بالصدفة مريت مرتين بجوار فندق ارجان ما لفتني الا المبنى من الخارج .. لانه ما يطل على اي منظر
لكن اكتشفت من صديقة لي ان فيه مسبح خاص داخلي تقدرين تاخذين راحتج وعلى اساس هالشي قررنا
ان تكون وجهتنا لفندق ارجان روتانا ..
وبعد قيامي بالحجز عن طريق موقع بوكينق .. طبعا ياخواتي سعر الليلة بالشقة الي فيها مسبح بالموقع 1550 لكن بعد تأكيد الحجز
يحسبون عليج الضريبة .. المبلغ كامل 1650.. لكن كانت تجربة تستحق ! وساسرد بعض ملاحظاتي الخاصة كعادتي <<انفع اشتغل بتقييم الفنادق خخخ
المكان هادي .. الوصول له بصراحة كان صعب في بادي الامر مع اني من اهل دبي ولكن بحكم الشوارع وتغير الطرق والتحويلات قلنا بنعتمد على
خارطة الـ gps
للاسف معلومات الموقع عن احداثيات فندق ارجان غير صحيحة .. المهم ياخواتي ..
دخلنا المكان مثل ما ذكرت هادي جدا مافيه ازدحام بتاتا ً .. المكان فخم من الخارج والداخل .. اعجبني ديكور المكان ورائحته .مافيه رائحة تدخين بتاتا ً وهذا اهم شي بالنسبة لي
اول ما تدخلون الشقة بيكون على يمينكم اكرم الله القارئين حمام الصالة .. وعلى ايدج اليسار على طول مدخل المطبخ
من ملاحظتي الشخصية ان المطبخ لايوجد فيه احدى اهم الاشياء الي نحتاجها ( الميكرويف) وحين طلبتهم تزويدي اعتذرو لي برسالة خطية
يمكن سياستهم تمنع الله اعلم .. بس كانت احد اهم الاشياء الي استخدمها باقامتي
يوجد بالمطبخ : غسالة + فرن كهربائي مناسب جدا لمن يقيمون اقامة طويلة .. وملحقات المطبخ متوفرة ..
غرفة النوم مريحة .. الاضاءة اعجبتني كثيرا .. لكن المكان ضيق ما بين تلفزيون غرفة النوم ومابين السرير
حمام غرفة النوم متوفر فيه الدش والشور روم .. ومريح للاستخدام .. طبعاً احدى ملاحظتي انه مب متوفر السليبر .. وانا بصراحة انسى اخذ اشيائي الخاصة واعتمد على الفندق
غرفة الصالة مريحة للجلسة بصراحة .. لان البلكونة تدخل منها اضاءة ..
طاولة الطعام .. مقابل المطبخ .. لاباس بها
المسبح وهو الهدف الرئيسي من الزيارة 
مسبح في مكان مكشوف نسبيا .. لكن جميل للغاية .. تاخذين راحتج مع اسرتج ..
اترككم الان مع الصور .. وان شا ءالله التقرير كان بسيط ومبسط لعيونكم
ملاحظة : أكل الفندق تقييمي له 40% من وجهة نظري .. ابدا ما كان عاجبني الريوق او الغداء .. بصراحة والقائمة مافيها خيارات متعددة ..
مشكوووره عالصور الحلوه ^_^
مشكوره ع الصور الحلوه وانا مجربه ارجان وااايد حلو ومريح بس ماكلنا فيه طلبنا من برع فما اعرف عن اكله بس زين قلتي عشان مانطلب من عندهم
بس اختي انا كل مره ادور في بوكينغ عن الغرفه اللي فيها مسبح بس ماشي ووحده تقرب لي حجزت بس بالتيلفون مباشره قالو لها مايحطون هالغرفه اللي فيها مسبح في بوكينغ وخذتها ع 1800
ممكن تعطيني اسمها بالضبط في الموقع وكم غرفه فيها؟؟؟؟
والسمووووحه طولت بالرمسه
بصراحة انا زرته الفندق و ما عجبني ابدا. الأكل زين نوعا ما بس غالي و جليل مب الوجبات الراهية يدوب يكفي شخص واحد.
بس ما دريت بالمسبح الإ احينه صراحه حلو بس صغير بس يستهال التجربه مره ثاينة و عفكره مسبحهم المشترك بعد حلو حق اليهال طبعا
عن المسابح بعده بالم ديزيت افضل قبل رامسين عنه في السياحه