حل مجرب لتسهيل الزواج ( باذن لله بيفيد المتاخرات عن الزواج)

اليوم دخلت المدونة ولاول مرة ادخل قسم المتاخرات عن الزواج.. بصراحة قريت مشاعر بعض البنات ووايد اثرت فيني وحسيت بضيج كبير لانه فعلا نحن في مجتمع يربط النجاح بالزواج ولكن اكيد هالشي غلط…

انا الحمدلله متزوجة.. ولكن اللي ابا اوصله لكل البنات المتاخرات عن الزواج هو شي لازم كل وحدة فيهم تسويه لانه والله العظيم وربي يشهد على كل كلمة بقولها هذا شي سوته وحدة اعرفها وقريبة مني وايد والحمد لله تزوجت بسببه..

البنت هذي كانت متاخرة عن الزواج.. كل مرة تنخطب ما كانت تتوفق ما تعرف شو السبب.. ومرات كانو فيه ناس يبون يتقدمون لها بس فجاة يختفون وما يكتمل الموضوع..

المهم وصلت لمرحلة هيه بدت تستغرب ليش ما تتوفق بالزواج !! لين ما عرفت انه مسواي لها ربط زواج ( قصة طويلة).. دخلت النت وقرت قصص وايد عن سورة البقرة وقراءتها وبركة هالسورة.. حاولت تبدا تقراها كل يوم ..

كان عندها ثقة بداخلها انه الله سبحانه وتعالى هو اللي قادر على كل شي وانه القران هو شفاء من كل داء ( عندها ايمان كبير بهالنقطة) قررت تعالج نفسها بنفسها وترقي نفسها بنفسها.. لدرجة انها كانت تحس بمتعة كبيرة بقراءة البقرة كل يوم وما طوفتها ولا يوم.. حتى ايام العادة الشهرية وانتو بكرامة كانت تشغلها وتسمعها كاملة..

المهم البنت هذي قرت السورة لمدة 15 يوم وباليوم 15 سمعت انه فيه ناس يبون يخطبونها.. وكملت قراءة البقرة وهيه كلها ايمان انه القران شفاء.. وباليوم الاربعين من قراءة البقرة بالضبط تمت الملجة.. ومع هذا هيه ما وقفت استمرت عليها لمدة شهرين.. والحين هيه حرمة متزوجة والله يوفقها..

والحمدلله انه زوجها واهله كانو وايد مستعيلين على الزواج وهيه حبذت هالشي عشان ما يوقف اي شي بطريقها… بمحافظتها على الاذكار الصبح والمسا وقراءة البقرة يوميا مع الايمان بانه شفاءها بس بالقران وبرقيها هيه لنفسها تزوجت..

اتمنى يا بنات ما تفقدون الامل وتسوون هالشي.. وهيه نوت انها تخبر كل حد قصتها عشان يستفيد ويسوي اللي هيه سوته..

الله يوفق الجميع يا رب ويرزقكم الزوج الصالح والذرية الصالحة