شحالكن يالغاليات عساكن بخير.
حبايبي فكرت ان نسوي تجمع للي يسون حمام مغربي.
اولا الحمام المغربي معروف بفوايده في توحيد لون الجسم
وتبيضه وتنعيمه
بعض البنات يقولن انا كنت اسوي حمام مغربي لكنه مافادني
ليش مافادج ؟!!!!!!!!!!!
يا انكم تسونه بطريقه غلط
وهو انكم تفركون بالقو
اكبر غلط لما الوحده تفرك بالقو لأنها تسود بزياده.
والنتيجه عكسيه
ثانيا. في بعض البنات الله يهداهن مما يستمرن على الشي. الحمام المغربي روعه وهو الوحيد الي فادني
انا ام الخلطات. لكن استمريت على الحمام المغربي
كل خميس اسويلي
وهو لازم كل اسبوع البنت تسويلها حمام مغربي
ثالثا. واهم سبب بعض او اغلب البنات الله يهداهن يسون في الصوالين اكيد الله ما بيبارك فيهن لأن حرام احد يشوف عورتج غير ريلج
بصراحه قبل كنت اسوي بصاوالين وكنت ادري ان حرام بس ماهقيت عظمة الذنب الي أنا مسوتنه وعقب ربي هداني والحمدلله.
رابعا. بعض البنات عقب ما يطلعن من الحمام يحطن لوشن.
غلط اكبر غلط. المسام مفتوح كيف احط لوشن هالشي يسمر ويعطي نتيجه عكسيه المفروض اتحطين زيت لوز او زيت اركان
انا بصراحه خلطت زيت اللوز ويا زيت الأركان خذته من تاجره اهنه بالمدونة
وادهن جسمي عقب الحمام. روعه لمعه خياليه.
خامسا. الغلط هو عدم الترطيب. ظروري الترطيب واكيد مليتو من سالفة الترطيب بس وايد مهم وعن تجربه قبل ماكنت ارطب جسمي ولكن عقب ما استمريت على الترطيب جسمي وايد فتح ولوني روعه ما شاء الله وتوحد جسمي.
المهم عقب ما رمست وصدعتكن وايد بحط طريقتي في الحمام المغربي.
اسويه كل اسبوع في الويكند
اول شيء انا استخدم صابون العرائس التونسي او صابون الحمام المغربي.
ثاني شي ازهبه هو خلطة الاعشاب
عباره عن عشبة الداد
الحنه المغربيه
الغسول او الطين المغربي
بابونج وخزامى ورود مطحون عدل شرات البودر
وسد
كلهم احطهم في عليه وأخلطه ويا بعض. علبه كبيره طبعا.
وكل ما يت أسوي حمام مغربي اخذ ملعقتين منهم. واخلطهم بماي ورد و قطرات ليمون
ثالث شيء ازهبه هو. روب ويا نشا و شوي بس شوي من العكر الفاسي يعني لونه يكون وردي فاتح. ولكني اخليه بارد احطه في الفريزر اخلطه واخليه في الفريزر لين اخلص الحمام واحطه في النهايه عسب يبرد جسمي ويشده.
اول شيء. اغسل جسمي بماي حار الدرجه الي يتحملها جسمي. انا حمامي صغير ويطلع البخار.
بعدين ايب الصابون المغربي او العرائس التونسي.
بنات انتبهو بلي بقوله. المفروض ناخذ شويه شويه شويه بس من الصابون
ونمسحه على الجسم
بس مسحه يا بنات هب تفركن انا قبل كنت خبله افرك واحط وايد عبالي بينظفني زياده
لكن المفروض تاخذي شوي واتحطينه على الخفيف ومول ما تزودين.
اخليه عشر دقايق او 15 دقيقه على فكره حتى لو ماشي بخار تررى الوساخه تطلع بالهبل يعني السر مب بالبخار السر في نوعية الصابون الاصلي والليفه الاصليه.
وعقب ما اخلص
اغسل جسمي بماي دافي مايل على الحراره اغسله عدل من الصابون ظروري اتغسلين جسمج عدل لأن ما بيطلع الوساخه لو فيه بقايا من الصابون.
وعقب اغسل الليفه بماي حار واعصره عدل
ظروري تعصرين الليفه من الماي عسب تظهر الوساخه
وعقبها افرك
بنات ما يحتاي تفركون بالقو
لأن يعطي نتيجه عكسيه وهذا من خلال تجربه.
عقب ما اخلص الفرك اغسل جسمي عادي
واحط خلطة الاعشاب واخليه 15 او عشرين دقيقه في هالوقت الصراحه ملل في الحمام وطويل الوقت
يا اني اكمل فرك ريولي او انئ ادش المدونة من خلال البلاك بيري واتسلى بالبلاك بيري لوقت يمر بسرعه
عقب اغسل جسمي
وايب خلطة الروب من الثلاجه واحطه على جسمي
تراه ما يكون مثلج يكون بارد يريح الجسم. واخليه 10 دقايق
واغسل جسمي وطبعا شعري
وخلصت الحمام
واحط خلطة زيت اللوز ويا الاركان وحمام الهنى.
قبل كنت اسوي الحمام غلط في غلط والحمدلله الحين تعلمته عدل
والنتيجه رروعه
ويلا يا بنات خلو هالتجمع تجمع مفيد وكل وحده تبدا اتسوي حمام مغربي لأنه صج روعه
صدقوني من تبدون تسونه ما بتستغنون عنه
بسبة النتايج.
يلا كل وحده اتحط طريقتها عسب نستفيد وانخلي هالتجمع للحمام المغربي
زين سويتي خير فتحتي الموضوع خخخ
شوفي ان شاء الله اسوي وان تاخرت عليج طرشي ع الخاص وهزبيني خخ
صدقج لوتسوين حمام مغربي يكفي عن الخلطات
مجربتنه مره شهر وشووو صرت
ووكل من شافني سالني شو اسوي
اقولهم اتفرك خخخ..
المهمحالياا الصابون سارقنه اخوي ههههههههههههههههههههه
شوفوا الشباب يتنظفون ويسون وونحن كساااله!!
وطريقتج شراتج بس ماسوي زيوت او اعشاب
اكتفي بترطيب بكريم جلوسيد
فرحتوني بردودكن
يلا بنخلي هالتجمع تشجيع لبعضنا عسب ما نتكسل
شيء بنات يقولن ما بنسوي لين نتزوج
اكبر غلط
انا اذا بسوي شيء بسويه حق عمري مب حق الريال. هههههههههههه
حلو لما تحسون اعماركن نظيفات ولونكن موحد ياي شعور جميل
وانا الحين طلبت باكيج وان شاء الله بيوصلني قريب واي وحده تتعايز بهزبها على
الخاص خخخخخخخخخخ
وفي حلمك مايسد الخلل ,وفي عفوك مايمحو الزلل
اللهم فبقوة تدبيرك وعظيم عفوك وسعة حلمك وفيض كرمك
اسألك ان تديرني بأحسن التدابير وتلطف بي وتنجيني مما يخيفني
ويهمني
اللهم لا أضام وانت حسبي ولا أفتقر وأنت ربي ,
فأصلح لي شأني كله ولا تكلني الى نفسي
طرفة عين ولا حول ولاقوة الابك
اللهم صل وسلم وبارك على سيدنا محمد وعلى اله وصحبه