دخيلكم للفحوصات تايلند ولا الهند احتياجات خاصة

خواتي من شهر كنت مخططه اروح تايلند لاجراء فحوصات شامله
لكن من فتره اكتشفت فيني خمول بالغده الدرقيه ونصحونا الاهل بالسفر للهند
وحد يقولنا كيرلا زينه وحد يقول بومباي
والحين محتاره انا وزوجي مو عارفين ويين نروح واهم شي اسوي فحوصات

وعلى فكره باخذ عيالي ويايه يعني باي بلد تنصحوني عندي اسبوع بالكثير عشان احجز لاني بروح باجازه الربيع

فياريت تساعدوني وبالبلد وافضل مستشفى واسم الفنادق والسواقين وبكون شاكره لكم

التايلند اوكي حق فحوصات القلب واما الهند اوكي حق فحوصات العيون والكبد والمفاصل هذا اللي جربته روحي الهند في حيدرباد بس اتحملي لازم اتشلين واحد يعرف هندي ولا في بعض الدخاتره انذال الصراه الحمد الله انا ابوي يعرف هندي عسب جذي امي ردت شباااااااااااااااااب ما شالله عليها

انزين تعتقدين زينه حق المشاكل النسائيه

اهم شي تطلع الفحوصات بسرعه

انا اتعالج في تايلند في المستشفي الامريكي وانصحج به
لان علاج الغدد وايد زين عندهم انا والحمدلله الحين وقفوا كل العلاج
الحمدلله اتحسن واذا تريدين اي عناوين انا حاظره
بس اذا لقيتي حجز طيران خبريني لاني ادور مالقيت حجز انا اريد اسافر في اجازة الربيع
وبالتوفيق انشالله

حبوبه تايلند.. توني راده … سويت فحوصات في المستشفى اللي سموه العرب الملكي (الرويال) بس هو اسمه بانكوك انترناشونال (حتى بتلقين موقعهم و شارحين كل شي بالعربي و بالإنجليزي)… الفحص الشامل وايد زين و اكتشفوا اشياء هني الدكاتره مب مسويلها سالفه … مثلاً الشهر اللي طاف مسويه فحص شامل للدم في مستشفى الإمارات الفرنسي, و طلعوا جذابين.. الدكتور تم يقوللي انتي بخير و مافيج شي بس انا تعبانه و كل مدوخه, سرت هناك و طلعت في مرحلة ما قبل الإصابه بالسكري.. و معناته انه عندي بس 3 شهور الحين انزل فيهم الوزن و ابعد عن النشويات و الرياضه لازم كل يوم… يعني الدكتور اللي هني مفروض انه يكون خبرني بهالشي قبلهم بشهر… و فقر الدم قاللي مب مهم عادي و مادري شو, طلع لا لأنه اصلاً الكريات الحمراء هي اللي فيها العله و الحين عاطيني ادويه و قالوا اراجع بعد 3 شهور تأكيداً عسالفة السكر و الكريات… و هني قايليلي الغده تعبانه, سرت هناك قالولي بالعكس مافيها شي و حرام تاخذين ادويه عشانها لأنها بتتضرر 😐

يا اختي سيري تايلند و توكلي على الله.. و المترجمين هناك وايد في المستشفى… و اذا ترمسين انجليزي بعد اوكي تسرعين الأمور… و الفحوصات الشامله تطلع نفس اليوم.. و اذا الواحد مافيه شي يقولوله حزتها (مثل اخوي الحمدلله تمام) و اذا في شي لازم تشوفين طبيب, يحاولون نفس اليوم او اليوم اللي بعده على طول.. المهم اول ما تين تقوليلهم انج يايه اسبوع (اذا 7 ايام قوليلهم 6 عشان بعد يكون اسرع)…

و بس ^_^ هذي تجربتي… اذا عندج اي سؤال ما يردج إلا كيبوردج