بغيت رايكم عندي غرفة لون الجدران سماوي والستاير رمادية والارضية زرقا
شنوة اقتراحاتكم اي لون اثاث اختار
امممم (جدران سماوية + ستاير رمادية + أرضيات زرقه)
اللون الأزرق بشكل عام لون يجلب الاسترخاء والراحة في المكان
ولكن لازم يتوزع صح .. لأن ع كثر ما الشخص يشوفه حوله ممكن يتحول الشي
من استرخاء لكسل، لأنه ألوان البيئة المحيطة تأثر في نفسية الشخص وسلوكه
وقبل أي شي … وفكري في هالأسئلة:
1. هل بترتاحين لهالألوان لفترة طويله ولا بتملين منها؟
2. (السماوي والرمادي والأزرق) شو بيكون لون الأثاث المحيط؟
3. شو الإضاءة المناسبة لها (الأبيض ولا الأصفر) وهل إنتي تحيبن هالنوع من الإضاءة؟
4. إنتي بشكل عام شخصيتج .. هاديه؟ مرحة؟ عصبية؟ … ألخ، وهل هالألوان تتناسب مع شخصيتج؟ لأن في ألوان تسد الشهية وألوان تزيد الكسول كسل وتزيد العصبي عصبية والعكس
5. إذا كنتي تشاركين حد الغرفة، هل هالألوان تناسب الشخص اللي معاج بعد أو لا؟
—————————————————————
——— بعد هالأسئلة وفي غيرها بعد وايد إنتي فكري في اللي يناسبج ———
—————————————————————
والحين لاحظي معايه وتخيلي الغرفة والشكل العام
وتقدرين تتخيلين وتقررين رايج النهائي بطريقتين:
الأولى : تبدين تفكيرج من [ألوان الجدران والستاير]
لو قلنا الجدران سماوية والستاير رمادية (ما تحسين أن الألوان باهته شوي؟)
هي حلوه مع بعض .. وألوان هادية وجميله، ولكن في هالحالة لازم يكون التركيز عالأرضية والأفضل لازم شي يكسر اللون تماماً .. مثلا تكون باركيه أو رخام/سيراميك أبيض أو لون ثاني + سجادة زرقه .. بهالطريقة بيكون توزيع الألوان أريح أكثر للعين والنفس وفي تناسق أكثر
الثانية : تبدين تفكيرج من [ألوان الجدران والأرضية]
تعالي نتخيلهم (جدران سماويه وأرضية زرقا) يعني تدرج لون واحد في هالحالة لازم نفكر بألوان الأثاث + الستاير والستاير بتلعب دور كبير
وتقدرين تحددين وتقررين بهالسؤالين:
1. هل إنتي تبين تكملين ع نفس الموال ودرجة لون واحد [الأزرق]؟
2. هل إنتي تبين تكسرين اللون بلون ثاني؟
إذا اخترتي (1)
تختارين الستارة بدرجة لون بين الأزرق السماوي و درجة لون أزرق الأرضية
عندج الأزرق بدرجاته + التركواز
إذا اخترتي (2)
لازم تبعدين تماماً عن اللون الأزرق وما تفكرين بهاللون أبداً في اختيارج للستارة والأثاث ومن الألوان اللي بتكسرلج درجات اللون الأزرق وتناسب اللون الأزرق .. درجات هالألوان:
(البرتقالي + البنفسجي + الأخضر والوردي + البني + الزيتوني + الأصفر + البيج)
وإن شاءالله أكون أفدتج … والله يوفقج في اختيارج 