تجربتي مع اللولب و انسداد قنوات فالوب …!! لصحة الحمل

السلام عليكم

الموضوع ممكن يكون فضفضه ..و في نفس الوقت نصيحه و تستفيدون من تجربتي و ما تكررون نفس اخطائي ..

اليوم كان يوم صعب صعب صعب جدا بالنسبه لي مريت باشيا صعبه …

الحمدلله عندي عيال ( 2) الله يحفظهم و يبارك فيهم و يرزقني غيرهم يارب ..حملت في الاثنين بدون ما اعرف شو يعني اباضه او تبويض او
ايام الخصوبه حتى طول دورتي ما كنت اعرفها سبحان الله الله رزقني بحملين ورا بعض بدون حتى ما اطلب …..حملت ورا بعض و لاني تعبت في حملي الثاني وولادتي وايد قررت امنع فتره اخذ بريك لان ال 2 كانوا في سن متقاربه و جني كنت اربي توأم …

طبعا نصحوني ربيعاتي اني اركب لولب ..وزوجي اصر عليا اني اركبه لانه على قولته هاذيج الفتره خلاص ما يبا عيال زياده و مكتفي بهالاثنين انا طبعا كنت ابغي امنع لفتره بس لين يكبرون و عقبها اعقه و احمل عكس زوجي اللي كان رافض نهائيا فكره اني احمل بعد

ركبت و طول الفتره اللي كنت مركبه فيها اللولب و هيه 3 سنيني كنت اتابع مع دكتورتي ( للاسف كان اختياري خاطئ للدكتورة)
كانت متابعاتي كلها زينه و اني ما اعاني من شي و كل شي سليم .بعد هال 3 سنين قررت اعقه و احمل و طبعا ريلي غير رايه و يبا عيال
و مستعيل بعد …سنه كامله و انا سايره راده و تقولي ما فيج شي سويت تصوير و تحاليل دم وعلى قولتها كل التحاليل اللازمه و ما فييني شي و ضربتني ابره تفجير و ما استوا حمل خليت زوجي يسوي تحليل و ما فيه شي

طول هالمده الدكتورة مول ما تكلمت عن قنوات فالوب و طبعا انا ما اعرف شي عنهم لين قالتلي ربيعتي سيري عند دكتورة ثانيه ..الدكتورة الثانيه قالت اول شي لازم تسوينه تجيكين القنوات لانه احيانا اللولب يسدهن …انا انصدمت قلتلها اتابع معاها 4سنوات هاذيج الدكتورة و لا مره طرتلي القنوات ..المهم سويت سيرج عن اشعه الصبغه و كل المواضيع تخوف عن هالاشعه …من شهر 11 العام و انا اقرا و متخوفه اسويها ..
لين الشهر اللي قالتلي الدكتورة لا تين لين تسوينها لانج سايره راده على الفاضي …المهم طبعا انا ابغي احمل شو سويت سرت و اشتريت حبوب فيتكس اللي الكل يتكلم عنهن و خذت دوا شراب من الصيدليه يساعد على الحمل
اتاخرت الدورة عليا من غير الالام اللي تيني سويت تحليل منزلي للبول و انتو بكرامه جهازين و عطوني اني حامل ما تتخيلون كيف فرحت و زوجي فرح عشت 3 ايام على اساس اني حامل سرت اسوي تحليل دم طلع ما في حمل و عقبها نزلت عليا الدورة عقب ما اخرت اسبوع و اكثر و حتى مدتها طولت لانه الفيتكس لخبطلي كل شي و طبعا هذا لاني سمعت كلام بنات في المدونة و صدقته ..

طبعا بعد هالصدمه قررت اسوي اشعه الصبغه و سويتها اليوم ..طبعا الاشعه مب مؤلمه مثل ما زيغوني الم عادي يحتمل …و ما تاخذ 5 دقايق و الصدمه القناتين متسكرات .دارت فيني الدنيا انصدمت …سيده سرت عند دكتورتي و صدمتني زياده في ماي ساد القناتين و هالماي لازم
ينسحب لانه لو فرضا استوا حمل هالماي يجتل الجنين
من غير انه لو ما انشال ممكن يسويلي مضاعفات و يخرب القناتين ….و السبب في انسداد القنوات انه خلال فتره تركيبي اللولب استوا التهاب و الدكتورة ما عرفت ووصل للقنوات ….
الزبده لازم اسوي منظار ثلاث فتحات في البطن تحت و يجوفون القنوات في احتمال مب متسكرات بس الماي اكيد موجود…

