شحالكن حريم وبنات
الصراحة ما عرفت شو اسمي موضوعي لأنه في أكثر من شي حابة اتكلم فيه, طبعا من خلال قراءاتي ومن خلال المجتمع اللي اعيش فيه والأشياء اللي مريت فيها.
أول نقطة بتكلم فيها هي عن اللي يسمونهن عشيقات:
العشيقات هن بنات او حريم يعشقهن الرجل المتزوج, يقولون انه في حريم او بنات اذا شافت واحد حتى لو متزوج وعيبها تجذبه بمختلف الطرق وتسوي اي شي عشان تدخل حياته وتكون انسانة يعشقها ويحبها ويعيش وياها وبالتالي يخون زوجته!
تعليقي: ما بقول انه هالفئة مب موجودة بالعكس فيه وشفتهن, وتكتشف الزوجة احيانا وتقول هالبنت او الحرمة سرقت ريلي مني,وبسبب كلام بعض اللي ينصحن ويتكلمن عن هالعشيقات اتم الزوجة معتقدة ان ريلها بريئ بس البنات هن اللي يربعن وراه.
لازم تفهم الزوجة انه حتى الريل ممكن ينعجب بأي بنت ويسولف وياها مب شرط البنت فاتم الحرمة شاكة وتظلم كل وحدة, عشان سمعت عن العشيقات.
النقطة الثانية:
ينصحون الزوجة ويقنعونها بإنها تكون انسانة همها الوحيد فالحياة انها تكون زوجة للفراش لأن هذا حق الزوج الشرعي, تترك عمل بيتها ويقل اهتمامها بعيالها
وبس يالسة تتنظف وتتعدل وتتزهب عشان يوم ريلها ايي تكون مستعدة, وطبعا الإقناع يأتي من خلال الدين يعني يقولوها ان رب العالمين امر بالزواج عشان الابتعاد عن الحرام وانه لازم تكون حياتكم معاشرة وفراش فقط مب رومانسية عادية, وبالرغم من هذا التعب والجهد اييها ريلها ويرقد لأنه تعبان وما فيه حيل حق شي؟! انزين والمسكينة اللي تبا حقها الشرعي شو تسوي لو ما عطاها حقها؟
النقطة الأخيرة وهي تابعة للي فوق كله:
حياة الزوجات تخترب بس بسبب بعض الاستشارات والنصايح غير المنطقية دايما يطالبون الزوجة بكل شي وينسون ان الزوج ايضا مطالب بأشياء وايد لازم يسويها, كله يتكلمون عن المعاشرة كأن الزوجة مكينة طول الوقت شغالة بدون احساس ولا راحة, حق الزوجة لازم ينحفظ, عقلها مب لازم يتشوش بكلام فاضي مثل وجود عشيقات وبنات معجبات بريلج, ريلج مب ياهل عشان حد يقص عليه وايضا ريلج مب انسان كامل وبريئ ما يغلط, لازم نكون منطقيين وعاقلين.
في اي مشكلة تصادفونها خلوا عقلكم هو الاساس مب بس عواطفكم ومب اي حد تسمعون له وان شاء الله تعيشون براحة وسعادة.
كلام منطقي. وياج ف كل كلمه قلتيها
الزوجه ف مجتمعنا مب الكل طبعا دائما هي اللي تتعب على رضى الزوج من كل النواحي
و ينسى الزوج حقوق زوجته لأنه تقريبا أتعود أن الزوجه دائما هي اللي اتبادر ف كل شيء
كله شورتات والصدر شوي ويطلع ورياييلنا عيونهم مبحلقه فما بالج لو وحده من هاييل عطته ويه شو تتوقعين منه؟
من جيه نقول شبعوه في الفراش عشان ما يفكر بغيركم
ثاني شي هالمنتدى منتدى نسائي والحريم هن اللي يطرحون المشاكل لذلك احنا ننصحهن ونعطيهن الاستشاره وكيف تتصرف كل وحده وحسب خبرتها بالحياه وهي لها مطلق الحريه وتتصرف مثل ما تبي
بس لو كان المنتدى مختلط او رجالي كان الكلام والنصح بيتوجه لللريال طبعا
الريال يبي وحده تفهمه لا تكون حنانه ولا زنانه وبنفس الوقت تهتم بنفسها وتكون شخصيتها قوية
تكون صديقته قبل لا تكون حرمته
تستوعبه وتحتويه
انا مب مع الريال لكن معروف انه الريال يمل واذا الحرمة اتبعت نفس الروتين هيه بروحها تكون مب طايقه نفسها
يعني ليش ما تغير ستيالها بين فتره وفتره؟ ليش ما تفاجئه بشي هو نفسه ما يتوقع انه هالشي يطلع منها ؟
مجرد راي
المشاركة الأصلية كتبت بواسطة ماحد شراتي 
الريال يبي وحده تفهمه لا تكون حنانه ولا زنانه وبنفس الوقت تهتم بنفسها وتكون شخصيتها قوية
تكون صديقته قبل لا تكون حرمته
تستوعبه وتحتويه
انا مب مع الريال لكن معروف انه الريال يمل واذا الحرمة اتبعت نفس الروتين هيه بروحها تكون مب طايقه نفسها
يعني ليش ما تغير ستيالها بين فتره وفتره؟ ليش ما تفاجئه بشي هو نفسه ما يتوقع انه هالشي يطلع منها ؟
مجرد راي
انا معااااااااااج بكل كلمة مب دوووم ننتقد الريال بعد نحن عدنا عيوب وقصور