه مع أني كنت بغربه وأول مره أبعد عن هلي ..
زوجي ما قصر وياي ولا حسسني في يوم بالنقص ولا أنه محتاج واي شي اطلبه أوامر عنده كان يعاملني مثل الملكه والله ما كنت عايشه بهالشكل في بيت هلي .. تدورن أنه ما كان عنده سياره في بداية زواجنا بس كان يوم أقوله ابي اطلع اتمشى يطير يستأجر سياره بس علشان يراضيني ويدلعني .. وزوجي شايل مسؤولية هله من هو صغير ترك دراسته وهو في إعدادي واشتغل وهو عمره 17 سنة لأنه هله كانو وايد محتاجين … وحرم نفسه من الدراسه ومن أنه يشتري سياره ومن أشياء وايد كانو ربعه يسوونها بس علشان ما يشوف أمه متضايقه أو محتاجه .. وكنت كل ما أريد أروح لهلي يطرشني ولا يشتكي لي من وضعه بس أنا كنت أحس فيه فديته وما كنت وايد أضغط عليه مع أنه دوم يقول لي ابيج تكونين راضيه علي وادري أني مقصر وياج يالله يا حبيبي والله مب مقصر فشي بس شوفتك مستانس تسوى الدنيا وما فيها .. وكنا عايشين على قدنا بس كنا مستانسين ومرتاااااحين راحه الله يعلم بها .
المهم يا بنات عقب زواجي بشهرين سجلني في مدرسة وشجعني على أني أكمل دراستي ودرست ثاني وثالث ثانوي وتخرجت وكأنه هو اللي تخرج طاير من الفرحه فرحته كانت أكثر من فرحتي كان يفتخر فيني ويمدحني جدا م هله يدلعني وسوا لي حفله صغيره فالبيت .. اهله ناس واااايد محترمين ناس فيهم الخير وطول 10 سنوات عشت فيها عندهم في غرفه وحده عمري ما تهاوشت ولا تزاعلنا ولا مره وياهم وما يحبون يتدخلون في شؤونا لو شو ما صار والحمد الله أنا أحبهم واشتاقلهم وايد ووقفو وياي في الفترة اللي كنت أدرس فيها والمسكينه أم ريلي عمرها ما قالت لي تعالي اشتغلي والا اطبخي مع انه هي الي كانت شايله البيت وما عندهم بشكاره وأنا كنت متفرغه حق دراستي .. وعقب ما تخرجت سافرنا تايلند وهي اول بلاد أسافر لها عقب البلاد اللي عايش فيها ريلي وكانت هديه من ريلي لاني نجحت ولا فكر في ظروفه بس فكر في انه يشوفني مستانسه فديته … اصر ريلي أني أكمل دراستي الجامعيه دام انه عندي مجال وللحين ما يبنا عيال وتشجعت وسجلت فالجامعه وفي السنه الثانية حملت في ولدي وربيت ويابني عند هلي وأنا فالتاسع علشان أربي عند أمي وأخذ اجازه بدون راتب من الدوام بس علشان يقعد وياي طوال الفتره وما يخليني ولا دقيقه وكان يحس فيني وبالامي وحتى يوم الولاده تم وياي وقعد يصيح كل ما يشوفني اتألم و الله دموعه غاليه علي واااايد ..
وعقب وقفت كورس وكلمت فالكورس اللي بعده وولدي كنت أحطه عند أم ريلي كانت تهتم فيه شرات عيالها واكثر لدرجه أنا ما كنت اتصل ولا اسال عنه لآني متطمنه عليه وحتى يوم كنت ارجع الظهر كنت اروح أرقد واخليه عندها خخخخخ ويهي لوح … وعقبها بسنتين تخرجت من الجامعه بس قبل ما اتخرج بست اشهر تقريبا شغل زوجي انهو خدماته واضطر يدور له على وظيفه ثانية بس مالقى طبعا لانه ما عنده جواز البلاد ولا عنده شهاده وعقب ما تخرجت فاجأني بسفرة ماليزيا كهديه منه وانه هو ما يبي