:+: جيز كيك بالأوريو-الطريقه والصور داخل حياكن - :+: المطبخ الاماراتي

السلام عليكم ورحمة الله وبركاته

شحالكن خواتي؟

اليوم يايبه لكم جيز كيك بالأوريو كل من ذاقها تخبل عليها

بحطلكم المقادير والطريقه بالصور.. واسمحوليه على الصور بس لاني مصوره من كيمرة الموبايل >.<

نبتدي بالمقادير:

بقسم المقادير لثلاث اقسام عشان اسهل عليكن

مقادير القاعده:
كوب ونص بسكويت اوريو مطحون
ملعقتين طعام زبدة مارجرين

مقادير الخلطه:
3 علب جبنة فيلادلفيا الحجم العادي
كوب سكر
ملعقه ونص صغيره فانيلا
كوب whipping cream
3 بيضات
كوب بسكويت اوريو مطحون أو مكسر (انا افضل المطحون)

مقادير التزيين وتعتبر اساسيه:
علبة نوتيلا وسط
وعلبة قشطه

وهاي صوره بالمقادير كلها

احين ني للطريقه وبننتدي الطريقه ب 3 اقسام على حسب المقادير:

طريقة القاعده:
نحط البسكويت المطحون + كمية الزبده ونعينها عدل

وعقب نفردها عدل في صينية الجيز كيك (اللي تكون قاعدتها متحركه) ونتم نساويها بالخاشوقه عشان تكون طبقه متساويه

وخلصنا جيه من القاعده .. نخليها ونسير نسوي الخلطه

طريقة الخلطه:

نحط 3 علب الفيلادلفيا + كمية السكر + الفانيليا

نخلطهن بسرعه بالمكسر الكهربائي لين ما تتمازج كل المقادير

وخلال ما نخلطهن نضيف عليه ال whipping cream – بدون ما نوقف الخلط

ونخليه يخلط المقادير كلها تقريبا لمدة دقيقتين

عقب نضيف البيضات بالتدريج ونوطي على السرعه – نخليها بطيئه نوعا ما- المهم انج كل ما تضيفين بيضه تخلينها تنخلط مع الخليط وعقب نضيف الثانيه ونفس الشي بالنسبه للثالثه