خواتي المتزوجات واللي يعرفن يتعاملن مع أزواجهن وهله بليز أبا المساعده؟ لتربية الطفل

كيف الحال؟
أولا حبيت أحد من الأخوات المتزوجات وعندها خبره عن هالأسئلة
1- أولا كيف أخلي ريلي ما يردلي طلب؟
2- كيف أخليه يهديني هديه ما أطلبها بالزور؟
3- أباه يوافق نستاجر بيت؟ مليت من ثمان سنين ساكنه في حجرة بدون حمام حمامها مجابل باب الحجرة فضيحة مايحس؟
4- كيف أخلي أم ريليه تحبينيه ولا تنازع وتحب هليه وايد قاطعين هليه؟
5- كيف أكسب خوات ريليه وأخليهن ما يصبرن عنيه ؟
6- ريليه دومه هادي ولا يسولف ويايه بس أنا أرعد عليه ومن الصعب يودينيه السوق ولا يتصل فييه إلا عشان يقول شحالج ويسكر؟تخيلكن حلفتكن بهذا المصحف الشريف تساعدوني!!!!!!!!!!!!؟؟؟؟؟

هالايات انا اعرف تأثيرهن لأني مجربتنه في مواقف صعبة جدا ,, كان حالي اخس والله ويا اهل ريلي انا ام ريلي طردتني فليل من بيتهم انا ولدي طلعة الشارع ادور تكسي والله ولدي عمره 6 شهور لا حليب ولا بمبررز واعرف وده في امور سجن ومحاكم والامور مشت بقدرة رب العباد

ثقي فيني وربي بيسهل

اول شيء

الصبح يوم تنشين قبل لا تطلعين من الحجرة وتسيرين صوب ام ريلج وخواته

والمسا بعد قبل لا تسيرين عندهم في الصالة

توضي شرات وضوء الصلاة ,,

وعقب ما تلبسين وتتعدلين وتتعطرين

اقري المعوذات+ قل هو الله احد + قل يا ايها الكافرون وانتي تنفخين في كف ايدينج الثنتين( نفس الحركة اللي نسويها قبل النوم ) وعقب امسحي ويهج وجسمج واي مكان توصله ايدج من جسمج كلج ,, 3 مرات

…
عقب اقري آية الكرسي + آمن الرسول بما ارسل اليه من ربه ( آخر آيتين من سورة البقرة ) 3مرات

عقب اقري سورة يس لين الاية 9 <<<< هذي عاد 7 مرااات ,, لازم سبع

وادعي هالدعاء: اللهم يسر لي امري واشرح لي صدري واحلل عقدة من لساني يفقهوا قولي+ اللهم اني اجعلك في نحورهم واعوذ بك من شرورهم + اللهم لا سهل الا ما جعلته سهلا وأنت تجعل الحزن إذا شئت سهلا

هالادعية اقريها 3 مرات

شوفي يوم تستوي مشكلة وتحسين ان حد بيظلمج فيها .. وبيتبلى عليج ,, اقري بصوت خافت سورة يس لين الاية 9 سبع مرات

وقولي اللهم اني اجعلك في نحورهم واعوذ بك من شرورهم 3 مرات

واذا انتي في نص المشكلة تمي اقري بصوت خافت سورة يس لين الاية 9 وكرري الاية 9 سبع مرات
الآية 9 اللي هي ( فأغشيناهم فهم لا يبصرون )

وصدقيني بيزول شر اللي يبا يسوي لج مشكلة وبتختفي المشكلة بشكل غريب

يوم يتوتر الوضع ويا زوجج سويي نفس الحركة

يمكن انتي الحين موب حافظة الايات بس بعد يومين اكيد بتحفظينهن من التكرار

طمنيني حبوبة

فديتج بعد عندي رقم دكتوره فاطمة الراشدي هي استشاريه اسريه عجيبه اذا تبينه طرشي ع الخاص

ماشالله الغاليه خيالج واسع ..

فديتج قولي الحمدلله عاللي عندج .. وشوفي الاشيا المهمة في حياتج ..

برايي .. اهم شي من اللي قلتيه سالفة البيت .. الله يعينج .. ساكنه وياهم وحمامج برع الحجرة ..!!!!
بس والله ماعرف كيف افيدج … انزين هو شو يقولج يوم تكلمينه في الموضوع ..؟؟؟

اهلج .. اهم شي انتي ما تقطعينهم وما عليج من حد .. ما ترومين تجبرين الناس انهم يحبون اهلج ..

عمتج وخوات ريلج .. لا تحتكين فيهم وعليج من ريلج وبس ..

ريلج ..!! كل الرياييل يمشون كلمتهم وما يسالون مثل الحرمة .. وحتى الهديه ما ترومين تجبرينه عليها .. اهم شي انج تقومين بواجبه ..

الله يوفقج في حياتج يالغاليه ..

مزوون الهم وااااايد استفدت منج

الله يزيج خير

وانا مثلج ابا حد يساعدني

السموووحه