والصلاة والسلام على رسول الله محمد صلى الله عليه وسلم
عزيزاتي بحطلكم تجاربي للبشره وصدق صدق استفدت
صح كنت اعاني شراتكن بس الحمدلله عالجت نفسي بالبيت
ايلا ادش بالموضوع
دومي اجرب ماسكات لويهي لكن كلش اخرطي. يحمر ويهي ويجففه ويسممرني زةد
ولكن اخر مره ولله الحمد والشكر والثناء الجزيل الحسن
طحت على ماسك روعه روعه يجنن ما شاء الله اللهم بارك
يعطي نضار مش طبيعيه وشد ومع الاستمرار يبيض وايد
الماسك هو
شوي من بياض البيض فقط بياض البيض لا تخلطون وياه الصفار
وليمون نص حبه
وملعقة حمص مطحون ايي حاهز من الجمعيه ونشا ملعقه
و حطي ع ويهج من يبدا يجف غسلوه على طول
بنات أنا خبله قبل لما كنت احط ماسك بويهي كنت اخليه وايد حتى لو جف اخليه عبالي انه زين
تطلع النتيجه شينه
المهم لما يجف غسلوه ؤسوه 3 مرات بالاسبوع
هالاتي السود
بليل اسوي مساج بخليط من زيت اللوز العادي وزيت جنين القممح وعلى طول
احط كريم جارنير الي بالجمعيه وبنهار احط جارنير الرول الي اليديد لأنه يكون فيه خافي العيوب
والحمدلله والشكر النتيجه روعه
الجسم
بقولكم على حركه يسونها المغربيات
بعضهن
اخصص اسبوع في كل شهر واسوي هالخلطه عباره عن
حنه مغربيه +داد+ سدر ِ+ ليمون + غسول مغربي
ويا شاي اخضر يعني استغني عن ماي الورد
الخلطه اتكون دافيه مايله على الحراره. بسبب الشاي طبعا الشاي بدون سكر
وفي بعد خلطه بس داد وليمون وحنه مغربيه
بس أنا زودت عليه الاعشاب الي فوق
المهم اخليه بجسمي ساعتين او 3 واغسله بس بالماي بدون فرك وبدون صابون
وبس اكمل اسبوع اسير اسوي حمام مغربي
واو ما شاء الله اللهم بارك بياض ولا اروع
ونعومه شيء خيالي
واوساخ وايده تظهر وايد وايد
بس صارلس فتره ما سويته لأني مالقيت وقت الصراحه خخخخخخ.
يمكن شهرين ماسويته
بس على فكره الحمام المغربي وايد مهم لا تستهينؤن فيه. كل اسبوع اسويلي ولله الحمد.
اوك شيء ثاني
للجسم
احسن لوشن
زيت اركان المغربي اخذه من تاجره اوثق فيها صراحه
زبدة الشيا
كميات مساويه
وزيت اللوز
اخلطهم ويا جلسوليد لين يتجانسون وويا نيفيا الي ايي لون قوطيه ازرق
الجديم
الكريمات كميات متساويه والزيوت كميات متساويه. ……ادهني جسمج بليل واتسبحي ثاني يوم
وعشان نعومه وبياض اكثر
استخدميه مرتين
يعني مثلا قبل النوم ولما تنشين تسبحين والعصرخذي منه كميه خلطيه ويا ليمون
وخليه ع جسمج ساعتين او ثلاث
الي يتعايزن وما يحبن خلطاتت وحمام مغربي يستخدمن هاللوشن ويا ليمون قبل السبوح
بس خذي ملعقه او الي يكفيج وحطي بصحن وخلطي ويا ليمون.
شيء خيالي ماشاء الله اللهم بارك
سواد بعض المناطق
زيت غلسرين +زيت لوز+ زيت زيتون ويا ليمون
مساج في المناطق الداكنه اكثر عن مره في اليوم يعني من مرتين الي 3مرات
امممم شو بعد
هي صح السكراب
خلطي فنجان سكر ويا نص حبه ليمون ويا ملعقه صغيره خل ويا فنجان ملح ونيدو
اتنعم ويلمع الجسم بليز جربوه
الله بارك
اعتقد هذا كل الي اسويه
والحمدلله النتايج من احسن إلى احسن
وماشاء الله واللهم بارك والحمدلله على ما وصلت له من نتائج
بس بلا عيازه يا بنات وخلو عنكن خربطة بالخلطات كل يوم شيء
مب زين ترا
أنا قبل كنت كل يوم شيء كنت دوم القى نتايج سيئه لين استقريت واستمريت عل. هالخلطات
والحمدلله
في النهايه حابه اشكر ريم دي اكس بي وايد فادتني بصراحه واغراصي المغربيه دوم من عندها
صدق اشكرها من كل قلبي وجزاها الله كل خير يارب ووفقها الله
اي سؤال ماراح ارد على الخاص ياليت تسألون في الموضوع عشان الكل يستفيد
والله ولي التوفيق
الموضوع حلو .. وخلطاتج احلى ..
انا بعد شراتج كل اسبوعين مره اسوي حمام مغربي ..
الحمام المغربي وحد لون بشرتيه والحمدلله ..
ما اصدق الي يقولون الحمام المغربي يخرب الجسم ويتعب البشره .. بالعكس والله .. انا اقولكم .. وعن تجربه ..
ترانيه اسوي حمام مغربي من 3 سنوات .. كل اسبوعين مره .. ولون بشرتيه لووون واحد .. ماعنديه اماكن داكنه .. الحمدلله ..
والسموحه ..
لازم الوحده تعرف شو اللي يناسبها ولازم تستمر عشان تعرف اذا ينفع ولا لا…
يسلمووووووووووووووووو
هي أنا استغرب لما اسمع حريم او بنات يعارضن عن الحمام المغربي
صج اشوفه شيء روعه
لوني ماشاء الله اللهم بارك متوحد
في وايد يقولون لا يسود ومدري شو هم يستخدمونه بطريقه غلط والله اعلم
عموما ضرفتيني بمرورج العطر يالغلا
واكيد كلامج صح يالغلا.
يعطيج العافيه
ممكن يالغاليه تدليني عالتاجره اللي تبيع زيت اركان وزبدة الشيا