شو سالفة المدارس ها السنة للطلاب

السلام عليكم خواتي . مثل ما تعرفون صدعة البحث عن المدارس بدت من شهر 12 و للأسف الي الحين ما حصلت و لا مدرسة لبناتي و لاستغلال الي المدارس بدت تمارسها ع الأهالي ما ينطاق. طبعا أتكلم عن دفع فلوس للحصول على ورقة تسجيل الطالب الي يتراوح بين 500 إلى 1000 درهم للورقة . يعني ما يعطوج موعد للأمتحان إلا بعد الدفع. الحين في حالة عدم قبول الطالب يردوا الفلوس ؟؟ طبعا لا . الي قرأته في الإمارات اليوم انه الأهالي اشتكوا لوزارة التعليم بخصوص ها الموضوع و الوزارة أنكرت معرفتها بهذا الأمر و قالوا انه المدارس ليس لها الحق انه تأخذ مبالغ من اوليأ الأمر قبل قبول الطالب . الحين سؤالي خواتي عندكم فكرة عن ها الأمور هل لو كلمت الوزارة و اشتكيت على ها المدارس بيتخذون خطوة و لا بيطنشون لأني الي الآن دافعة ما يقارب 3000 درهم للمدارس بس عسب يمتحنوهم . و لا في مدارس يستهبلون و الله اونه هم خلص التسجيل بس ادفع عسب أحجز دور إذا في حد سحب اوراقه الي ها الدرجة يتحرونا أغبياء و على فكرة أنا أتكلم عن مدارس في منطقة خليفة أ .
و أسفة ع الإطالة بس فيني حره

ماعندي فكره انتي تقصدين المدارس الخاصه
اكيد في رسوم تسجيل والاغلب ما يرجعونه

صدقج مدارس الخاصة بس تاخذ فلوس نجح ولأ ما نجح بس هم مستفيدين في هذا شئ

انا بعد مريت بها الشي
سجلت بناتي ودفعت فلوس في أكثر عن مدرسة
وآخر شي يقولون مافي مكان او ما نجحت في الامتحان
أحسه كله أعذار

الله يعينكم احسهم بس يستفيدون من ورانا

قانون من هيئة المعرفة وأنا بنفسي متصلة فيهم أتأكد لأن مدرسة عيالي رفعوا رسوم حجز المقعد من ٥٠٠ درهم لـ ١٥٠٠ درهم لكل طالب وأنا الله يحفظهم مب واحد ولا اثنين كيف ادفع مبلغ فوق الـ ٥٠٠٠ بس حق تسجيل مقعد في شهر وأنا علي التزامات ثانية!!

اتصلت الهيئة قالولي المدرسة لها الحق تاخذ ٣٠٪ من الرسوم الاجمالية كدفعة اولى غير مسترد في حال غيرتي رايج وما تبين المدرسة هذا للطالب المستجد والطالب الموجود اصلا ف المدرسة ١٠٪ من اجمالي الرسوم

ويوم قلتلهم عن المبلغ اللي طالبتنه مدرسة عيالي قالولي هذا شوي مقارنة باللي المفروض يطلبونه!!

طيب يا جماعة الخير انا مب واحد ولا اثنين في المدرسة وعلي التزامات وديون بعطيكم شيك مؤجل بالمبلغ عشان تضمنون حقكم! ما طاعوا واضطريت اني ادفعلهم المبلغ كامل وأأجل باقي التزاماتي!!

الله يعينا ويساعدنا على المدارس ماهمهم غير الفلوس