بغيت استفيد من خبراتكن يا بنات
شهر سبتمبر الي ياي اول سنه لي فالجامعه و انا الصراحة بغيت استفيد من خبراتكن
يعني طريقة اللبس و الشنط و الميك اب لاني انا الصراحة ماعرف لهاي السوالف ابد و عمري ما اشل شنط الا فالعيد و شنطة المدرسه :")
و اتمنى تفيدنني بتجاربكن و خبراتكن عن الحياه الجامعية طبعا مب بس اللبس و الشنط
يلا خبرينآ اي جامعه انتي ؟
انا بخبرجج عن طبيعةة الحياهه فالجامعه
اممم من ناآحية لبس بتلقين اللي عرس وحفله من الصبح واللي سبورت واللي سمممبل
اممم الشنط اكثر شنط اشوفهآ ch و lv وشي اللي من الدو و محلات المولات بشكل ععآم
والشوزات اكييييد الفلات والله المششي متعب فالجامعه بالذآت ف جامعتنا 
الكعب حلو حق الايام الخفيفةة و كنوعع من التغييرر
العبي بعد اشششكال والوان بس عن نفسي و لا مرهه لبست عباهه ملونه 
اكثر شي سادهه مفتوحه ومسكرهه هالثنتين اساسيات بالنسبةة لي و افصل لي بتطريز اسود وناعم وشغل خفيف
الميكك اب حلاته الخفيف او واقي وبلشر وروج خفيف يعني مش اوفر لان شي بنات والله فل ميكك اب من الصبحح
و شو بعدد !
ها من ناحية لبس وهيكك
من ناحيية الحياهه الجامعيه
نصيحةة اخت من البدايةة نظمي وقتج وخلصي كل شي بوقته يعني برزنتيشن بروجكت حزةة م يطلب منج السير ابدي فيه والله التأجيل متتتتتتتعب وانا اكثر وحدهه مجربهه
الحياهه الجامعيه حلووهه ومتعبه شوي بس تحسسج بالمسؤؤوليهه وانج كبرتي وخلاص حزةة انج تعتمدين ع نفسجج
والله يوفقجج واذا فيه شي امري حبيبتي انا فالخدمهه
و انا ان شاء الله بدخل جامعة زايد ^..^
حياج الله في جامعة زايد 
حياة الجامعة واايد حلوة ومختلفة عن حياة المدرسة بتستانسين خصوصا مغامرات اول سنة في الجامعة 
المهم نصائح عن الجامعة
انتبهي في الكلاس وحاولي ما ترمسين يا زميلتج دوم
وشاركي دووم وحلي واجباتج اول بأول
اذا عندج اي سؤال اسألي ولا تترددين
وذاكري عدل
بتعتمدين ع نفسج اكثر وهذا بيفيدج
شخصيتج بتتغير للاحسن ان شاءالله
من ناحية اللبس
انا عن نفسي كنت مكثرة من القمصان الي أيدهم طويلة لا سمح الله ما كنت مسكرة ايد العباة
وكنت دوم البس جنز أو بنطلون اسود ، رمادي والألوان الثانية
ساعات البس تيشيرتات وللجنز يوم ما اتفيج أتعدل
اما عن ألميكب فما كنت أحط الا نادراً بس طبعا في أساسيات كل يوم احطها
دوووووم كنت البس فلات وبلارينا وناااااادرا ما البس نعال مرتفع
الشنط نوعت
ساعات اشل شنطة عودة وساعات شنطة بس تكفي الفون والروج و المنظرة 
يعني حسب رغبتج
إذا عندج اي استفسار اتمنى انج تسأليني
بتشوفين الالوان والاشكال والموديلات
العباه والمكياج والوان الشنطه لا تخلينها اووفر لان في مدرسين رياييل ، العباه خذي اسود وعليها نقش ناعم اسود حبيتي ملون خذي بس ما يكون ملفت، الشنط نوعي بين الشنط الكبيره والوسط والصغيره هههههه يوم بتداومين بتشوفين الاحجام والالوان ، المكياج افضل جحال ومرطب بدون لمعه ، حافظي على اللوك الطبيعي
طبعا يوم تدشين الجامعه بتشوفين اشكال والوان لا تتخرعين ، ونصيحه ، لا تقلدين استايلات حد، خلج بشخصيتج.
والحين نفسج بدش جامعة بتخصص يديد ببدا الكورس الياي
فبما اني قبل عشت التجربه
طبعا اللي م الصبح مكب وحشرة
صراحه كل مكان وله لبسه و لوكه
افضل شي كوني بسيطه
انا كنت ارتاح للعباه قصه عمليه وساده
و نعال فلات و شنطه سودا عمليه ومرتبه
وعن الميكب واقي شمس و اطفيه ب رشة بودر خفيفه جدا
وروج خفيف جدا وبس
اساسا تكونين انتي مرتاحه
والله يوفقج ويوفقنا حبوبه
معلوماتكن بتفيدني اكيد
و ما اقول غير الله يوفقكن و يوصلكن لمبتغاكن ^_^