حد جرب السفر معاهم ؟؟؟ في الامارات

خواتي الغاليات ..

خاطري اسافر شهر 11يعني نص او اخر اسبوعين من 11
مع زوجي و بنتي عمرها 4 سنوات و ولدي بيكون 4 شهور ..

بس ما اعرف وين لان اغلب الدول باااردة و خايفة عالياهل

شو اقتراحاتكم عن الدول؟؟
و نصايحكم بالنسبة للياهال؟؟

هل بستانس و لا تو الناس عالسفر.

صح وناوية ادخل الحليب الصناعي للياهل ف بداية الرابع لان اخاف اتوهق اشا سافرت و ما احصل مكان …فنصااايحكم حبوبات ..

سافري لكن حطي في بالج انه اليهال بهالسن يبون حد يعاونج عليهم
مثلا خلي ريلج يفهم من الحين انج بتحتاجين مساعدة

والأفضل ما تتنقلين بين مدن وايدة يعني بالكثير مدينتين
واتجنبي الدول اللي يكون جوها ثلج هالفترة
ولا تنسين تشلين وياج أدوية تخفيض الحرارة والاسهال احتياط

ربي ييسر أمورك حبيبتي وان شاء الله تسافري وتغيري جو وتنبسطي وترجعيلنا بالسلامة

ذكرتيني بادوية الاسهال و الترجيع …مشكورة

مشكورة الغالية ردج يريح الواحد

شوفي الغاليه انا من أسبوع تقريبا رجعت من السفر

كنت رايحه تركيا جوها مب بارد وايد بس فجأة تحسين برررد

عندي بنت عمرها ٣سنوات و٤ شهور وبنوته ثانيه عمرها ٨ شهور

طبعا اهم شي حليب البيبي انا بنتي ترضع صناعي فما تعبتني وايد

وكنت ماخذه كل احتياطاتي من اكل وحفاضات وكريمات بس للأسف نسيت الأدول

وتبين الصدق اثنيناتهم يتهم حمى

بس كل وحده بوقت غير

الأولى مجرد إن فصخناها ودهناها بفكس

والثانيه اشترينا ليها دوا خافض للحراره والحمدلله خفت عنها

طبعا السفره حلوه بس في تعب شوي

وطبعا ريلج بيساعدج في أشيا بسيطه مثل يبدل لهم ويطعمهم

موفقه في سفرتج الغاليه ولا تقولين تو الناس ع السفر

تروحين وتردين بالسلامه والله يحفظ لج عيالج

أنا جريب ياية من النمسا وبرد شوي غير ميونيخ برد موطببعي يبسنا ..
أهم شي تحاميل الادول لاتنسيها انا مانزل للي حرارة بنتي غير التحاميل مانفعني الشرب .. بس صغير وايد أربع شهور ومناعته ضعيفة بعده..