شليت ولدي عن ابوه و لقيت عليه كدمات و جروح لتربية الطفل

هذي مشكلتي الي كتبتها لكم

طبعا قلتلكن اني لقيت وظيفة في ابوظبي و الحمدلله و كان غايتها ابه اشل ولدي بس كان لازم ادور سكن لي و لولدي

طبعا كلمت معلمته و قلتلها اني بشله بس ابه ادور شقة

قالتلي ولدج مضروب انه اتحسب ضرب خفيف يعني اونه ابوه معصب عليه

المهم بالباجر امي راحت المدرسة و ما لقته مداوم

اختي كلمت المعلمة و قالتلها ما داوم الولد

بعدها اتصلت الاخصائية من الدعم الاجتماعي قالتلي تعالي المركز مال الدعم الاجتماعي قلتلها ليش قالت ارحمي ولدج تراه مضروب
انا ياخواتي والله العظيم ما توقعت ابوه يضربه بهشكل
كنت في ابوظبي و ولدي في العين

قلتلها الحين بييي

رحت عند المسؤول طلبت اني اطلع قال روحي بس بياثر في التقيييم

واااااايد كنت مسرعة و اصيح في السيارة
و اقول فخاطري انتي شو سويتي فحايتج
دايمن بروحج و ما عندج غير شي واحد ما بيتخلى عنج ولدج

كل الناس تخلوو
اخوي ما واقف معايا و لا احد و طبعن انا ما قلتلهم اني بروح اشل ولدي

وصلت عند الدعم الاجتماعي بصراحة تميييت يالسة في السيارة ربع ساعة ما قادرة اتحرك

يلين وحدة من ربيعاتي تعرف سيارتي وقفت و يت عندي
فرحت و الله عيوني مدمعات

حبيبتي ميمي والله ارتاح قلبي شوي قلتلها السالفة

انا احس استمديت القوة منها

عطتني كم نصيحة و قالتلي دخلي

و اهم نصيحة قالت لا تسكتين عن حقج مثل اول

دخلت

دخلوني عن واحد عنده دراسات اسلامية تم ينصحني
و انا اقوله ما بخلي ولدي
و هو ينصح و الاخصائية معاه
و انا ابه اصرخ و اقول خلاص خلاص بشل ولدي

انا كل الوقت افكر ولدي وين

قالو انهم متصلين بالابو من ساعتين

بس ما وصل

اتصل مرة ثانية قال انا قريب

لما وصل كنت يالسة في الاستقبال شفت ولدي معاه رحت مسكته و حبيته و ولدي حضني قلتله تبه تروح وياييا قال هيه اباج ما اباهم بابا ضربني وايد

قلتله وين قال في ايدي و ظهري
كان يال جدامي
قلتله ليش ضربت ولدك
سكت ……
بعدين قال انا قلتلج شليييه انتي ما رضيتي

عكس كل الموازيييين

بعدها زقروووه عند الرائد دخل

و انا اشوف ايد ولدي قالي ماما ظهري
لما شفت ظهره شهقت و تميت اصيح و الوي عليه

خواتي واااااااااااااااااااااايد ضرب مبرح

رحت و دخلت على الرائد و مطلقي و تميت اهاده و هو ما عارف شو يسوي و لا كلمة نطق

و االرائد شهق قال كيف تضرب ولدك جي

و تميت اهاده
حرام عليك اخر شي قلتله يعلك ما تتوفق في حياتك جان اتسوي جي بولدننا
مرتين
اخر شي وايد قلت حتى ما اذكر من كثر الانفعال

حاولو يخلوني اتفاهم معاه ما طعت

قلت والله ما اتنازل عن حقي
المهم الحين الولد عندي و رحت المحكمة ارجعه فحظانتي
و طبعا الخايس ما يه و فاجلوها يوم ثاني

رحت الطواري و خليتهم يعطوني تقرير بحالة ولدي

المهم الحمدلله عدت على خير قال الدكتور ما فيه كسور

تخيلن ولدي يومين ما يقدر يمسك شي بايده
و ظهره داويته و الحمدلله العلامات قربت تخلص
قالي ماما ضربتني ……. حرمة ابوه قال ضربتني بالنعال على ويهي و ضربتني بجرج التلفون و تقرص ويهي عشان اصيح و تقوله يلا صيح صيح و بعدين تقول حق باباتي ولدك يسوي مشاكل
قال ماما انا ما سويت مشاكل الله لا يوفقها ……. و يقول ماما هي تسبج و تقول عنج …….. كلام ما ينقال
و يقولي ماما انا خلاص سامحته باباتي تخيلن شوفو كيف سبحان الله

ادعلي يا خوواتي اني اربي ولدي تربية زينة لانه ولدي وايد ذكي و يفهم و ما شاء الله عليه وايد يسال و يعرف يكتب الحمدلله

و صدقني ان شاء الله بيطلع احسن واحد و بفتخر فيه
و عطني نصايح عشان حالته النفسية

حسبي الله عليهم

ربج مايضرب بعصا

اختي عن نفسية الياهل ترا اهم شي خلج قريبة منه لانه يحس بالامان
واسمعي كل شي يقوله
وعلميه انه ابوه مهما سوى فيه بيتم ابوه
انا انصحج انج تطلعين معاه الالعاب و الا الحديقة وتلعبي معاه
تعطينه هدية اذا سوى الشي الصح
خلي يكون علاقات مع اليهال اللي فعايلتج

و ربي يوفقج

والله ينصرج عليهم

خذي التقرير من المستشفى و اشتكي ف الشرطة مع تقرير الشرطة انتي دخلتي المركز بس خذي التقرير منهم وطالبي بحقج
و سيري المحكمة

اليوم ضاربنه باجر بيجتله وخذي حق الحضانه كلها لج

الله يعينج مب بشر هذا

وخلى علاقتج مع طلقيج عادية لا مسجات ولا اتصالات ولا تردين عليه لو حاول يهدد او يتوعد او اي شي لا تردين عليه ابدا و طنشيه وايد لو عق عليج كلام خلج باردة و غيري رقمج لو ترومين عسب تفتكين من حشرته