السلآم عليكم ورحمة الله وبركاته ~
خواتي الغاليات ..
كل وحده تحب تهتم افعمرها وعندها روتين عنايه ومنتجات خاصه
وتجارب وخبرات من هالناحيه ..
فاشرايكم نتشارك .. 
كل وحده تذكر لنا كيف تعتني بنفسها
عنايه الويه والجسم ..
سواء يومياً ( الصبح والمسا )
واسبوعياً و شهرياً سو تسوي ..
واليد والرجل والاظافر
وما ننسى كل وحده تذكر لنا نوعية بشرتها وجسمها
عسب الكل يستفيد ..
رجاءً : الردود نبغيها مفيده عسب ما يضيع الموضوع بردود غييير
وجزاكم الله كل خير .. 
// مختلطه ( جافه حول الوجه و التي زون دهني ) //
الروتين اللي يعيبني
١- غسول nuxe أو نيتروجينا بفرشاة الوجه صباحاً || صابونة كبريت البحر الميت بفرشاة الوجه مساءً
٢- تونر ( مكعبات ثلج ) وتكون طبيعيه نفس ماء البطاطس او منقوع اعشاب صباحاً || تونر جاهز nuxe مساءً
٣ – مرطب من كلينك فيه واقي شمس مع مرطب العين من كلينك صباحاً || سيروم ميد نايت kiehl’s / زيت ارجان للوجه والرموش والشفايف والعين ..
عندي بعد مرطب الآكاي للوجه من kiehl’s اذا بحطه صباحاً قبله لازم واقي شمس عندي من لاروش بوزيه ..
وان شاءالله من يوصل جهاز كلاريسونيك من روتيني المسا
اسبوعياً :
– قناع الجيلاتين والحليب ( ينظف الرؤوس السودا والبيضا )
– مقشر الشوفان أو مقشر البحر الميت للوجه
– ماسك العسل والروب واي اضافات تخطر ع البال / ماسك طين البحر الميت
~ اذا مزاجي رايق : ادهن ويهي بزيت واتعرض لبخار مضاف له اعشاب ~
يومياً * جسمي * :
صباحاً : – الدراي سكراب بالفرشاه الخشب – شور كريم دوف انعم شي ع البشره – وتونر الورد وترطيب اي نوع اهم شي لوشن خفيف
مساءً : – صابونة الفحم من lush و ارش جسمي بماي زهر وترطيب مغذي يعني كريمات فيها زبدة الشيا نفس لوكسيتان وعادي اضيف معاها اي زيت ..
اسبوعياً الثلاثاء والجمعة :
١- شور كريم – سكراب جاهز Rub rub rub من ush – تونر ماء الورد – ترطيب
٢ – شور كريم – سكراب صابون مغربي او ملح البحر الميت بالقفاز – شور كريم – تونر الورد – مرطب
شهرياً :
حمام بأملاح البحر الميت العطريه والرغويه ثم خطوات رقم ٢ ..
واذا الواحد يبغي يدلع ومزاجه انوثي مع الاملاح نضيف الببل باث من lush
بس انا ما احب استعمل شي فيه عطور وايد لان جسمي يتحسس وينشف بسرعة منها
وبعد بس توصل كلاريسونيك بضيفها لروتيني بستعملها مع سكراب كريمي او عادي مع الشور الكريم ..
١- مرطب يومي بنهار ( كريم لليد والاظافر بزيت اللوز من بودي شوب ) فيه spf15 || ومرطب ليلي مغذي نفس الجسم او كريمات ثجيله نفس مجموعة زبدة الشيا بلوكسيتان او خاصه بالبشره الجافه من lush ..
اسبوعي :
– اغسل ايدي وريلي بصابون باث آند بودي ووركس / مقشر جاهز بالاملاح واسكرب بالفرشاه الخاصه / يا افرك بليمونه او احط ماسك من سيفورا head to toe cream
وعقب مرطب
وهالشي ممكن نسويه للركبه والكوع بعد لانهم يحتاجون لعنايه كبيره بعد
– مرطب خفيف يومي من بيزلين || و ثقيل ليلي ( زبدة شيا من لوكسيتان + زيت ارجان)
اسبوعي :
– ادهن بزيت زيتون ثم تقشير من lush بفرشاة اسنان ثم ماسك العسل
– التمضمض بزيت الزيتون ع الريج
– السوااك
– تفريش الاسنان وتنظيفها مرتين او ٣ مرات باليوم
واضيف للمعجون اشوية عسل
اسبوعي :
– افرشها ب ( عسل و ليمون وزيت زيتون )
– بديكير ومنيكير والحمدلله انا ما اطولها اسبوعياً تقريباً
لازم اقصها وتكون مرتبه ونظيفه والمعها ..
والجلد الميت اللي حول الظفر بين فترة وفترة حسب المزاج ..
خصه اني الحمدلله ما احط مناكير وايد احاتي الصلاة 
ع فكره الاظافر الطويله تتيمع فيها بكتيريا وفطريات
مستحيل لو شو تنظفينها تخوز ومن جي اطباء الجراحة ما يطولون
ظفرهم ولازم تعقيم دوووم
فبصراحة ما احب اطولها
خصوصاً تكرمون اذا الوحده عندها الدوره وظفرها طويل
اسمحوا لي !!!!!! قذاره اشوفها
والله يهدي كل بنت اطولها وتصبغها للزينه خارج البيت
وهذي العنايه لج اولاً ولزوجج ثانياً اما لأسباب غيرها حرام
فأبري ذمتي ما احلل التطبيق ويارب الله يهديني ويهدي بناتنا ويبعدهم عن فتن الدنيا
واللهم اجعل أكبر همهم الآخره واجلعهم من عبادك الصالحين