الصراحه أنا وصلت حدي 
البارحه حضرت عرس وحده من ربيعاتي
وكان مكياجها أبداااا مب شي مطلعنها شرات أم الدويس ( أستغفر الله )
وكان أوفر والبودر متشقق وحالته حاله …!!!
وروحها كسرت خاطري .. هب مقتنعه بشكلها ..
وسرنا غسلناه عن ويهها قبل لا يشوفها حد لأنه جد مب شي يلوع الجبد
ونيي أنا والبنات ونقبضها ونعدلها قبل لا يوصلون المعازيم
لأن الماكييره خذت بيزاتها وفلت ( حسبي الله عليها )
خذت عنها 7000 وقسماً بالله ما يستاهل درهم واحد ..
وعدلناها روحنا ( والحمدلله طلعناها قمر ) 
ويلست تصيح يوم شافت الميك آب اليديد
تقول وينكم عني قبل لا أفرر بيزاتي عند هالـ …….. !!!
تصدقون مكياجنا الكل تخبل عليه
ونحن ما استخدمنا غير أشياء بسيطه …
لا وعـ السريع بعد ..
يعني الحين أبي أفهم شي واحد بس
اشحقه 5000 و 10000
اشحقه هالأسعار جاوبوني!!!!
يعني أنتوا الحين بتشترون المكياج وغيره
بتصبونه مثلا كله على ويه العروس
شوه حالفين تطلعون جيمته !!!!!
من الله قطرتين من كل شي …
اشحقه أنتوا ما تخافون ربكم !!!
وين بتسيرون عنه ؟! ما تتريون حساب في الآخره ؟؟؟
أقول لكم شي واضح وصريح وبدون زعللل
وهذا قول رب العباد
قال تعالى :
(إِنَّ الْمُبَذِّرِينَ كَانُوا إِخْوَانَ الشَّيَاطِينِ) (الإسراء:27)
من أنفق درهماً في حرام فهو مبذر،
ويحجر عليه في نفقته الدرهم في الحرام،
ولا يحجر عليه إن بذله في الشهوات إلا إذا خيف عليه النفاد
(إن المبذرين كانوا إخوان الشياطين) أي في التبذير والسفه وترك طاعة الله وارتكاب معصيته؛
ولهذا قال: (وكان الشيطان لربه كفوراً) أي جحوداً؛ لأنه أنكر نعمة الله عليه ولم يعمل بطاعته،
بل أقبل على معصيته ومخالفته
يا بنات تبون شوري
اللي بتعرس أحسن لها تحط مكياجها روحها
أو تروح حق الصالون وتقول لها حطي لي مكياج اسبيشل بدون لا تقولين لها أنج عروس
وفكي عمرج من صدعة الراس
أنا ما بفر بيزاتي ع أشياء تافهه !!!
في ناس ميتيين من اليوع مب محصلين شي ياكلونه
ونحن بالآلاف يالسين نصبغ ويوهنا …
اللهم اهدنا واهدِ بنا، وأصلحنا وأصلح بنا، اللهم آت نفوسنا تقواها،
وزكها أنت خير من زكاها، أنت وليها ومولاها..
كل واحد محاسب من وين ياب فلوسه و في شو صرفه
الله يهدي الجميع
