تجربتي الشخصيه مع حبوب قاطع الشهيه

السلام عليكم

شحالكم صبايا ؟؟

وشو مسوين ؟؟ ها بشروا شو الرجيم من ضعف منو ما ضعف؟؟

المدونة هالأيام صخه و البنات لا حس و لا خبر بس ما نلومهم رمضان و الكل مشغول

ما بطول عليكم بنات..

هالقسم مخصص للسمنه و النحافه و أغلب البنات يبون يضعفون
كل وحده إتبعت رجيم شكل و البنات يسوون أي شي في سبيل الرشاقه (الي يبي الحلو يصبر ع المر)

أنا سويت رجيم الكورن فليكس و الحمد لله ضعفت بس ما أدري شو الي خلاني آخذ حبوب قاطع الشهيه يمكن لأني كنت أبا أضعف بفتره قصيره(كمن يوم)

أول يوم عدا على خير ثاني يوم بغيت أهلك

إرهاق و تعب بس الحق ينقال بأقل من إسبوع ضعفت 3 كيلو تقريبا و طبعاً هالشي مب صحي أبداً

سرت العياده البارحه و رمست الدكتوره و صراحه صدمتني و هي ترمس عن حبوب التخسيس بشكل عام

قلت لها أنا وايد أعطش و إرهاق و دوخه و من الأعراض إستنتجت إن السكر نازل عندي و قالت إن هالدوا ينزل السكر و ما يستوي تاخذون حبوب ما إتعرفون عنها شي و للحين الدراسات ما أثبتت إن هلحبوب زينه ..الخ…

و الصدمه الثانيه إن هالحبوب إتنشط عمل الغده الدرقيه و إقروا مضار الغده الدرقيه ..و أنا و لله الحمد كنت أعاني من الغده الدرقيه لكن لن آخر تحليل كان كل شي أوكي..

و الصدمه الكبيره و الي محد بيتوقعها إن هالحبوب إتييب أمراض نفسيه
و قالت لي ما إتييج كوابيس وما إترومين إتنامين و كآبه و ضيج و قلق

و سبحان الله كل ها فيني بهالفتره من خذت لحبوب بس أنا قلت يمكن لإنه وقت أخذ لحبوب إتزامن مع الدوره الشهريه بس مب من عوايدي أتم جيه ضيج و قلق و إكتآب..و صراحه وايد إتضايجت من سمعت كلامها و إن المرض النفسي ممكن يزيد لدرجه إنها قالت لي بعطيج حبوب منومه قلت لها الحمد لله إرقادي أوكي ..

إتصدقون يا بنات دخلت العياده و أنا ما فيني شي سوا إرهاق بسيط و ظهرت و أنا أحس إني بموت كلامها صدمني و طبعا غير الأعراض الثانيه الي قالت لي عنها
قمت أوسوس لا آكل ولا شي أحس كل شي إمتن حتى التمر ما عرف كيف صار حالي كنت مستانسه إني ضعفت و الكل لاحظ هالشي و قياساتي إتغيرت بفتره قصيره بس التعب الي فيني و الكآبه لا توووصف و خلتني أنسى الوناسه

بنات أنا ما أبا أقول لكم قصه حياتي بس إحذرا من هالحبوب أنا كلت تقريبا 7 حبات و جيه صار فيني عيل الي إتخلص علبه كامله شو مصيرها!!!!

بلخص لكم مضارها بنقاط عشان إتحطون هالشي فبالكم:

– سقوط الشعر

-أمراض نفسيه و كوابيس

-قلة نوم و ضيج و كآبه و قلق

-عطش شديد نتيجة نقص السكر بلجسم

-دوخه

-أمراض الغده الدرقيه

-عند الإنقطاع عن أخذ الحبوب يرجع وزنج ضعف الوزن الي خسرتيه (إلا إذا حافظتي بقوه و جتلتي عمرج و تميتي إتسوين رجيم طول حياتج)

-يأثر ع المخ بشكل مباشر

-سوء الجهاز الهضمي و فقدان الشهيه حتى بعد الإنقطاع عن أخذ الحبوب(مشاكل في جهاز المناعة)

نصيحه : لا تستخدمون هالحبوب صح بتضعفون بفتره قصيره بس ضعف من غير صحه .. و للأسف ما سمعت نصايح الي نصحوني..

تموا على رجيم تخفيف الأكل أحسن لكم لو حتى كانت النتيجه بعد فتره طويله ..

إسمحولي طولت عليكم بس حبيت أفيدكم بتجربتي البسيطه مع هالحبوب .. هي ضرتني الحين من أول ما إستخدمتها و ممكن ما ضرت بنات لين الحين بس صدقوني إنتو بغنى عن هالحبوب..

شكراً لحسن إستماعكم رشيقات و إن الله باجر بسوي تحليل دم عشان أعرف مضار هالحبوب علي و بحط لكم النتيجه بعد كمن يوم عشان تستفيدون و أنصحكم إتسيرون إتسوون هالتحليل (تحليل الدم الالكتروني) يعني يقيسون نسبة الماي و السكر و الفيتامينات الخ..

^_^

سلام

بس ممكن تقولين النا اسم الحبوب

حبيبتي اي حبوب تقطع الشهيه جذي موب بس زين الاتات وها الشي معروف من زمان بس الناس اللي ياخذونها اللي ما يقدرون يسيطرون على نفسهم … والتعب اللي ياج من قلة الاكل اللي ما ياكل يستويله هبوط في السكر …. انا ما ادافع عن الحبوب بس لالالازم قبل ما تاخذين الشي تشوفين اول تجارب البنات عليه …
وسلامات القانونيه ما تشوفين شر …. واحس انج ظعيفه خلاص لا تسوين ريجيم اوكي انتي الحين…

قبل ما تا خذين الحبوب خذي أكل صحي …. وبعدين إشربيها

إسم الحبوب (قاطع الشهيه) و شي موضوع بهالقسم يتكلم عن هالحبوب
و بنات وااايد يستخدمونها
شكرا على مرورج
^_^

سلام

أحسن لج..تخفيف الأكل و الرياضه أحسن رجيم
نتريه وزنج اليديد شدي حيلج
^_^

سلام