عشانا اليوم كان شعيرية صينية وخليت وياها دياي وخضروات
اقروا المقادير والطريقة والاهم من كل هذا شوفوا الصور
المقادير:
شعيرية صينية سواء الخفيفة والا الغليظة على كيفكن واطبخنها في الماي وصفنها
فليفلة (فلفل حلو) اخضر واحمر واصفر مقطعة قطع طويلة ورفيعه
ذرة صغيرونة مقطعة مربعات
فطر (هالشيء نسيته بس انتن عن تنسنه بعد)
جزر مقطع دواير رفيعه
صدور دجاج مقطعة مربعات صغيره
بصل مقطع قطع صغيره
ثوم مدقوق
طماط مقطع قطع صغيره
مكعبين ماجي
فلفل اخضر حار قرنين مقطع قطع صغيره(اللي ما يحب الفلفل يستغني عنه عادي)
كركم
كزبره مطحونه
الطريقة:
قلي البصل وبعده خلي الثوم وبعدين الطماط لين ما يذيل ومعاه الفلفل الاخضر الحار وضيفي عليه كركم شويه وكزبره مطحونه
حطي الدياي ومعاه مكعبين ماجي
بعدين غطي الجدر لين ما يستوي الدياي ما راح ياخذ وقت لانه مقطع قطع صغيرة
بعدين ضيفي كل الخضروات
الفليفلة والجزر والذره والفطر وغطي الجدر الين ما تستوي هالخضروات
واخرررر شيء ضيفي عليه الشعيريه المطبوخةوخلطيه معاه وخليه ينطبخ دقايق وبالهنا والعافية
الحين دور الصور
بعد ما حملت الصور تذكرت اني ما خليت عليها اسمي..بمعنى اخر حقوق الفكر والنشر اكيد غير محفوظة وعليها بالعافية اللي تنقل الموضوع بس عاد ها عن تنسى اسمي والا اقل شيء المدونة
واللي يعجبها الموضوع يا ريت تدعيلي بدعوه حلوه
وااااايد احب هالاكلات
تسلمين عزيزتي عالمقادير ..
و ان شالله لما بجرب بحط لج تطبيقي ^_~ ..
لا تحرمينا من يديدج ..