~ تجارب أموره المنزليه في مملكتها الصغيره ~ بالصور عمل يدوي

السلام عليكم عرايس و ستات بيت <<<<حريم

هاو آر يو؟؟

شحالكن؟؟

ان شاء الله بخير و سهاله
حبيت اعرض لكم نماذج من طريقتي في ترتيب مملكتي الصغيره

وايد حريم شراتي ساكنات في بيت أهل الزوج.

في العاده قسم (غرفة نوم و صاله و حمام *الله يعزكم* )

و البعض مثلي مملكتها وايد صغيره على قدها (غرفة نوم و حمام) والحمدلله على كل حال

بس الحرمه السنعه *احم حلوه سنعه* اللي تقدر تمشي امورها بروحها بدون مساعده خدامه اهل الزوج صح؟؟

يعني اللي توها متزوجه ما تحتاج خدامه و مب حلوه ابدا ان العروس تخلي خدامة عمتها تنظف غرفتها و حمامها،،شو بتقول عمتها؟؟ (هذا رايي و احس اللي غير جيه يعني مب حرمه خخخخ امزح بس خلكم من الدلع في هالامور مافي احلا من الاعتماد على النفس)

يعني الريال ليش يتزوج؟؟؟ اذا الخدامه تنظف و ترتب فراشهم؟؟؟

لا لا لا لا مب حلوه <<<<<<<<جني وايد اتفلسفت؟؟

الموووهييييم

حبيت احط لكم صور بسيطه من أرجاء مملكتي و ان شاء الله يا رب تستفيدون و خصوصا اللي توها معرسه و طريقتي في غسل الحمام *الله يعزكم* و الملابس الداخليه.

يلا نبدأ

قولو،،،

بسم الله ما شاء الله لا حول ولا قوة الا بالله

اولا ادراج التسريحه. انا ماحب احط الميك أب و اغراضي الشخصيه على التسريحه افضل اتكون مرتبه و فيها مساحات فاضيه عسب جيه كل شي في السدات (الادراج)

مثل ما تشوفون استخدمت علب بلاستيك مال حفظ الاكل. خخخخ احم
اشتريت الحجم اللي يناسب ادراجي.
علبه فيها المشابيص و المشط و الكليبات الصغيره الملونه الكيوت.
و العلبه الثانيه حطيت داخلها علبه مقسمه حق الميك و الارواج (العلبه من محل اكسبريشن التابع لمحلات سفير)

العلبه البلاستيكيه حصلتها في ايكيا و تناسب حجم السده ف خذتها
و فيها باقي الميك أب و علب الميك اب الكبيره

و هالدرج بعد فيه علب بلاستيك (واااايد مفيده هالعلب)

،
،
،

و الحينه العطور

انا حاطه كل عطوري في السدات (الادراج) بس حاطه علبه فوق التسريحه فيها العطور اللي استخدمها هالفتره و كل اسبوع او اسبوعين ابدل العطور. <<<<جيه احسن لان ما شاء الله عندي وايد عطور و ماحب طاوله التسريحه زحمه. و عدال علبتي علبة عطور ريلي (الله يحفظه)

و هنيه صينيه يايتني هديه عرسي من مرت خالي (الله يسعدها)
كان فيها غراش عطور عربيه و انا زدت عليها قواطي الدخون و المندوس الصغيروني حاطه فيه عود الرصاصي(من خالتيه الله يحفظها). طبعا عندي مندوس عووود فيه كل العطور العربيه بس حاطتنه في زاوية الحجره و من فتره لفتره ابدل العطور اللي في الصينيه عسب اغير. (لازم الحرمه اتغير صح؟ اكيد صح )

دخون فزاع ما يعيبني وايد بس ريحته تصير حلوه يوم اخلط وياه ريحه ثانيه.

والآن ننتقل لغرفة الملابس الصغيره (مب غرفه هي ممر صغيره)

الكبت (الخزانه) بس 6 أبواب!!

