زوجي طلقني وأنا بالغربة عالم الامومة

المهم بختصر عليكم مشكلتي والله ما ادري شو بقول ما قدرت اوقف بكاء من امس حالتي حاله ما يعلم فيها غير ربنا
انا إنسانة لله الحمد متعلمة وجامعية ونصيبي تزوجت رجال أكبر عني 20 سنة معظم خلافاتنا بسبب فرق العمر احسه عايش بعالم مختلف عني
وحاولت أني اتفهمه بأشياء كثيرة بشكل عام حياتنا عادية وقدرنا نتخطى بعض المشاكل لكن هو مرات يعصب ويقوم يضربني مثل المجنون والله العظيم انه وايد ظلمني ودوم بقول حسبي الله ونعم الوكيل
تحملت وايد لأجل أولادي وحتى ما تنهدم هالبيت ولا يصير طلاق
لكنه امس بعد الضرب والاهانه قام طلقني وهذي الطلقة الثانية
الطلقة الأولى وربي يشهد انه طلقني بكل برود اعصاب على مشكلة بسيطة وربي الي فوق السماء أدرى أنه طلقني على شئ تافه وما يسوى بس لانه يبي يقهرني

لكن الطلقة الثانية بقلكم شو صار مثل العادة وكل يوم اصحى الفجر أصلي واجهز فطور حق بنتي الي كيجي 1
وسويتله فنجان قهوة لانه يحب يشرب قهوة قبل كل شئ ورحتله على غرفته( طبعا يحب ينام بغرفة منفصلة عنا من بداية زواجنا )بصحي فيه قام عصب علي وصار يصارخ قلت في نفسي مثل العادة معصب من قلة النوم والسهر لانه كل يوم سهر على الفيس بوك ومدري شو المهم قتله بسويلك سندويش تاكلهم قبل تروح على الدوام قلي روحي وما أبي اسمع صوتج قلتله انت ليش معصب وتصارخ علي انا ما غلطت عليك وقلتها بزعل لاني عنجد ما غلطت بحقه قام يسبب ويهيني قلت له في وجهه حسبي الله ونعم الوكيل حسبي الله ونعم الوكيل قام ضربني
رحت الغرفة الثانية عشان اتكافى شره اجاني للغرفة وهو مثل الوحش وهجم علي وقام يضربني وكان يضرب بعنف يعني يمسك كل شئ صلب جنبه ويضربني فيه وعيالي حالتهم حاله غير الشتائم والمسبات قمت دخلت الحمام بسرعه وسكرت الباب على روحي عشان ما يسوي لي شئ صار يشتمني ويشتم والدي وأهلي رديتله الشتيمة لأني ما تحملت يسب والدي قام رمى علي يمين الطلاق ولبس ملابسه وراح الشغل بكل برود أعصاب وربي العالم بحالي انه كثير تحملت لأجل عيالي وحتى ما يصير طلاق وما تنهدم هذا لأسرة بس خلاص مش قادرة أتحمل تعبت وحاسه نفسي عايشه بجحيم وما احب اخرج وأتعامل مع الناس حتى ما أحس بالنقص والجحيم الي اعيشه خاصة انه زوجي ما يحب يسوي العلاقات الاجتماعيه وأنا صرت مثله تفادي لشره

<sup>والله ما اعرف شو أسوي الحين وين أروح مالي حدا بالإمارات انا وافدة وزوجي وافد وأمس لما دقيت على أمي وخبرتها قالتلي تعالي بدون الصغار يعني أمي تبيني أخلي عيالي عند ابوهم وأسافر وطبعا على موتي بس بفارق عيالي لأني متعلقه فيهم وما اقدر اسيبهم وأبوي بيقول انا ما إربي عيال الي يضرب بنتي

الحين خواتي انصحوني شو أسوي والله حاسه نفسي ادور بحلقه مقفوله وما اعرف وين أروح وشو أسوي</sup>
الله يخليكم أخواتي الي عندها كلمة طيبة تقولها والي عندها كلام جارح ما أبيها ترد نفسيتي ربنا يعلم فيها ويكفيني الي فيني

مب انتضار الطلاق ……..لاحول ولاقوة الا بالله …صدق احزنتيني وربي يفرج عليج يارب

بس بقولج الشي الي صعب ينقال ،، لا تحاتين حد ما يحاتيج ولا تهتمين لاي بشر ما يهتم فيج كانسانة
اول شي المفروض تسوينه تشتكين عليه انه يضربج بقصد الاساءة وتطلبين نفقة منه حتى وانتي في بيته وبعدين عندج شهادة اشتغلي فيها ولا تيلسين في البيت وحسسيه انج قوية واذا هو ما يحاتي بيته فانتي لج حضانة عيالج وحياتج الي ممكن تمشيها بدونه

واذا تبين فعلا تغيرين حياتج غيري شخصيتج قويها دامج على حق وحاولي اثبتي عليه الاشياء الي تتهميه فيها باي دليل
الشرطة في حالة تكرار الضرب بيحبسونه تدرين هالشي والا لا ؟؟

بعدين حاتي بنتج الي تعيش في هالجو الله يعينها الصراحة باجر بتتعقد وبتمرض

هو عرف نقطة ضعفج الظاهر ويالس يضغط عليج فيها

الله يقويج يا رب
صلي وايد وادعي

ما يستاهلج على شو صابره ؟ زين ما قتلج ؟

شو تتوقعين من نفسيات رح تقوم اذا الاساس فاشل

يلسي هذي بلادج وبلاد عيالج …

روحي المحكمة وبتحكملج في بيتج وعيالج والمصروف

يالله كيف هالوحش صابره عليه …

كثري استغفار ودعاء ولا تنزل دمعتج

الله يهونها عليج ويسوق لج الخير سوق

وهالاطفال يبغون بيت ومصروف وخادمة وسواق وسياره

وكل هذا المحكمة تحكم لج

ليش انتي خايفة …؟

قوي قلبج وسيري المستشفى دام توه ضاربج عسب يسون له تقرير وتطلقين بكل سهولة

ما يحتاج تردين لاهلج ولا لبلادج هذي بلادج طال عمرج دامج ام للمواطنين يحق لج تسكنين فيها