يحسسني انه الوضع تغير يا قلبي عليه ومنها رحنا وغيرنا جو مع ولدي وهو شوي بعد كان متضايق من وضعه بس ما يبي يحسسنا .. ومرت الايام والحين أنا متخرجه وهو ما يشتغل وفوق هذا هو شايل مسؤوليه هله ومصاريفهم غيري أنا وولدي يعني حمل ثقيييييل على ظهره المسكين .. فكرنا نرجع الامارات لانه يمكن الفرص تكون أكثر بحكم أني مواطنه ويمكن ألقى وظيفه بس هو فكر في هله وما يقدر يتخلى عنهم أنه بيحاول بس علشان ما يحسسهم بالقصور .. وأنا حاولت اني اقدم على جهات تقبل أوراقي والحمد الله فيه جهه اطلبوني عقبها بشهرين وكانو يبون أني اشتغل فترة ست أشهر بس وبراتب 4000 درهم بس وتوكلت على الله واشتغلت مع انه الراتب ما كان يغطي كل شي بس الحمد الله على كل حال ومنها كان ريلي يصرف من فلوسه اللي كان مجمعهم طول سنوات شغله إذا نقصنا شي.. وعقبها بست شهور طلب مني المدير اني اتعين عندهم لانه اعجبه شغلي وكنت ملتزمه بالعمل وصار راتبي 8000 لاني خليجيه وهني فرحنا وقمنا نجمع شوي وفوق هذا كنا ندلع عمرنا وحاسين بالراحه … وعقبها بسنيتن شجعني ريلي على اني اكمل دراساتي العليا واقترح علي اني اقدم على بعثه للخارج وانه وضعنا راح يتغير عقب التخرج وبيتحسن مستوانا المعيشي .. فكرنا في الموضوع وقدمت على البعثه في بلادي وقبلوني وتيسرت الامور ( على فكره البعثه كانت بس تصرف على دراستي وتعطيني راتب اعزب ما يشمل لا تذاكر زوجي ولا المصاريف لانه زوجي مب مواطن ) وفوق هذا ريلي ما تحطم وقال مب مشكله اهم شي نوصل لهدف وأكمل دراستي وأنه بنرتاح عقب وانه راح يتكفل بمصاريفه هو ولدي وكان عمره 5 سنوات من حسابه . مشت الامور ميه الميه وتركت شغلي وسافرنا وفي نفس الفتره كنت في بدايه حملي في بنتي الله يحفظها .. وريلي ما نسى هله بس خف عليه الهم يوم اشتغل اخوه وقام يساعده شوي بالمصروف وعقبها اخوه تزوج وعقب زواج أخوه تطمن على امه .. وترك لهم مصروووف حق الفتره اللي بيكون فيها بعيد عنهم .. والغربه كانت وايد صعبه علينا وزوجي كان وايد مهموووم وكان يجلس في البيت بروحه طول الوقت تقريبا وعقبها بشهرين حاولت اني اسجله في معهد للغه ومنها يغير على عمره ما تأقلم زوجي في الوضع وتم يوسوس وايد ويتذكر هله و تغير طبعه وصار وايد ضعيف وساااكت طول الوقت وكان المصروووف ما يكفي وهو يصرف من عنده وتدرون اشقايل الوضع المادي يأثر على النفسيه .. مرت الشهورو دخلت الشهر التاسع ووقتها ولدي مرض لانه ما كان عاجبه الوضع وكان يشوف ابوه بالهطريقه فكان فديته كله يبي يرجع ويعد الايام وجيه وانا تعبانه من كل شي حولي أفكر فدراستي والا ريلي والا ولدي والا فولادتي الحمد الله على كل حال ولدت ويبت بنوته قمر شوفتها تشيل هموم الدنيا من قلوبنا .. وعقب ولادتي بعشرين يوم قررنا نرد البلاد ترتاح فتره شهرين وكانت الاجازه الصيفيه .. في هالفتره كان عرس أخوي وأنا ما كنت مجهزه ولا شي فديتها امي ما قصرت شرت لي فستان تكفلت بالصاون