حد يعرف وحدة عندها عملية سابقة و بعدين ربت بتوم بشكل طبيعي دون مضاعفات؟؟؟ لصحة الجسم

طمنوني و فرجوا همي الله يفرج همكم دنيا و دين ………..!

الغاليه ما سمعت عن حد بس ليش انتي متشائمه؟
وايد ناس يربون طبيعي بعد العمليه و ما اظن يفرق التوم عن الواحد شي

فديتج أنا مب متشائمة و أملي بالله و منه و كرمه كبير و راضية باللي يقدره لي أيا كان …
بي ودي أحزم أموري و أقرر بعد الاستخارة …

أنا عندي عملية و بعدها ربيت مرتين طبيعي ، و ألحين حامل بتوم الحمدلله على كل حال ، و قالوا بالمستشفى أنه خطورة تمزق جرح العملية الأولى كبير جدا أثناء الولادة بتوأم و نسبة عدم تمزقه و مرور الأمور بشكل طبيعي ضئيلة ، و لو تمزق بيصير نزيف …فإما يلحقون يرقعونه و يخيطونه و بتعتبر عملية ، أو ما يلحقون و يضطرون يشيلون الرحم كله لا قدر الله، أو تموت المرأة لأنه ما لحقوا على الحلين …

عطوني موعدد مبكر للعملية بس أنا أفكر أطوفه و أتريا الطلق و أخوض التجربة الخطيرة متوكلة على الله لأنه إحساسي كبير أنه كل شي بيمشي طبيعي ، لأنه لو ربيت هالمرة بعملية خلاص الباجي بيكون كله عمليات و بتكون ثلاث عمليات بعدها بس غير ألم العملية الفظيع….شو رايكم؟؟

شوفي حبيبتي ..تمي استخيري اكثر من مره .. و شوفي شو بيصير عقب الإستخاره وتوكلي على الله
..بس انا ما انصحج تجازفين بحياتج و صحتج.. و افضل تسوين العمليه بدون تردد
وعلى فكره محد يقدر يحدد كم بتربين بعمليه ..العلم عند الله…
انا اعرف وحده ربت اكثر من خمس مرات بعمليه ..
و الدكاتره يقولولها لازم توقفين و هي مب مقتنعه و الله حافظنها

..انا شفت في التلفزيون دكتور يقول نحن نحدد الولاده بعمليه انها ما تكون اكثر من اربع مرات
بس ما نلزم حد لأن الواحد حر في هالشي

… انتي في اي مستشفى تراجعين