ريلي ماخذ بابين وانا أربع بيبان (حرمه لازم)

بس 6 ابواب شو بيكفن صح

عاد انا اول ماعرست على طول طيران على ايكيا و خذت افكار للتخزين

و شريت تقسيمات للثياب (اللي لونها ابيض) شوفوها

مب مستغله العلاقه لانها اصلا ما تشل شي عسب جيه حطيت التقسيمات.

الشنط الصفرا خذتها من وحده من بنات المنتدى و هي لحفظ الاندروير (اناحاطه فيه الاندروير المميز والخاص مب القطنيات )

التقسيمات البيضا فيها (البجايم + اللانجيري + الملابس الكاجوال + المخاوير + الاندروير القطني + الذلاقات الحريره و الصوفيه الخ) و ما شاء الله كفت العلب لاني مرتبه الثياب عدل (قولو ماشاء الله)

،
،
،
،

البابين الثانيين معلقه فيهن المخاوير الحريريه و الغاليه + المغربيات + العبي + قمصان النوم الطويله.

اتشوفون اللي معلقتنه؟؟ هذا اصلا مال النعول و الجواتي *كرم الله السامعين* بس انا استغليته بطريقتي من ايكيا

انا احط فيه البجايم و الاندروير و اللانجيري اللي بلبسه خلال الاسبوع (يعني اطلع من العلب الكبيره و اجهز الثياب اللي بلبسها في بداية الاسبوع وجيه)
وايد استفدت في هالنقطه بلا عوار راس كل يوم افكر شو بلبس صح.

و خصوصا العرايس ما عندهن وقت لازم يفكرن بسرعه.

هالفكره حق الكل مب بس للعرايس. شو رايكم؟؟؟

نكمل
،
،
،
،

و تحت الثياب الطويله خاشه تقسيمه الثياب مالت ايكيا حاطه فيها شيل البيت (او الوقايات او الشيل العمانيه كل حد يسميها باسم) صورت لكم وحده بس عسب تاخذون فكره.

،
،
،

و هالابتكار المميز واللي كلكم عرفتوه الحين هو علاقة الشنط من "دايسو"

شي مميز و حلو و ماياخذ مساحه و رخيييص (خذته على 5 بس الحين على 6 دراهم)

،
،
،

و هذي طريقتي في ترتيب طرابيش كنادير بعلي العزيز

خذت العلاقات من "دايسو" فيهن لزق و كل علاقه فيها 3 أقسام كل قسم اخش فيها 3 طرابيش.

أهم شي ان الطرابيش في متناول اليد و مجابله الكنادير.

،
،
،

والحييين ننتقل لآخر قسم في مملكتي و هو بيت الراحه *الله يعزكم*

حمامي ستايله مال اول هههه بس اضفت عليه إضافات (انا احب الحمامات الحديثه "المودرن" شرات مال ايكيا)

سرت ايكيا و اشتريت منهم كبتات (5 قطع و ب 300 و شي درهم!! ما شاء الله وايد زين سعره و نوعيته لا باس فيها بس تفي بالغرض حاليا و هي من الخشب المضغوط/نشاره)

ماعتقد تحتاجون شرح صح خخخخخخ. همممممممم
،
،
،

صوره مقربه من رف الكريمات و غسول الويه الخ

،
،
،

و لزوم الكشخه منظره (مرايه مكبره) جهة تكبر و جهة منظره عاديه من "إيكيا"

،
،
،

و تحت المغسله حطيت كبت من طقم كبتات ايكيا و خصصته لتخزين عدة التنظيف + سطل صغير+ صابون الغسيل + القفازات + صابون اليد + اكياس الزباله + جرايد للزجاج الخ.

و طريقتي في التنظيف:

التحضير:

– ألبس قفاز (لازم اتحافظون على ايديكم الحلويين)
– اييب بخاخ ايزي اوف بام و ارشه على البقع الكلسيه و البانيو من داخل و المغسله و الجبس اللي بين السيراميك و اخليه دقايق.
– اييب مستحظر هاربيك و اصبه في المرحاض *عزكم الله* و اخليه ربع ساعه.
– اترس السطل ماي حار + ديتول العادي + طشووونه من داوني (عسب الرييحه).