طبعا راجعت نفسي السنين اللي عدت و كيف انا تبطرت على نعمه ربي عطاني اياها احمل بدون حتى ما اطلب او افكر بدون ما اعالج بدون اي شي و غيري يراكض سنين و سنين …ما حمدت ربي و سرت حطيت مانع و زوجي نفس الشي …
سوء اختياري للدكتورة الله يسامحها و اسمع كلام اي حد و اطبقه عشان يساعدني اني احمل متناسيه في رب هو اللي لازم اطلبه يرزقني و هالاشيا كلها اسباب ..و المفروض قبل ما اخذ اي دوا لازم استشير الدكتورة …

الحمدلله على كل حال …تعبانه نفسيا وايد و اتمنى اسير عند دكتورة ثانيه و تقولي عكس الكلام اللي سمعته بس قررت اني ما افكر بالحمل و افكر بصحتي و اعالج عمري …زوجي يقدر ياخذ غيري و اييب عيال بس عيالي عندهم ام وحده اذا سارت ما بيحصلون غيرها و صحتي اذا راحت ما بترد ….

هاذي تجرتبي يمكن غيري يمر باللي انا مريت فيه و ادعولي بالذريه الصالحةو الشفاء العاجل
…

اسأل الله العزيز الحكيم بأن ويشفيج ويرزقج ويرزق كل محرومة الذرية الصالحة عاجلا غير آجل

هالماي من وين ياااااج من اشعة الصبغة ؟؟؟؟

والله يسهل عليج يااااارب

اختي ارتاحي واطمني ليش هالكآبه الحمدلله الرزق بيد رب العالمين والحمدلله الله سبحانه رزقج بعيال قولي غناتي الحمد لله في ناس صار وياهم انسداد وماي في الانبوب بقدره قادر حملوا وفي لا وبعدين بمنظار يشلون هالماي انتي بعدج هذه اول تجربه انا جدامج ماعنديه عيال ستوي عندي انسداد وماي في الانابيب بسبب حمل خارجي وبدون سبب سويت اشعه قبلها وثلاث مرات او اربع مضار وتجيك على الانابيب وكل مره نفس الشي لين شليت ابوب واحد وباقي عندي ابوب لا وقالولي بيشيلونه بعد لكن مافقت الامل بربي ، والحمدلله وسويت اطفال انابيب وفشلت والحين هالاسبوع بجر بعد ورب العالمين كبير يالغاليه شونقدر انسوي غير ندعي وندعي وندعي مابيدنا شئ نتريا رحمه من ربنا استعيني بالصبر والصلاه مثل ماوصانا رب العالمين ، وجربي دكتور ثاني انا انصحج بدكتور للاخصاب مع احترامي لدكاتره الحريم مايعرفن شئ سولنا ضرر ومايعرفن يعالجن طبعا مب الكل بس الاغلبيه ، والله كل ما اختنق من الضيج افرش سياتي واناجي ربي واصييييييييييييييييييييييييييييييييح لين ما أطلع كل لفقلبي واول انشالله المره اليايه احسن ، غناتي توكلي على ربج وهذا رزقج وخلاص اذا رب العالمين اراد يعطيج بيعطيج بدون حساب ،الله يفرج همج وهمي وهم كل خواتي المتأخرات في الحمل انشالله هالايام بنذكرها بالخير ربنا كبير يالغاليه ، والسموحه طولت عليج الغاليه بس لاني مجربه

الماي من اللولب ..كان مسويلي التهاب بس داخل و الدكتورة مااكتشفت و وصل القناه

صح الحمدلله الحمدلله الحمدلله عندي عيال الله يحفظهم و يخليهم
و الله ياجرج يا رب على صبرج و تحملج …الله يعينج و يرزقج بالذرية الصالحه ….انا يتني صدمه لانه ما كان فيني شي و فجاه طلعتلي هالسوالف
بس الحمدلله على كل حال و الله يرزقني و يرزق كل محروم

الله يشفيج ويرزقج الحمل الثابت السليم وتفرحين باخوان واخوات لعيالج قريب