والتجهيزات لي ولعيالي لانه ظروفنا كانت وايد صعبه والحمد الله على كل حال .. وزوجي فديته كان وايد يتضايج ويتم يقول لي أنا وايد مقصر وياج بس يكفي انه راح وياي الغربه وتحملها بس علشاني هذي تسوى عندي بفلوس الدنيا .. وسرنا عند هله ويلسنا ومرت الشهرين وولدي تعب زياده وضعف وريلي كانت نفسيته تعبانه أكثر وتغير طبعه وااايد وتم مهموم وما كان يضحك وايد لانه يخاف من اللي بيصير فالايام اليايه لو خلصت فلوسه وما عنده شي يصرف منه .. ياه وقت السفر وكنه يوم مصيري ولدي تم يصيح وريلي ضايقه فيه الدنيا قررت في نفس الساعه اللي طالعين فيها للمطار اني اكنسل كل شي وما ارجع بس اشوف ريلي وولدي مرتاحين حتى لو اضحي بدراستني يكفى أنهم يبتسمون في ويهي والله .. وتمينا عند هله أنا اقدم لي على وظايف وهو قعد يدور له لحد ما الله يسر لي وظيفة في بلادي هني فالامارات عقبها ب 5 شهور سبحان الله وبراتب حلو .. استانسنا حمدنا الله اننا بنستقر اخيرا .. ويينا وخذينا لنا شقه وولدي سجلته في المدرسه وشغلي حلو .. بس انحلت مشكلتي أنا وولدي بس ريلي فديته مستانس لنا بس اعرفه في داخله متضايج أولا بعيد عن هله والشي الثاني قاعد يدور له على وظيفة مب لاقي بحكم أنه ما عنده شهادة ولا عنده جواز والله يابنات حتى قعد يدور على وظيفة سايق ما لقى أصلا ما يرضون ياخذون أوراقه لدرجه كان يروح يقول لهم أنا بشتغل بدون راتب بس خلوني اشتغل يا قلبي عليك والله وهالشي يأثر عليه وعلى نفسيته تعب واايد وتأثر صاده الثعلبه في راسه وقام يتضايق من أي شي وما صار شي يعجبه وحتى عياله ما قاعد يحس في وجودهم موجود بس عقله مب موجود اللهم ارحمنا برحمته والله يقطع قلبي ودي اساعده ودي اسوي له شي بس مب بايدي والله انا اشغله اطلع وياه واغير عليه طول الوقت اقعد اسولف وياه بس مب هو اللي كان يضحك ويسولف ويتغشمر .. شكله تغير صارت دموعه تنزل وهو يسولف صار انسان ضعيف ومكسوور في داخله والله يعور قلبي عليه .. دوم يقول لي انا ما عندي حد اقعد ادور مثل التايه ما اعرف وين اروح وين ايي .. صارت تطلع منه تصرفات وكلام ما يدري عنها ويتم يتاسف انه غلط .. والله بنات مب قادره اكتب تعبااانه اشوف ريلي حبيبي اللي الضحكه ما تفارقه صار هذا وضعه الحمد الله على كل حال .. اللهم أجرني في مصيبتي واخلفني خيرا منها يا رب …
بنات ما ابي منكم الا الدعاء حق ريلي حبيبي أنه الله ييسر له أموره ويصلح حاله ويرد لي مثل قبل وأحسن واحس بوجوده في حياتي واعيش وياه براحه بدون هموم والله يوم اتذكره قبل اقعد اصيح على وضعه فديته ما يستاهل والله ..

واسمحولي حبيايبي على الاطاله ويزاكم الله خير

والله كريم ^_^

الحين خلي الدور عليج انتي
خليه يدرس احسن وتكون عنده شهاده وقفي معاه مثل ما وقف وياج

عشان تتحسن ظروفكم ا كثر واكثر والله يريج عليكم

كثروا من قرايت سورة البقرة والاستغفار

الله يعينكم ويآجركم

واكيد هذا ختبار مثل ماقالت اختي ام خماس