التنفيذ:

– باستخدام الاسفنجه امسح مستحضر ايزي اوف بام من الاماكن اللي رشيت عليها و ادعك بقوه و بعض الاماكن استخدم فرشاه للدعك.
– اييب فرشاة المرحاض و ادعك مستحظر هاربيك و بعدين اشطف (فلااااااش شششش)
– السطل اللي فيه الماي ارشه عالارضيه و ابدا بالتفريش بالفرشاه و الشطف.
– انشف الماي لاني ماحب بقع الماي يوم تنشف.
– و اخييييرا ابخ معطر للجو (اختياري خخخ)

نكمل باقي الصور

،
،
،

عند الشاور هيد علقت علاقات ضد الماي عسب اعلق الشاور جل مالي و الاسفنجه + اسفنجه ريلي + فرشاة الظهر.

،
،
،

في زاوية البانيو علقت ارفف من ايكيا رف لي و رف لريلي. و علقت بعد حبل الملابس مثل مال الفنادق. عسب يوم اغسل الاندروير مالي انشره عند الدريشه و ينشف بسرعه من حرارة الجو.

،
،
،

ورا باب الحمام حطيت كبتين و خزنت داخلهن كريماتي و الفوط الصحيه و قطن الويه و الصوابين الخ.

رف الفوط خذته من ايكيا و علقت عليه رف الثياب خذته من كارفور و مخزنه فيه الكلينيكس + ورق الحمام + فوط الوجه + علبتين سود من ايكيا فيها بعض ادوات العنايه الشخصيه لي و لريلي (قصاصه الاظافر + المقصات + عده الحلاقه و الواكس الخ)

و سله الغسيل من هوم سنتر

و طريقتي في غسل الاندروير (اغسلهم بروحي مب زين تعطون الخدامات)

عندي طشت صغير

– احط فيه ماي حار + ديتول الاخضر + تايد اللي بريحة داوني

و انقعهم لمده ساعه.

– بعدين البس القفاز و افرك (مع انه ما يحتاجون فرك)

– و بعدين اشطف الماي و اغسلهم من الصابون و اترس الطشت ماي حار مره ثانيه (شطفه أخيره)

– و اضيف داوني + مسك العروس او مسك روز او مسك ارزة لبنان (المتوفر عندي)

– و اخليهم ربع ساعه

– بعدين اشطفهم و اعصرهم و اعلقهن ع حبل الغسيل اللي عندي في الحمام. (في الصوره اللي فوق)

و فكره حلوه بعد >>> يوم الثياب رطبه و معلقه ع الحبل حطي تحتهم دخون عسب تمسك فيهن الريحه لو تبين (^_^)

ملااااااحظه: غسلو الاندروير يوم رياييلكم في الدوام مب حلوه يشوف الاندروير معلق في الحمام (منظر غير حضاري خخخخخ)
غسلوهم الصبح و لين الظهر بينشفون من حرارة الجو ان شاء الله

و بس….

ان شاء الله يكون موضوعي عيبكم

ادري انها مب افكار يديده بس حبيت اشارك بشي يمكن في بنات ولا عرايس يداد يستفيدون مني (احم احم)

اذا عجبكم موضوعي ارفعولي اياه بدعوه

ادعولي الله يحفظ لي مملكتي الصغيره وزوجي من كل شر و يرزقني منه الذريه الصالحه المعافاة.

روعه ترتيبج .. عيبتني حركة البوكسات و علاقات الطرابيش ^_^
ماشاء الله تبارك الرحمن .. الله يسعدج ياغناتي دووومـ ..
ويخليج لريلج ولكل من يغليج وتغلينه

مشكوره على طرح التجاربه ^_^

مشكووووره غناااتي و نورتي موضوعي

تسلمين عالدعوه الحلوه و انتي بعد الله يسعدج و يرزقج الذريه الصالحه.

رووعه صراحه استفدت وايد من طريقة الترتيب !