أكيد عنواني يضحك شوي بس شفت وايد بنات مسويات برياني الربيان وقلت يا بنت ليش ما تجربين تسوينه وبالفعل سويته مع اني ما قط سمعت ببرياني الربيان ؟؟؟ بس الفضول وما يسوي وهذي خطواتي وطبعاً الطريقه ملطوشه من عند أخت عندنا في المدونة الله يبارك فيها على هذي الطبخه الغاويه::::
أولاً هذي المقادير اللي استخدمتها والكميه تكفي لشخصين
وهي كالتالي:
علبة زبادي صغيره + بصلتين + طماط + ثوم + كزبره + فلفل بارد + فلفل حار + كيس ربيان الطبخ + لون الطعام ( أصفر وأحمر) و الأهم الأرز وبس
طبعاً أغسل الربيان عدل وأحط عليه شوية ملح عشان الزفر وأتركه على جنب
وأطبخ العيش وأشخله وأتركه على جنب
وفي جدر صغيرون أحط البصل مع الفلفل البارد والثوم والفلفل الحار وأحمسهم عدل (** ولما يستوون أحط عليهم الطماط والكزبرة
وبعد ما احس ان الخليط تجانس والطماط ذاب في باجي المقادير وصار بهذا الشكل
أضيف عليه ألحين الزبادي والربيان والبهارات + ملعقه صغيره من أجار الهمبا حسب طريقة الأخت
وأترك الخليط على نار هادية حتى يغلظ شوية ويصير جي
وفي هذي الفتره أقسم العيش ثلاث أقسام
قسم باللون الأصفر وقسم باللون الأحمر وقسم أخير باللون الأبيض يعني ما أحط عليه لون ويكونون عندي بهذا الشكل بعد التقسيم
وبعد هذي الخبصه كلها أحط العيش على الربيان وأنا كان ترتيبي كالآتي
أول شي الأصفر وفوقه الأبيض وبالأخير الأحمر وعصرت في الأخير ليمونه وأحطه داخل الفرن نص ساعه بعد ما اغطيه بالقصدير
وفي النهايه وأكيد الكل يترقب هذي اللحظه وهي الشكل النهائي للبرياني
:
:
:
:
ذليتكم صح هههههههههه
لا تلوموني اول مره يضبط عندي البرياني
ترررررررررررررراااااااااااااااا
الشكل حلللللووووو والطعم ولا أحلى وريلي تخبل عليه مع انه رفض في البداية فكرة برياني الربيان بس الحمد لله الكل عجبه الطعم ومن فرحتي طرشت صحن بيت عمتي وحميي تخبل عليه وقررت أعتمد هذي الطريقه وأشكر الأخت صاحبة الطريقه مرة ثانيه وحابه أذكر اسمها لكن ما يحضرني ألحين بس انتوا جربوه وما راح تندمون
وصحتين وعافيه على قلوبكم
أختكم
::: مياري :::
اصلا شكلها الطريقه لذيذه ان شاءالله بسويها
ومشكوووره فديتج ماقصرتي..بسويها وبطرشها حق ام ريلي بالحلم ههههههههههه شراتج اونه هههه
..
بس ما نلون العيش لووول 
خلاص بحاول مره ثانيه اجرب مع التلوين
عليكم بالعافيه مطرح مايسري يمري ^_^