عندي استفسارات كثيره بخصوص السفر الى اوروبا …لاني محتاره وايد ومب عارفه وين اسير بالضبط …………بالمختصر المفيد متوتره وايد
هاي اول مره ريلي بيسافر اوروبا ..وانا سبق اني سافرت لكن طبعا مع شخص من العايله …
سفرتي بشهر العسل بتكون من 5-1-2017 الى 4-2-2017 ….يعني شهر بالضبط
وان شاء الله بننزل في سويسرا ….ومخططين انزور فيينا + ايطاليا + فرنسا واحتمال ألمانيا …الله يستر من البرد القارص 
اتمنى من العضوات اللي سبق وسافروا لهاي الدول ….يعطوني من نصايحهم …ويخبروني عن الاماكن الحلوه لكل دوله …وانسب المواصلات المستخدمه ..
اتمنى ما تخذلوني ..
انا سرت شهر العسل سويسرا واستانست وااااااااااااااااااايد
الغاليه عنـــــدي رقم واحد في سويسرا دريـــــول اصله سوداني وعايش هناااااك اذا بغيتي الرقم طرشيلي رساله على الخاص
ماادري اذا بتقدرين تتحملين جوهم في عز البرد وبتستانسين وبتقدرين تطلعين
عالعموم
بالنسبة لسويسرا تقريبا معظم مناطقها حلوة جدا
احلى مناظر طبيعية اوربية بتحصلينها في سويسرا
انا سرت زرمات، وانترلاكن، ولوزيرن وكلهم عيبوني واستانست فيهم وايد
وبالنسبة للمواصلات
مواصلاتي في اي دولة اوربية كانت تعتمد عالقطارات
انسب وسيلة بالنسبة لي واسهل واريح
وفيها درجتين، الدرجة الاولى والسياحية
اذا شفتوا الدرجة الاولى غالية خذوا السياحية لان سعرها في متناول الجميع
وقطارات اوربا فخمة جدا ومريحة وفيها خدمات للاكل وتقدرين تنامين فيها وتشوفين المناظر الخلابة اللي ما تخلص
وبالنسبة لايطاليا
انا ما عيبتني وايد بمقارنة الدول الثانية اللي زرتها والمناظر الطبيعية اللي فيها
لكن فينيسيا (البندقية) منطقة حلوة ورومانسية وتناسب الاثنين اللي يكونون في شهر العسل
فيينا
حلوة وفيها عدة اماكن للطلعات وتغيير الجو
وفيها شوبنق حلو
فرنسا
من احلى الاماكن اللي سرت لها واستانست فيها
باريس ماتعتمد على المناظر الطبيعية لكن على اسلوب الحياة عندها
باريس حلوة وشرحة وايد وتدخل النفس
فيها وايد اماكن للطلعة
بتحصلين يورو ديزني
برج ايفل
جولة بالمركب في النهر
الاماكن التاريخية والقلاع
شارع الشانزليهيه
وواااايد اماكن ثانية
مثل ما تعرفين البرد وايد شديد في هالبلدان الي ذكرتيها في الشتا و خصه سويسرا مغطايه بالثلج ..
و نصحتج بايطاليا و اسبانيا . لنه هالوقت يكون جوهم حلو في المناطق الجنوبية ….. سيروا هالدولتين لنه الباقيات ما بترومون تطلعون من الفندق فيهن … اخاف تسيرون و تخربون رحلتكم … (بنت عمي سارت هالوقت شهر العسل ايطاليا و اسبانيا و قالت انه الجو يجنن ) انا نقلت لج تجربتها لني ماسرت هالوقت .
و اذا تبين معلومات عن فيينا شوفي تقريري … اول صحفه و عقب مكمله عن سالزبوغ و زيلامسي و ميونخ