التاريخ: 13-15 أكتوبر ليلتين
عدد الأفراد: 2 كبار وطفل
المناسبة: الاحتفال بذكرى يوم زواجنا
السعر: بالنسبة لاختلاف الأسعار بين موقع الفندق ع النت وكان 2250 درهم شامل الضريبة والريوق وبين موقع بوكينق وكان 1800 بدون الضريبة والريوق ولما اتصلت الفندق واستفسرت قالولي بنعطيج 1950 درهم مع الريوق والضريبة…. وبالتالي حجزت عن طريق الفون لأنه كان هديه مني لريلي بهالمناسبة. وعلى فكرة عطونا ويا الحجز تذكرتين لحديقة وايلد وادي وتذكرتين للألعاب المائية في فندق جميرا بيتش وتذكرتين لدخول مينا السلام ببلاش…
تقييمي للفندق: بصراحة يستاهلون 10 10 في كل شي وخدمتهم سريعة وايد بس ملاحظتي ع حجم الغرف شوي صغير مقارنة بفندق ميدان الغرف أطول واكبر..ويلي كانت عنده ملاحظة أن لو يخلون ستاف عرب أكثر بيكون أحسن…
البداية..
طلعنا من العين وكانت وجهتنا دبي .. دار الحي… وصولنا كان بالليل وبسهوله دلينا الفندق لأنه مميز بشكله وموقعه..نزل ريلي يشوف الحجز وما تأخر تقريبا 10 دقايق
طبعا ماصورت اللوبي و الفندق لأنه كان زحمة صورتهن في اليوم الثاني.. والصور في الدرب … المهم وبعدها طرشوا واحد ويانا يراوينا الفندق والغرفة وموقعها…واللي عيبني اللي طرشوه عربي الجنسية وخذنا للطابق 27…
أول ماندخل الغرفة
الحمام ع اليمين
ومستلزمات الحمام ورا المنظرة
والبانيو ع اليسار
مهتمين بأبسط التفاصيل لعبه صغيرة حق البيبي
المرحاض (كرمتوا)
الشاور..
المكتب : وعليه الكوفي ميكر
الكوفي ميكر
مرتبين الطاولة وحاطين كيكة لذييييذه وااايد ومشروب التمر بالتفاح وصحن فواكه..
وصورة للتعذيييييب…
السرير…
وحاطين حلاوة باتشي في بوكس صغير وكل مرة ينظفون الغرفة يحطولنا…
الطاولة عدال السرير…
الكنبة وبصراحة كانت مريحة وطويلة وااايد ..
والحلو ولدي كان يلعب بالمجلات…فديته والله هو اللي عطانا جو في هالرحله… عفكرة الميني بار كان تحت التلفزيون…
برياني دياي وفتوش
شاورما دياي مع بطاطا
وطلبت رووب حق ولدي ويايبينه في كوب حلوووو+ حمص وخبز
وفي اليوم الثاني وعينا بدري..وخذت هذي الصور من غرفتنا الصبح بدري
وهذي صور خذتها من اللفت وإحنا نازلين نتريق…
وهذيلا صورتهم بموبايلي لأنهم كانوا قراب من طاولتنا
صور لطاولتنا ( ع مدى يومين )…
وبعد الريوق خذنا لفه في الفندق وسرنا نادي سندباد للأطفال..مكان حلو وهادي علشان اليهال يلعبون واكثر شي عيبني انج لو تبين حد ييلس ويا عيالج تتصلين بالرسبشن وهم اييبولج ناني حق عيالج مقابل 100 درهم..وإذا عندج خدامة تقدرين تخلينهم يلعبون ويستانسون بدون أي رسوم
وفي فلبينية تيلس تلاعب اليهال …
وبعدين خذنا لفة في البوليفارد التابع للفندق..محلاتهم حلوة واغلبها ماركات وفي مطاعم متنوعة وااايد وكوفي شوب..
وبعد البريك سار ريلي يصلي وأنا سرت احجز موعد في السبا للمساج …مكان راقي وحلو وجدا مرتب وهادي…والأسعار جدا مناسبة وحلوة..
كان هدفنا من الرحلة الاستجمام والراحة…علشان جذي كانت طلعاتنا مب وايد وهذي مجموعة صور خذتها للفندق يوم سوينا تشيك اوت…
وهذا التمثال اللي خبل بولدي وتم يصارخ يبي يركب فوقه هاهاها
وفي النهاية .. أدعو لي الله يحفظ لي ريلي و ولدي ويدوم علينا نعمة الصحة والسعادة دووووم ..
الله يسعدكم