اللهم صلى وسلم على محمد وعلى اله وصحبه وسلم
خرجنا انا وصديقتي الي الحديقه وكانت معها خادمتها
اللي اتعودت اشوفها تشتغل مثل النحله والابتسامه ماتفارقها حتى وهي تعبانه
ولكن اليوم اشوفها يالسه بعيد تحت شجره وحاطه راسها عليها وتنظر نظرات شارده
كانها لا ترا احد من حولها
سالت صديقتي عنها وقالت لي قصتها
بكتبها لكم يمكن نتعلم منها شي
جمانه اندونيسيه اتزوجت وهي عمرها 18 سنه
جميله كلما اشوفها يلفت نظري الفرح اللي يطل من عيونها
وينعكس على بشرتها الصافيه كانها بشرة طفل
صديقتي تمدحها وتقول عنها فقيره وطيبه البسمه ماتفارق ويها
بس عيبها انها ماتصرف درهم واحد من فلوسها
وكلما خذتلها شي او حد عطاها شي يودته
وبعد ما تتوفر عندها كميه من الاغراض شحنتها بلادها
فلوسها اول باول اتطرشهن لزوجها
ولما تسالها صديقتي ليش ماتخلين لج فلوس يمكن تحبين تاخذين شي
اتقول لا مدام بطرشهم لزوجي وهو بياخذلي لي ابغيه في بلادي
وكانت صديقتي اتمازحها واتقولها اتحملي من زوجج
كانت جمانه اتقول مدام زوجي يحبني واااايد وينتظرني بس متى ارجعله
ودايما اتقول زوجي يبني البيت بلفلوس اللي اتطرشهن له
واذا خلص البيت واشترينا المزرعه
خلاص مدام انا بسير بلادي لاني ماتهنيت بزواجي
انا بعد زواجي بسنتين قالي زوجي سيري اشتغلي في الخليج عشان نقدر نعيش ووافقت لان زوجي حبيبي فقير ماعنده فلوس
المهم مرت سنتين على خدمتها وقالت لها ربيعتي سافري عشان اتشوفين اهلج
لكن زوجها قالها لا تين وقولي حق المدام تعطيج فلوس التذكره اذا ممكن عشان انكمل البيت وفعلا وافقت ربيعتي وعطتها فلوس التذكره وعلى طول طرشتهن لزوجها ومرت سنتين وهي على هاي الحاله تجمع الاغراض والفلوس واتطرشهن حق زوجها
وبعد هالسنتين طلبت الخدامه من صديقتي انها تقطع لها تذكره عشان بتسافر
وشكرتها على حسن معاملتها وعلى الهدايا والاغراض لي كانت تعطيهم اياها وقالتها مدام سامحيني انا ما برجع
لاني ابغي اكون اسره مع زوجي واعيش بسعاده بعد هالاربع سنين اللي اتحملت فيهن الم الفراق عن زوجي الحبيب
الحينه بتنتهي متاعبي والامي بعد ما بنينا البيت واشترينا المزرعه اللي بنشتغل فيها انا وزوجي وعيالي الي بننجبهم ولقمه صغيره بتكفيني بقرب حبيبي
ويوم السفر ودعت الخدامه صديقتي وهي تصيح وصديقتي اتصيح على خدامتها الامينه اللي كانت مثل الاخت لها من حسن خلقها
سافرت الخدامه جمانه ومرن اربع ايام
وفي وقت متاخر من الليل رن هاتف صديقتي ولما شافت الرقم على طول ردت قالت يحليلها جمانه اتطمنا انها وصلت
واول ما قالت الوه سمعت صوت متقطع من الصياح ومش عارفه تفهم شي من جمانه وكانت اتقولها جمانه ردي عليه شو صاير حد من اهلج صارله شي
ردت عليها بصوت مخنوق قالتها مدام زوجي اتزوج صديقتي وعنده ولد منها ومسكننها في بيتي ومزرعتي اللي كتبهم باسمه
مدام ابغي ارجع عندج بلييز قالتها ولا يهمج باجر بنطرشلج التذكره
وعقب ثلاث ايام وصلت جمانه وهي تحمل شنطتها وتحمل في داخلها احلام محطمه وقلب مكسور سلمت وراحت غرفتها
ومن هذاك اليوم هاي المسكينه في عالم اخر اتكلمينها تنظر لج بشرود
تشتغل وكانها جثه تتحرك بلا روح ضعفت وفارقت البسمه عيونها
وارتسم الالم في ويها
اما زوجها اللي طردها من بيتها عرفت من اهلها انه طلقها
هذي قصتها اتساءل لو وحده منا كانت مكانها شو بيكون موقفها
صدق لي ايشوف مصايب الناس اتهون عليه مصيبته
وصدق المثل المصري اللي كنت دايما اسمعه وما تستوقفني معانيه لكن اليوم انا كلما سمعت هالمثل اقول صدق يام امنه للرجاله يام امنه للميه في الغربال
حسبي الله ونعم الوكيل على كل ريال يخون حرمته ويسرق بسمتها وفرحتها واحلامها ويعطيهم حرمه ثانيه
ياااااااااااااااااااااااااا الله مكبرها من صدمـــــــــة …
هو شـــآف إنه الظروف تخدمـــــــه من كل صووب ،، الفلوس وتوصل له أول بأول والحرمـــة بعيــــــدة
نـــآكر جميـــــل هــــذا …
لا حول ولا قـــــــوة إلا بالله العلــــــي العظيــــــــــــم …
الوآحــــــــــد لازم ياخذ الحيطــــــــة والحذر لو حتى من أقــــــرب النــــآس له
والله يعيـــــــــن هالفقيـــــــرة
وفي حلمك مايسد الخلل ,وفي عفوك مايمحو الزلل
اللهم فبقوة تدبيرك وعظيم عفوك وسعة حلمك وفيض كرمك
اسألك ان تديرني بأحسن التدابير وتلطف بي وتنجيني مما يخيفني
ويهمني
اللهم لا أضام وانت حسبي ولا أفتقر وأنت ربي ,
فأصلح لي شأني كله ولا تكلني الى نفسي
طرفة عين ولا حول ولاقوة الابك
اللهم صل وسلم وبارك على سيدنا محمد وعلى اله وصحبه
يحليلها والله كسسرة خاطري><
اشغلت مال 4 سنين وكله اطرش البيزات بلادها
واخر شيء خبرونا الناس ريلج متزوج وحده ثانيه ما صدقت وسيده سافرت بلادها وجان تنصدم يحليها
المشكله هي اللي طلقته وتزوجت واحد ثاني وييت كيف جذه مادري مع انها مسلمه خلال شهر تطلقت وتزوجت
الحينه بتكمل بيت اختي حوال 8 سنين
ناكر المعروف والجميل
وهي متغربه وتخدم بس عشان تعيش عيشه حلوه وتبني أحلامها
الله يصبرها